Taulai Atu i Tulaga Faatauaina
Mai se lauga na tuuina atu i le autalavou i Nairobi, Kenya, ia Novema 2011.
O le atinaeina o tulaga faatauaina e faavavau o le a fesoasoani ia i tatou e avea atoa ai ma tagata e finagalo lo tatou Tama Faalelagi e avea ai i tatou.
Ou te fia talanoa e uiga i nisi o tulaga faatauaina e tatau ona outou taulai i ai i o outou olaga i aso taitasi. O le a iloa e tamaitai ia nei tulaga faatauaina. Ma o outou alii talavou, e le faapena ua mo na o tamaitai talavou. O nei tulaga faatauaina e tutusa lava le aoga mo lo outou faalogo mai i ai e pei foi ona aoga mo tamaitai talavou.
Taumatau: ata na tusia e Derek Israelsen
Faatuatua
O le tulaga faatauaina muamua a Tamaitai Talavou o le faatuatua. O le mea moni, o le faatuatua o le uluai mataupu faavae lea o le talalelei. Ia taulai atu o outou faatuatua i lo tatou Tama Faalelagi agalelei ma Lona Alo Pele, o le Alii o Iesu Keriso. E tatau foi ona faaauau pea ona faamalolosia o outou faatuatua i le ata o le faaolataga a le Atua.
E taua le atiina ae o le faatuatua e tausia ai poloaiga uma a le Atua, ma le iloaina ua tuuina mai e faamanuia ai oe ma aumai ai ia te oe le fiafia. O le a e feiloai i tagata e ilo po o le fea poloaiga latou te tausia ae o le fea poloaiga e le amanaiaina. O lenei faiga o le ilo ma filifili o le a le manuia. O le a oo atu ai i le faanoanoa. Ina ia saunia e feiloai ma le Atua, e tatau ona outou tausia uma ia Ana poloaiga. E manaomia ai le faatuatua e usitaia ai, ma o le tausia o Ana poloaiga o le a faamalosia ai lena faatuatua.
Amio Atua
O le tulaga faatauaina lona lua a Tamaitai Talavou o le amio atua. O le auala faatagata matua lena o le faapea mai, “O a’u o se atalii/afafine o le Atua.” Ua i totonu o outou le faaleatua. Na foafoaina outou e lo tatou Tama Faalelagi.
Pe sa e mafaufau ea e faafetai mo lou fatu? Tagai i le galuega o loo ia faia. Na te pamuina ia lava le vai i aso uma e faatumu ai se tane o le taavale auala nofoaafi, e tusa ma le 2,000 kalone (7,570 lita). O totonu o le fatu e i ai ni seti afuala se fa e matala ma mapuni faa 100,000 i le aso, e sili atu ma le faa 36 miliona i se tausaga, ma e le malepe lava. E leai se mea e fai e le tagata—pepa, palasitika, metala, po o se uamea—e mafai ona matala ma mapuni i ni taimi se tele faapena, i lena televave, e aunoa ma le malepe. O totoga uma i totonu o le tino ua mamanuina lelei ma e matuai ofoofogia lava i lona aoga.
Tou te iloa a e taumafai e aau i lalo o le vai e aunoa ma le manava, e le umi lava se taimi e mafai ona e faia ai. O le a le mea e tosoina ae oe i luga ina ia e manava? O le karaponi taiokesaita [carbon dioxide] e fuaina e ni mita laiti e lua e i le ua, ma la te auina atu le feau i luga i lou mafaufau e tai pei o fai atu, “Ua maualuga naua lou karaponi taiokesaita. Ia aveese loa lava.” Ona e aau ae lea i luga ma e manava loa i fafo, e aveese uma ai le karaponi taiokesaita.
Oka ni gafatia tulaga ese o loo i ai i lou tino! Ia tausi faalelei lou tino. Aua nei faia se mea e faaleagaina ai le matagofie faalenatura o lenei foafoaga ofoofoga, ua tuuina mai e le Atua.
Taua o le Tagata Lava Ia
O le isi tulaga faatauaina a Tamaitai Talavou e sosoo ai o le taua o le tagata lava ia. O se soo faamaoni o Iesu Keriso o le a avea ma se atalii po o se afafine tuuto o le Atua—e sili atu le popole i le amiotonu nai lo le manatu faapito, e sili atu le naunau e faatino le agalelei nai lo le faatinoina o le fiapule, e sili atu le tautino ia amio sa’o nai lo le lauiloa.
