Mo Le Malosi o le Autalavou
Moli … Meapueata … Faatino!
O oe e te filifilia le faiga e tusi ai le tusiga mo lou olaga.
Atonu ua e faalogo i le faaupuga “O le lalolagi atoa o se tulaga [o faafiafiaga]” mai i le tala faatino lauiloa a Viliamu Siekisipia As You Like It. O le manatu sa faaali mai e tagata a Siekisipia o le, o i tatou uma o tagata faafiafia o loo faatinoina o tatou matafaioi i le tala faatino iloga o le olaga. O la’u fesili ia te oe i le taimi nei o le, “O le a lou matafaioi i le olaga?” ia pe sili atu foi, “O le a se mea e te manao ia e avea ai lou matafaioi o le olaga?”
Na saunoa Peresitene Tavita O. MaKei (1873–1970), “O mafaufauga o fatu ia o amioga, ma e muamua mai [i amioga].”1 Ae o le a le mea e avea ai ou mafaufau ma tusiga i lou faiai? Atonu ua e iloa o o tatou faiai e pei o se komepiuta: e na o mea lava sa e teuina i totonu e mafai ona e aumaia i fafo. Afai sa e tuuina ai i totonu na o otaota lava, ia na pau lava lena o mea o le a e maua mai ai. E tatau ona e iloaina o mea uma e te matamata, faitau, pe faalogologo i ai, o le a fesoasoani e tusi ai lena tusiga i lou olaga.
Ata na tusia e David Malan
Ata ma Mafaufauga Malolosi
Talu ai o se vaega tele o la’u matata faapolofesa sa i ai i faasalalauga, ua tele ai ou aafiaga i le vaaia o auala e mafai ai e ala o faasalalauga ona fatuina ni ata ma ni mafaufauga malolosi i mafaufau o tagata. O le faia o se faasalalauga faapisinisi maoae i le televise e mafai ona pei moni lava o se ata tifaga i Hollywood, vagana ai le “faamaumauina” po o le pueina o le ata e masani lava ona faia i ni nai aso nai lo o ni masina.
Ina ua uma le faaaluina o se taimi umi e suesueina ai ma fuafuaina ai se faatosinaga i ala o faasalalauga, ou te ono faafaigalueina mo sina taimi ni tagata pueata mai Hollywood, tagata e laeiina ma faalauiloa atu ia lavalava mai Italia, ma le au fai musika mai le Aai o Niu Ioka. Ona amatalia loa lea o le galuega. O le mulimuli ai i se faatulagaga faanatinati o le gaosiga [o le ata], o le a matou faalauiloa le faasalalauga faatosina i ituaiga uma lava o ala o faasalalauga. Sa matuai mataina, matagofie, ma o se galuega manaia.
O lenei aafiaga, e mafai ona ou fai atu ia te oe i se mea moni lava o faasilasilaga o loo e vaaia i luga o le initoneti, i luga o le televise, po o totonu o mekasini, e le o ni mea moni. O ata o loo e vaaia ua na o ni fatuga faatusiata, na faia lava ma le faamoemoe e faatosina ai tagata ia faatau le oloa o loo faasalalauina. O le mea lena ou te le’i ioe ai lava e fai ni faasalalauga faatosina mo oloa ou te le’i talitonu i ai. O le tele lava o tagata ua malamalama i nei faamatalaga e uiga i faasalalauga faapisinisi, ae e faapena foi le mataupu lautele e uiga i tifaga, siou a le TV, anotusi i le uepi ma telefoni feaveai, ma taaloga faaeletonika: na fausiaina uma ma savali fuafuaina ma faamoemoega i tua atu o ia mea.
Puipuiga Mamana
Ona e faaaoga e Satani ia ala o faasalalauga e taumafai ai e faasese i tatou i le solia o poloaiga a le Atua, o lea e tatau ai ona e mulimuli ma le naunautai e le maluelue i le fautuaga o loo tuuina mai i le Mo le Malosi o le Autalavou: “Ia filifili ma le atamai pe a faaaogaina ala o faasalalauga, aua soo se mea lava e te faitauina, faalogo i ai, pe vaai i ai e i ai sona aafiaga mo oe. Ia filifili na o ala o faasalalauga e siitia ai oe.”2
Ia manatua o le mea moni ua e i ai iinei i lenei olaga e atiina ae lou faatuatua, ina ia tofotofoina, ma ia fiafia. I le avea ai ma se tasi o le Ekalesia moni a Keriso, ua ia te oe se mana malosi e fesoasoani ia te oe. Ua ia te oe le mana o le Agaga Paia e lapatai ia te oe pe a faaali mai i ou luma se mea e le sa’o. Ua ia te oe foi le mana o le faitalia, ina ia mafai ona e filifilia le mea o le a e faia ma le mea o le a e le faia.
Afai e te le’i poto i nisi o taimi ma filifili ai i nisi taimi e matamata pe faalogologo i anotusi sese, ia e filifili nei e fai se suiga. Afai ua faaitiitia e na filifiliga leaga lou agavaa e lagona ai le Agaga, ia e alu ifo i ou tulivae ma ole atu i le Tama Faalelagi mo le malosi ma le faamagaloga. Ma afai o loo i ai lava se faafitauli, ia fesili atu mo se fesoasoani mai ou matua po o le epikopo. E te ono lagona le ma po o le fefe foi e talanoa atu ia i latou, ae o le uiga o lena mea, e tatau ona e fai soo atu ia i latou. Faatasi ai ma le lototele ma le faamaualalo e mafai ona e manumalo ai i ou luitau, ma a e manumalo ai, o le a e lagonaina le matagofie o le filemu ma le olioli o le faamagaloga.
Ua le na o oe o se tagata e faatinoa ata tifaga i luga o se tulaga; o oe o se atalii/afafine o le Atua i se lalolagi faataitai ua tumu i ala o faasalalauga lelei ma leaga. Afai e te fafagaina lou agaga i anotusi sa’o, o lau matafaioi i le olaga o le a fiafia, ma o le a e faapei o se malamalama e susulu atu e fesoasoani ma taiala ai isi. E i ai lava i taimi uma le pouliuli e siomia ai i tatou, ae o loo i ai foi i taimi uma se ala e faavavau ma malamalama e taitai atu ai i tatou i le punavai o le amiolelei ma le malamalama.