Fesili ma Tali

“Na matua faatiga se tasi o a’u uo ia te a’u. Ou te iloa e tatau ona ou loto faamagalo, peitai e faapefea ona ou faagaloina le tiga?”

O le faamagaloina o lau uo ma le faamatuu ese o lagona tiga e mafai ona faigata. Ina ia faamagalo ma ia faatea ese lagona tiga o le a manaomia ai le alofa mutimutivale—o oe ma le Alii. O lau galuega e le o le taumafai e faatea ese le tiga ae ia faamagalo: ia faaali atu le alofa mutimutivale i lau uo (tagai i le MF&F 64:8–10). A o e faia, o le Alii, a o e sailia Lana fesoasoani, o le a faaali mai le alofa mutimutivale ia te oe. O lona uiga, e mafai ona Ia suia ou lagona tiga i le alofa ma le toafilemu.

Talanoa i lau uo. Taumafai ia e malamalama i le mea na tupu. Atonu e te iloa ai e le’i mafaufau lau uo e faatiga ia te oe, ma atonu e faigofie atu ai ona faamagalo ma faatea le tiga.

E tusa lava pe faigata le faamagalo atu pe umi foi se taimi e alu ai, ae ia taumafai pea. Mulimuli ane, o le a e manao e ta’u atu i lau uo ua e faamagalo ia te ia ma e manao e te lua uo pea. O le taofiofia o se lagona le fiafia i le tau o se faauoga e le mafai ona oo atu ai i se filemu lea e oo mai i le faamagaloga moni.

Ia manatua tatou te faalagolago uma i le Togiola a le Faaola e faamagalo ai a tatou agasala. Tatalo ina ia mafai ona e faamagalo atu, ma ia e faatuatua o le a fesoasoani le Alii ia te oe. O loo ia te Ia le mana e faamalolo ai le tiga o lou loto.

Tuu Atu i le Alii e Faamasino

Tuu atu i le Alii e faamasino i amioga leaga na faia e isi. Ia manatua ua fetalai mai le Alii: “O A’u o le Alii, ou te faamagalo i lē o le a Ou faamagaloina, ae o outou ua poloaiina ia faamagalo atu i tagata uma” (MF&F 64:10). E faigata ona faagalo lagona tiga, ae afai e te tatalo mo se fesoasoani, o le a e iloa ai o le faamagalo atu e mafai ona faamalolo ai manua tuga ae suia ai le ita i le toafilemu ma le alofa lea e na o le Atua lava e mafai ona aumaia.

Genessis H., 16 tausaga, Antofagasta, Chile

Faamagalo i Tagata Uma

O puapuaga o le Alii o Iesu Keriso na faapea ona afu toto ai pu ninii uma o Lona tino, ae sa Ia manumalo i le tiga ma maua le malosi e faamagalo atu ai a o i ai i luga o le satauro. E le faapea ona sa Ia le lagonaina le tiga ae ona mo Ia, sa na ona pau lava le mea sa taua o le finagalo o le Tama. E faapena foi ia i tatou, na pau lava le mea e tatau ona taua o le finagalo o le Atua, ma ua finagalo mai o Ia ina ia tatou faamagalo atu i tagata uma. E tusa lava pe e tuai ona malolo o tatou manuaga, e mafai ona tatou manumalo i o tatou tiga e ala i le tatalo ma le faamagalo atu moni o i latou o sese ia i tatou.

Ahou O., 17 tausaga, Ivory Coast

Alofa Ia i Latou

Ua ou iloaina o le auala sili e taulima ai le tiga o le alofa atu lea i le tagata na faatiga ia te oe. A uma ona faatiga mai se tagata ia te au, ou te taumafai e faamālo atu ia i latou ma faaali atu le agalelei sili atu ia i latou i le mea ou te mafaia. O le faia o lenei mea, e le nofo ai le ita i totonu ia te oe. Nai lo lena e alu ese atoa lava. O le a e maua ai se mafutaga malosi ma po o ai lava sa faatiga ia te oe.

Katie A., 18 tausaga, Iuta, ISA

Vaai Atu Ia i Latou e ala i Fofoga o le Alii

Na lagona e Iesu Keriso ou tiga ina ia mafai ona faamagaloina oe i au agasala ma ina ia mafai foi ona e faamagalo atu i isi. A e tatalo mo le malosi e te vaai atu ai i se isi tagata e ala i Ona fofoga, o le a e iloa ai ua sili atu lou malamalama e uiga ia i latou. A o mavae atu vaiaso, o le a e matauina o le a aluese atu ou lagona faalealofa.

Kimberly B., 18 tausaga, Nebraska, ISA

Tatalo ia [E] Lagona le Faamagalo Atu

Tatalo i lo tatou Tama Faalelagi agaalofa ina ia mafai e oe ma lau uo ona maua le lototele e faamagalo ai le tasi ma le isi. O le faamagaloina o se tasi sa faatiga ia te oe o se amioga faaKeriso. O le faamagalo atu e fofo ai e oo lava i lagona e sili ona tiga.

