O Le Faamanuiaga o a Maua Meaai Teu
Bruce Richards, Ilinoi, ISA
Sa ma amata faatauina mai ma lo’u toalua o Brittney ni meaai e teu i le popofou o le ma faaipoipoga. I masina muamua ina ua uma le ma faaipoipoga, sa ma faatauina mai ai ni nai aitema e mafai ona teu i taimi uma ma te o ai e fai le faatauga o meaai. O le faaopoopoina i lea taimi ma lea taimi o nai mea laiti, sa ma faaputuina ai se faaleoloa aoga o meaai. Ma te le’i iloaina po o afea o le a manaomia ai ona ma faaaogaina, ae sa ma iloaina sa taua.
Ina ua savali le tasi tausaga o le ma faaipoipoga, sa ma siitia atu ai i le isi itu o le atunuu mo aoga maualuga atu, ma sa ma o mai ma aumai le ma teuga meaai. Sa faigata le olaga, i mea tautupe. Sa ma faaaogaina uma le ma teugatupe e faatau ai se fale, ma sa le maua se tupe a Brittney i le avea ai o se tagata aoga faafaiaoga. Sa ma faalagolago i la’u tupe na fesoasoani i la’u aoga e totogi ai pili, ae sa le’i lava foi.
Sa oo foi o ma tulaga tautupe i se isi faaletonu sili atu i le po lona lua talu ona ma nonofo i le ma fale fou. Sa ala a’e Brittney ma le matuai tiga o lona manava, ma ina ua le te’a i le mavae ai o nai itula, sa ma o loa i le falemai. Sa fai lona taotoga i se taimi mulimuli ane o lena aso e aveese ai lona pitogaau.
Ina ua toe malosi o ia, sa ma saofafai loa i le faapaketiina o a ma tupe. A o ma faaopoopoina ia pili o le fa masina na sosoo ai—lea na aofia ai le taotoga faatopetope—sa ma iloaina ai e mafai lava ona ma ola e aunoa ma le faia o se aitalafu. Ae peitai, ina ia faia lena mea, e le mafai ona ma faaaluina le sili atu ma le $25 i masina taitasi i meaai ma mea e faaaoga i le vaiaso. Ia pe o le tasi vaefa lena o tupe sa masani ona ma faaaluina.
O meaai na teuina sa ma faaputuina i le tausaga na mavae sa oo ina matua aoga lava. Sa lava ma totoe e aofia ai mea masani sa ma manaomia mo le fa masina, ae sa ma faaaogaina le $25 na paketiina e faatau ai susu ma isi meaai e le mafai ona tuu umia. Ma te le’i aai i ni meaai taugata, ae ma te le’i matelaina foi.
A o ma ola fuafua lelei ma auauna atu i isi ma le loto i ai, sa ma maua faamanuiaga faaopoopo. O se tasi o a’u uo i le aoga sa faamaeaina lona faailoga, sa talosaga mai ma te fesoasoani atu i le siitia o lona aiga. A o ma fesoasoani atu i ai, sa fesili mai pe ma te mananao e ave ma maua ni meaai sa totoe i le latou fulisa. Ona o lona agalelei, o lea na ma maua ai ni aano o manufasi e faaopoopo atu i le ma teuga meaai.
Na faamanuiaina i maua e le Alii a o ma saunia ni meaai e teu, totogi a ma sefuluai, ma faaali atu le naunau e auauna atu. Sa ma ola i na masina e aunoa ma le nonoina mai o se tupe. Ina ua uma le semesa lena, sa faapea ona maua se galuega tumau a lo’u toalua, ma sa mafai ona ma gafatia le faaaluina o se seleni e sili atu i meaai ma mea e faaaoga soo. Sa ma toe faaputuina le ma teuga meaai, ma o loo faaauau pea ona faamanuiaina i maua a o ma usiusitai i poloaiga a le Alii.