Ua e iloa lou taua e le gata mai. Ioe, o tamaitai talavou taitoatasi i le Ekalesia e tautino atu o le taua o le tagata lava ia o se tasi lea o ona tulaga faatauaina e sili ona faapelepele i ai. Na te folafola atu, “Ua i ai so’u taua e faavavau ma sa’u misiona paia o le a ou taumafai e faataunuu” (Alualu i Luma o le Tagata Lava Ia [tamaitusi, 2009], 29). E faapena foi le faatatauga i alii talavou. O atalii ma afafine taitoatasi o le Atua e le gata mai lona taua ona o lana misiona paia.
O le taua o le tagata lava ia e aofia ai foi le atinaega o lou faatuatua i le avea ai o se tagata lava ia. E leai se isi tagata e mafai ona atinaeina lou faatuatua mo oe. E mafai ona e moomoo e te maua le faatuatua o Peresitene Thomas S. Monson po o se isi tagata autu, ae e ao lava ona e atinaeina e oe lava. A e faia se measese, i le avea ai ma se tagata lava ia e te salamo i nei faafitauli ua tuanai. Ina ua papatisoina oe ma maua le meaalofa o le Agaga Paia, sa faia e oe lava e toatasi. O lea la, i le avea ai o se tagata lava ia, e te osi feagaiga. O nei sauniga o le faaolataga o se tulaga e fai e le tagata lava ia.
O sauniga ma faamanuiaga silisili o le avea ma se tagata o le Ekalesia e sau i le malumalu. O iina tatou te maua ai sauniga o le faaeaga ma le faamauga i matua, taitoalua, ma tuaa. O sauniga uma o le faaeaga o se tulaga faaleaiga. Ua e iloa le eseesega lena? O sauniga o le faaolataga e fai e le tagata lava ia; o sauniga o le faaeaga e sili atu i le toatasi le tagata e aafia ai.
Poto
O le isi tulaga faatauaina a Tamaitai Talavou e sosoo ai o le poto. I le Ekalesia, o le mauaina o se aoaoga ma le mauaina o le poto o ni tiutetauave faalelotu. Tatou te aoaoina o tatou mafaufau ina ia i ai se aso e mafai ai ona tatou tuuina atu auaunaga taua i se isi tagata. O le aoaoina o le eseesega lea i le va o le moomoo maimau pe ana mafai ona e faia ni mea lelei ma le mafai ona e faia ni mea lelei.
E masani ona fesili mai tagata ia te a’u pe faapeī le avea ma se fomai. Latou te fesili mai, “O le a le umi na e aoga ai?” Ia, sa o se taimi umi lava. Mai le taimi sa maua ai lo’u faailoga faafomai seia oo i le taimi na auina atu ai la’u pili muamua mo le auaunaga faapolofesa sa ou faia e 12½ tausaga. Sa o se taimi umi lava, ae e fia ou tausaga i le isi 12½ tausaga mulimuli ane pe ana ou le faia lena mea? E tutusa lelei lava. O lea la e sili ai lou taumafai ia avea ma se tagata e mafai ona avea ai oe.
O la’u aoga faafomai na mafai ai ona ou faatinoaina se taotoga o le fatu o Peresitene Spencer W. Kimball (1895–1985) i le 1972. O lea la aua nei e manatu faatauvaa i le poto. O le mea moni lava o le mamalu o le Atua o le atamai lea (tagai i le MF&F 93:36).
O Filifiliga ma le Tali Atu mo A’u Lava
O le isi tulaga faatauaina a Tamaitai Talavou e sosoo ai o filifiliga ma le tali atu mo a’u lava. O le isi lea faaupuina o le “faitalia e fai ai amioga lelei.” O le faitalia e fai ai amioga lelei o se vaega o le olaga aua e finagalo le Tama Faalelagi mo i tatou uma taitoatasi e galulue mo i tatou lava ma ia avea ma ituaiga tagata tatou te mananao e avea ai i tatou.
O filifiliga ma le tali atu mo a’u lava e ta’u atu ai ia te oe o filifiliga uma lava e te faia, o oe lava e tali atu mo taunuuga o lena filifliga. O lea la e tatau ai ona tatou faia filifiliga faatuatuaina. Atonu e le afaina tele pe e te faia se fusiua lanumoana pe o se fusiua lanumumu po o se ofu lanu viole po o se ofu lanumeamata, ae o le mea e taua pe o lau filifiliga e te atili latalata atu ai pe e te taumamao ai mai le Alii ma Lona ituaiga soifuaga. Ma aisea matou te fautua atu ai ma augani atu ai ina ia e mulimuli i le ala a le Alii? Aua o le ala lena i le fiafia.