Lehi E., 16 tausaga, Abu Dhabi, United Arab Emirates

Manatua le Alofa Mama

Na aoao mai Nifae, “Ua tuu mai ai e le Alii le Atua se poloaiga ia i ai i tagata uma le alofa mama, o lea alofa mama o le alofa lea” (2 Nifae 26:30). Mo a’u, o le alofa mama o le auala sili lea ona lelei e faatea ai le tiga pe afai ua faatiga mai se tasi o a’u uo ia te a’u. O le alofa mama o lona uiga o le taliaina o vaivaiga o se tasi; o le onosai i se tasi ua tuuina i tatou i lalo; ma le teteeina o le manao ia lagona le tiga pe a le taulimaina e se tagata se mea i le ala sa o tatou faamoemoe i ai. Afai tatou te maua le alofa mama i a tatou uo, o le a faamanuiaina i tatou.

Liezel V., 21 tausaga, Negros Occidental, Filipaina

Tatalo ia [e] Iloa ona Faamagalo Atu

E tatau ona e tatalo ina ia e iloa ona alofa ma faamagalo atu i isi. E ui o le faamagalo atu e mafai ona matua faigata lava i nisi o taimi, ae e finagalo lava i taimi uma lo tatou Tama Faalelagi e fesoasoani mai ia i tatou. Manatua le faataitaiga sa fai e le Faaola e ala i le faamagaloina o tagata uma. Kolose 3:13 e faapea, “Ia fefaapalepaleai ma ia fefaamagaloai outou, pe afai ua agaleagaina se tasi e se tasi: faapei ona faamagalo mai Keriso ia te outou, ia faapea foi outou.” O le faamagaloina moni o se faagasologa, o nisi taimi o se faagasologa umi lava. Ae a tatou faamagalo moni atu, tatou te lagona le toomaga sili ma le olioli. Ou te iloa e faatasi ai ma taumafaiga o le a mafai ai ona e aveesea oe lava mai le tiga ae maua le fiafia moni.

Leonardo L., 20 tausaga, Buenos Aires, Atenitina

Faatuatua i le Togiola

E tumu lo’u loto i le olioli pe a ou manatua o le mana faaola a Iesu Keriso e mafai ona aveesea ai o tatou tiga. Ua tofu i tatou ma aafiaga tiga mai lea taimi i lea taimi, ae o le taofi mau i le afioga a le Tama Faalelagi, e mafai ai ona tatou maua le malosi tatou te manaomia e tumau ai. E ui lava ina sa tutui o Ia e fitafita i le satauro, ae sa ole atu Iesu Keriso i le Tama e faamagalo i latou. Sa tumu Ona totoga i le alofa ma le alofa mutimutivale i tagata uma. Ua ou iloa afai tatou te o mai ia te Ia ma ole atu mo Lana fesoasoani, o le a siomia i tatou i Lona alofa e le iu.

Virginia M., 20 tausaga, Peru

O tali ua faamoemoe e mo se fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

Mulimuli i le Faataitaiga a le Faaola

“I itula na sili ona tiga o le Faasatauroga sa mafai e le Faaola ona faapea atu, ‘Lo’u Tama e, ia e faamagaloina atu ia te i latou; aua ua latou le iloa le mea ua latou faia’ (Luka 23:34). O se mea faigata lena ona talosagaina a o tatou mafatia pe sa faatiga mai foi [se tasi ia i tatou], pe vaivai po o le atuatuvale pe o le mafatia e aunoa ma se sala. Petai o le taimi lena atonu e aupito sili ai ona taulia amioga faaKerisiano.”

Elder Jeffrey R. Holland o le Korama a Aposetolo e Toasefululua, “Lesona mai le Falepuipui o Liperate,” Ensign, Sete. 2009, 32.

Fesili o le a Sosoo Mai

“E matuai mamao lava le malumalu ma e seasea ou alu i ai. E mafai faapefea ona avea le malumalu ma se vaega tele o lo’u olaga i le taimi nei?”

I-meli mai lau tali a o le’i oo i le aso 15 o Mati i le [e-mail] pe lafo mai i le:

Liahona, Questions & Answers 3/2013

50 E. North Temple St., Rm.2420

Salt Lake City, UT 84150-0024, USA

E ono faapupuuina tali mo le uumi po o le manino.

O le faamatalaga ma le faatagaga o loo i lalo e tatau ona aofia mai i lau i-meli po o le tusi: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e itiiti ifo i le 18 ou tausaga, o le faatagaga tusitusia a ou matua (e talia foi le i-meli) e lolomiina ai lau tali ma lou ata.