Tatou te Manaomia le Ekalesia a Keriso
O le vaaiga faamaualuga o se pepelo faatiapolo.
Afai e mafai ona e vaai i le pusa o meafaigaluega a le tiapolo, o le a e vaaia ai ni meafaigaluega tonu mo le taitaieseina o tagata, faapea ai ma ni nai meafaigaluega ua fai si leva ona faaaoga o loo mautinoa lava le i ai faatasi ma ana meafaigaluega e faaaoga soo.
O se tasi o ili faapitoa e matele ina ona faaaogaina i aso nei e oo mai i le ituaiga o pepelo iloga lenei: “E te le manaomia se ekalesia faatulagaina ina ia avea ai ma se tagata lelei, ina ia e faaleagaga ai, po o le ina ia e alofa ai ia Iesu. O ekalesia uma e i ai lava se mea e le atoatoa ma piopio ai.”
O lenei taufaasese e atamai aua e faalagolago i ni manatu moni se lua ina ia e foloina ai le pepelo lapoa. E moni e tatau ona tatou faamalosia a tatou sootaga ma le Atua ma o tagata foi e le atoatoa, ae o nei mea moni e le faapea ai o le manatu moni e uiga i se ekalesia e sese.
O lenei ituaiga o manatu e sese, ma o ni mafuaaga nei e lima e mafua ai:
1. Sa faavaeina e Keriso ia Lana Ekalesia. I Tusi a Mataio, Mareko, Luka, ma Ioane, o le a e vaai ai o se vaega tele o le galuega a le Faaola sa aofia ai le valaauina o tagata, tuuina atu ia i latou le pule, aoao i latou mo tulaga faaleautaitai, ma aoao i latou i le ala e galulue ai o se vaega. Ua aoao mai Elder Dallin H. Oaks o le Korama a Aposetolo e Toasefululua, “O i latou e teenaina le manaomia o le lotu faatulagaina, ua teena foi le galuega a le Matai, o le na faavaeina Lana Ekalesia ma ona taitai i le vaeluaga o aso ma le na toe faavaeina le Ekalesia ma taitai i ona po nei.”1
2. O le Ekalesia e faatinoina le talalelei ma ona sauniga. Na ona aoao mai le Faaola e faapea, o le papatisoga ma le meaalofa o le Agaga Paia e manaomia mo le faaolataga (tagai i le Ioane 3:5), ma o le pule e talai atu ai le talalelei ma faatino ai nei sauniga sa faapea ona puleaina. E pei ona sa saunoa Elder Oaks, “Ua faamanino mai i le Tusi Paia le tatau ona i ai o le pule o le perisitua ma o lenei pule e tatau ona faaee atu e ala i le tuuina atu o lima o i latou o e umiaina. O le pule o le perisitua e le’i oo mai ona o se manaoga e auauna atu po o le faitauina o tusitusiga paia.”2
3. O le Ekalesia e fesoasoani ia i tatou e avea ai ma tagata lelei atu. Na aoao lata mai nei ia Elder Donald L. Hallstrom o le Au Peresitene o Fitugafulu: “Tatou te manaomia le talalelei ma le Ekalesia. O le mea moni, o le faamoemoega o le Ekalesia o le fesoasoani lea ia i tatou ia ola ai i le talalelei.3 E ui o le Ekalesia e faia mai i tagata le atoatoa, ae e fesoasoani ia i tatou ia tatou avea atili e faapei o Iesu Keriso e ala i le aoaoina o i tatou i Ana aoaoga faavae, tuuina mai ia i tatou o avanoa mo auaunaga ma le tuputupu ae faaletagata lava ia, ma le faatagaina o i tatou e ulu atu ma faafou feagaiga ma le Atua.
4. E taua le lotogatasi. Ua poloaiina i tatou e le Alii ia tatou “tasi; ma afai tou te le tasi e le a a’u outou” (MF&F 38:27). O lenei tasi o se vaega taua lea o le fuafuaga a lo tatou Tama Faalelagi mo i tatou. Sa aoao mai Peresitene Henry B. Eyring, Fesoasoani Muamua i le Au Peresitene Sili:
“Tatou te moomoo, o ni fanau agaga a lo tatou Tama Faalelagi, mo lena olioli sa tatou mauaina faatasi ai ma Ia i le olaga na muamua atu i lo lenei. O Lona finagalo ia tuuina mai ia i tatou lena moomooga paia mo le lotogatasi ona o le alofa ia i tatou.
“E le mafai ona Ia tuuina mai ia i tatou o ni tagata taitoatasi. O le olioli o le lotogatasi ua Ia matuai finagalo e tuuina mai ia i tatou e le aunoa ma isi. E ao ina tatou sailia ma agavaa ia i ai faatasi ma isi. E le o se tulaga la e faateia ai le uunaia o tatou e le Atua e faapotopoto ina ia Ona faamanuiaina i tatou.”4
5. O le “faatulagaina” e le o se upu e uiga tutusa ma le upu “leaga” po o le “piopio.” E masani lava a tau e tagata se tasi po o se mea “faatulagaina,” o se faamalo lea. Ae mo se mafuaaga e le mailoa, i tulaga faalelotu o se faitioga. Fai mai Elder Neal A. Maxwell (1926–2004) o le Korama a Aposetolo e Toasefululua, o se tasi o mafuaaga na faatulagaina ai e Keriso ia Lana Ekalesia ona “aua o tagata lelei taitoatasi ua le lava lea e tetee atu ai i le tiapolo.”5 Ua fofola manino mai e le Alii le faafitauli ina ua Ia fetalai, “Faauta, o lo’u fale o se fale o le maopoopo, ua fetalai mai ai le Alii le Atua, ae le o se fale o le fenumia’i” (MF&F 132:8). O le faatulagaina o le mea tonu lea e manaomia ona i ai se ekalesia.
A o e tau atu i pepelo o loo avea ma meafaigaluega o le matata a le tiapolo, ia manatua ua i ai foi la oe lava seti o meafaigaluega e fesoasoani ia te oe e te ola ai i le talalelei—o meafaigaluega ua tatou maua e ala mai i le Ekalesia a Iesu Keriso: o tusitusiga paia, o le meaalofa o le Agaga Paia, ma upumoni faaalia e ala mai i perofeta o aso nei.
Tauagavale: ata na saunia e Cristina Smith; taumatau: faamatalaga mai le Keriso ma le Taulealea Mauoa, na saunia e Heinrich Hofmann, faaaloaloga a le C. Harrison Conroy Co.; Toefuataiga o le Perisitua Mekisateko, na saunia e Walter Rane, © IRI; ata na tusia e Welden C. Andersen © IRI