Galuega Lelei
O le isi e sosoo ai o tulaga faatauaina a Tamaitai Talavou o galuega lelei. O lenei tulaga faatauaina ua mamanuina i le soifuaga o Iesu Keriso, o le e alofa i tagata. Ina ia faaalia Lona alofa mo tagata, sa Ia auauna atu ia i latou. A tatou alolofa i se tagata, tatou te faaalia lea i le faia o se mea lelei. O lea la, ia aoao e auauna atu: saili ni auaunaga e manaomia ona faia ma faatino loa. Ia faatei tagata i se galuega lelei latou te le’i fuafuaina. Tatou te maua lena avanoa i le aiga, i le aoga, ma i le lotu.
Ou te manatua le taimi muamua sa ou alu ai i Aferika o se Pulega Aoao. O la’u soa sa ma malaga o Elder Russell C. Taylor. O taeao taitasi pe a ou ala ae, ou te tau atu ai ua uma ona ia faaiilaina o’u seevae. Na te le’i tau faaiilaina o’u seevae, ae o le auala lena sa ia fai mai ai, “ou te alofa ia te oe.”
Amio Sa’o
O le isi tulaga faatauaina a Tamaitai Talavou o le amio sa’o. O le upu amio sao e sau mai le upu integer, o lona uiga “atoa” po o le “maopoopo.” I tulaga faafomai tatou te talanoa e uiga i le faatulagaga o le amio sa’o o le fatu. O lea la, a faapea e faaletonu se mea—mo se faataitaiga, o se manua i le fatu—matou te faapea ua leai lona amio sa’o; ua le toe mafai ona ia faia le mea sa tatau ona ia faia. A faatatau i le tagata soifua, o le amio sa’o o lona uiga o oe e faalagolagomia—e mafai ona faamoemoe atu ia te oe.
I tusitusiga paia tatou te faitau ai e faapea sa alofagia e le Alii le uso o le Perofeta o Iosefa Samita o Ailama ona o le “faamaoni o lona loto” (MF&F 124:15). Sa le’i fetalai mai le Alii e uiga i le fausaga o lona fatu; sa fetalai mai o Ia e uiga i le agaga amio sa’o o Ailama.
Mama
O le tulaga faatauaina aupito fou a Tamaitai Talavou o le mama.O le mama o se upu matagofie. O le a le uiga ia te oe? O le mama o le “mama a’ia’i”. Ae e i ai foi le isi uiga. Tou te manatua i le Feagaiga Fou, ina ua pai atu le fafine sa i ai le faafitauli o le punatoto i le tuupao o le ofu o le Faaola? Sa fetalai le Faaola, “Na pai mai lava se tasi ia te au: aua ua ou iloa ua alu atu le mana nai ia te a’u” (Luka 8:46). I lena tulaga o le, mama e ese mai lona uiga. I le gagana Eleni o le upu dunamis, o le faapogai lea tatou te maua mai ai upu o le dynamo ma le dynamite. O lona uiga o le “mana.” Matou te mananao i ituaiga uma ia o le mama mo outou alii ma tamaitai talavou faapelepele.
Ia Avea Outou ma Tagata E Mafai Ona Avea Ai Outou
O le poto e aumai ai le mana; o le mama e aumai ai le mana; o le alofa e aumai ai le mana. Matou te mananao ia outou maua le mana e avea ai outou ma ituaiga tagata ua finagalo le Alii e avea ai outou. O loo outou tuputupu ae, o loo outou suia, ma o loo pule outou i le ituaiga tagata tou te iu i ai.
Ou te le manatu e i ai se eseesega pe o oe o se faatau meafale, se fomai tipitipi, se loia, po o se tusiata mamanu o fale. Soo se galuega aoga, po o le a lava e fetaui ma oe, e manaia lena. Ae o le mea moni e sili ona taua o le ituaiga tagata ua avea ai oe.
Fesili ifo ia te oe lava i fesili nei: O ia te a’u ea le amio sa’o? O o’u mama ea? O ia te a’u ea le alofa? O ia te a’u le agalelei? O nei uiga uma e le mafuatiaina. Ma a o e mafaufau ma ola i nei uiga o tulaga faatauaina a Tamaitai Talavou, o le a fesoasoani ia te oe ia e avea ai ma tagata e mafai ona avea ai oe.
Taumatau: ata na tusia e Andrea Choy