Seia Tatou Toe Feiloai
Manatuaina o Ia i le Sapati
Sa lelei lava le aluga o le matou lesona o le Aoga Sa e uiga i le tausia o le aso Sapati ia paia—seia oo ina ta’ua e se tasi le televise.
A o faaali mai e tagata o latou manatu e uiga i le pe talafeagai le matamataina o le televise i le Aso Sa, sa faapea ona le maluelue ai taofi o isi tagata o le vasega. E le’i umi ae amata ona tiga lagona o nisi tagata o le vasega. O le Agaga, lea sa i ai muamua i le matou talanoaga, sa suia moni lava i se feteenaiga.
O le matauina o le faateteleina o le fevaevaeai, sa talosagaina ai Kenneth Payne, o se tasi o le au peresitene o le matou siteki e fai sana saunoaga. Sa tulai o ia ma amata ona ta’u mai ia i matou e uiga i lona atalii o Brian, o le sa faamisiona i le Misiona a Iapani Tokyo i Matu. Ina ua faafeiloai e Peresitene Payne ma lona aiga ia Brian i le malaevaalele ina ua taliu mai o ia mai lana misiona ia Mati 2003, sa faasea o ia i le malō ma le tiga o lona auvae. I totonu o ni nai vaiaso, sa maua ai Brian i le gasegase o se ituaiga kanesa e ta’u o le non-Hodgkin’s lymphoma.
O se masina mulimuli ane sa ia amatalia ai se faasologa o togafitiga e faaaoga ai kemikolo ona sosoo ai lea ma togafitiga e faaaoga ai le leisa. Fai mai Peresitene Payne sa fuafuaina e fomai e fai se taotoga i le aso 22 o Setema e sui ai anoivi, ae na ona mavae lava o le aso muamua o lena masina, “ae amata loa ona oo le ma’i o Brian i se tulaga tuga.”
Sa faataotolia o ia i le falemai i le vaiaso lona lua o Setema. E oo atu i le taimi lena, ona o le natura ogaoga o le kanesa, na tonu ai i fomai ua fai si tuai tele mo se taotoga e sui ai anoivi. Sa aumai e le aiga ia Brian mai le falemai i le fale i le aso 21 o Setema. Na maliu o ia i le isi aso na sosoo ai.
“O le aso 22 o Setema o se aso faapitoa lea mo i matou ma lo’u aiga,” o le tala lea a Peresitene Payne. “O le aso lena matou te faifaimalie ai ma mafaufau ia Brian, i ana saofaga i lo matou aiga, ma lona tuuina atu o tausaga mulimuli e lua o lona olaga i le Alii ma i tagata Iapani, o e sa ia alofaina. Matou te misia lava o ia, ma o lena aso matou te tomanatu ai i lona olaga ma faamamalu mea matou te manatua e uiga ia te ia.”
Fai mai Peresitene Payne, mo i tatou uma lava, o le Aso Sa o le aso lena tatou te faifaimalie ai ma mafaufau ai.
“E faaavanoa o tatou taimi e o atu ai i a tatou sauniga lotu, aai ma feinu i le faamanatuga, faanoanoa ona o a tatou agasala, ma mafaufau loloto i le puapuagatia o le Faaola mo i tatou,” o lana saunoaga lea. “Tatou te auauna atu, tatou te alolofa atu, ma tatou te taumafai ia aua nei faalavelaveina i tatou e ni gaoioiga e faapea ona taofia ai i tatou mai le tapuai atu ia te Ia.”
Fai mai Peresitene Payne afai o gaoioiga i le Aso Sa e ogatasi ma le agaga, e mafai ona tatou maua lagona sa’o a o tatou faia ia gaoioiga. Ae afai e taofia ai i tatou mai le manatuaina o le Faaola ma le auauna atu i le Sapati e faapei ona ono auauna atu ai o Ia, ia atonu e tatau ona tatou toe mafaufau i a tatou filifiliga.
Ona ia alala loa lea i lalo ma e le’i toe gagana lava o ia. Sa le manaomia ona ia toe saunoa. Sa toe foi mai le Agaga i le potuaoga, ma sa matou faalologo uma lava.
Faamatalaga mai le Keriso i Ketesemane, saunia e Heinrich Hofmann, faaaloaloga a le C. Harrison Conroy Co.