Sa Matou Auai Faatasi I Ai
Nancy Grant, Georgia, ISA
Sa matou siitia mai se aai tele sa i ai se aofaiga toatele o le Au Paia o Aso e Gata Ai i se nuu e toa 5,000 i se nuu maotua i le eria o Deep South i le Iunaite Setete, lea sa matou nonofo ai i le silia ma le fitu tausaga. A o ou aluese mai le faleoloa o le lotoifale mo meafaigaluega ma mea faapena i le matou aso muamua iina, sa fai mai se faatauoloa talavou, “Ia manuia le aso, Mrs. Grant.”
Sa ou fesili atu, “E faapefea ona e iloa lo’u igoa?”
Sa ia tali mai, “Na o outou lava tagata fou i le taulaga.”
Sa maua so matou fale e faasaga atu i le isi itu auala mai se lotu Porotesano e tasi ma se isi i le isi magaala, ae e 45 minute le mamao o le mea na matou nonofo ai mai le falelotu aupito lata mai a le AAG. O Aso Sa uma lava, faapena foi i ni taimi se lua i le aluga o le vaiaso, matou te savavali atu ai i le tatou falelotu. I na tausaga e fitu, sa auauna atu ai lo’u toalua i le au epikopo, ae sa ou galue o se peresitene o le Peraimeri ona sosoo ai lea ma le peresitene i Tamaitai Talavou.
Sa matou iloaina o le olaga faaagafesootai ma le fatu o nuu laiti sa i ai lea i ekalesia i le lotoifale. Ina ia taliaina, sa matou iloaina e tatau ona matou aafia ai. Sa le’i umi ae masani lelei le ma fanau laiti e toatolu ma isi tamaiti o le uarota, ae sa ma mananao foi ia latou lagonaina se lagona o le i ai i lo matou pitonuu. Sa ma uunaia i latou ina ia aafia i le aluga o le vaiaso i gaoioiga a ekalesia a le pitonuu, e aofia ai taumafataga a aiga i po o Aso Lulu i se tasi o ekalesia.
Sa ma tuuina le ma atalii ma le ma fanau teine i polokalama a le nuu mo le autalavou. Sa auai foi le ma fanau i Aoga Tusi Paia i Tuuaga o Aoga i lotu uma ia e lua sa lata [mai i le matou fale]. Sa pepese le ma fanau teine i le aufaipese a le autalavou a se ekalesia i le nuu; sa iu foi ina pese toatasi se tasi o ma tama teine i le aufaipese. Sa auai le ma atalii i se vaega mo tagata talavou a se ekalesia i le nuu.
Sa masani ona talai atu se faifeau e asiasi mai i le nuu e tetee i “Mamona,” ae sa iloa e o matou tuaoi matou te le faapena e pei o tagata sa lapataia ai i latou e failotu.
O taumafanafana uma lava e lagolagoina ai e aulotu a le itu a se tasi o aulotu Porotesano se tolauapiga a le autalavou i le Motu o St. Simons, Georgia. Ina ua maea se tasi o na tolauapiga, sa fai mai se aoaoga a se tasi o faifeau mai le pulelaa, “Na pau lava le talavou e alu i le tolauapiga i le taumafanafana lenei o le tatou teine Mamona lelei o, Kelly Grant.”
Sa talia i matou e o matou tuaoi Porotesano aua sa matou taliaina i latou. Matou te le’i fetuunaia lava o matou tulaga faatonuina po o mataupu faavae.
A o tuputupu ae le ma fanau, sa faapena foi i a latou molimau i le Ekalesia toefuataiina. O mea sa latou aoaoina mai tala o le Tusi Paia a isi ekalesia sa mafai ai ona latou faia se faafesootaiga i le va o le Tusi Paia ma le Tusi a Mamona. Ma le isi, sa latou vaaia le tiute taua o le perisitua i la tatou Ekalesia, ma na mafai ona latou lagonaina le eseesega.
Ina ua oo atu le matutua o le ma fanau i tausaga e tafafao faamasani ai, sa faapea ona siitia atu e le kamupani faigaluega a lo’u toalua o ia i Atlanta, Georgia. Sa ou tagi a o ou sainia le maliega o le matou fale i tagata fou o le a anaina. Sa fusi a’u e le matou loia ma fai mai ma le alofa, “E leai se tasi e mafai ona fai mai e le’i iinei ni Mamona.”
O le aafiaga a le ma fanau ma Porotesano i se nuu laitiiti, sa aoaoina ai i latou i le faapalepale, onosai, ma le agaga malamalama. Sa latou maua ni talitonuga na laugatasia ai ma i latou mai isi tapuaiga, lea sa fesoasoani ia i latou e auauna atu ai o ni amepasa mo le Ekalesia. Ma sa oo ina latou iloa le taua o le Agaga Paia, le perisitua, ma le alofa tele o le Faaola mo i tatou uma.
E leai se tasi sa matou faaliliuina mai i na tausaga e fitu, ae sa matou totoina ni fatu. Ua faamanuiaina i matou i le taimi lenei ona sa oo mai tagata o lena nuu laitiiti i o matou olaga. Ou te faamoemoe ua faamanuiaina i latou ona sa matou o atu i o latou olaga.