O Le Tulafono o le Faatulagaga
O Jennifer Maddy e nofo i Iuta, ISA.
“O outou le fanau ia outou faalogo i o outou matua i mea uma; aua o le mea malie lea i le Alii” (Kolose 3:20).
Sa faataupupula atu Etana i faavaa felanulanuai o taaloga vitio sa laina i luga o fata. Sa fai atu ona matua e mafai ona ia filifilia se taaloga se tasi mo se meaalofa o le aso fanau, ma sa tele naua taaloga e filifili mai ai! Sa feosofai solo mata o Etana mai se taaloga miliga taavale i se taaloga o ni gaoioiga malie ma tulaga ese i se taaloga siva. Mulimuli ane, sa ia pikiina ai le taaloga miliga taavale ma avatu loa i lona tamā.
“Ua e maua le taaloga e te fiafia i ai?” O le fesili lea a Tama.
“Pei uma ua ou manao i le taaloga miliga taavale,” o le tala lea a Etana.
“E foliga mai e manaia ma malie,” o le tala lea a Tama. “Sa i ai se faailoga o lona tulaga lelei?”
Sa fuli a’e e Etana le isi itu o le faavaa. Sa ia iloaina e na o ni taaloga e i ai ni faatulagaga patino e mafai ona ia taalo ai. O le taimi muamua na maua ai lana komepiuta, sa talanoa atu ai ona matua ia te ia e uiga i le taua o le mulimuli i tulafono a le aiga e uiga i faatulagaga o taaloga vitio. Sa iloa e Etana o le tele o taaloga sa i ai ni mea leaga, ma sa manao o ia e usiusitai.
Sa maua e Etana le faatulagaga i le faavaa ma faaali atu ia Tama. “Ua faatulagaina mo tagata uma,” o lana tala lea.
“Lelei tele,” o le tala lea a Tama. “Ta o loa e totogi. Manuia lou aso fanau, Etana!”
“Faafetai, Tama!” sa ataata Etana, ma fiafia i le oo atu i le fale ma faataitai loa lana taaloga fou.
O ni nai aso na sosoo ane ai, sa alu ai Etana i le fale o lana uo o Chase e taalo ai. E i ai faatasi i laua ma Chase i le vasega e tasi o le Peraimeri, ma e tele lava ina la taaalo faatasi. Sa alu Etana ma ave lana taalogo vitio fou.
“Malo, Etana,” o le tala lea a Chase ina ua tatalaina le faitotoa. “Sau i totonu. E i ai la’u taaloga vitio fou e mafai ona ta taaalo ai!”
“Faapena foi au!” o le tala lea a Etana, ma faalala atu lana taaloga.
Sa saofafai le aualii i luma o le komepiuta, ma sa momono i totonu e Chase lana taaloga. Sa oso mai le igoa i luga o le lau, ma sa faapena foi ma le faatulagaga. E lei minoi Etana. Sa o se faatulagaga sa le faatagaina o ia e taalo ai.
Sa feosoosofai ma le naunautai ia Chase i faatonuga autu e faaaoga ai lana laau faatonutonu ma amata loa le taaloga. Sa le’i iloa atu i le taimi lena e Etana se mea leaga. Sa ia kilikiina lana laau faatonutonu e faafealuai ai lana faailo i le taaloga. Sa manaia, ae o le umi lava sa ia taalo ai, o le tele foi lena o lona lagonaina o le le toa lelei. Na te le’i vaaia lava se mea e leaga ai, ae sa manao o ia e mulimuli i le tulafono a lona aiga.
“Ei, Chase, e le faatagaina ona ou taalo i taaloga e i ai le faatulagaga lea,” o le fai atu ai lea a Etana.
“Oi, e le afaina,” o le tala lea a Chase. “E leai ni mea leaga e i ai i totonu.”
E te mo’i? na fesili atu ai Etana.
“Ioe,” na fai mai ai Chase. “E taaalo ai lo’u aiga. Ou te iloa na sese ona tuu i ai le faatulagaga lea.”
O le taimi foi lena, na falo mai ai le ulu o le tina o Chase i totonu o le potu. “Malo, alii,” o lana tala lea. “O lelei mea uma?”
Sa faafaigata ona folo le faua o Etana. “Malo, Sister Murphy,” o lana tala lea. “Pau lava le mea e le faatagaina a’u ona ou taalo i ni taaloga e i ai le faatulagaga lenei.”
“Sa ou fai atu i ai e leai se mea leaga e i ai i totonu,” o le tala lea a Chase.
Sa talo mai le lima o le tina o Chase. “Aua e te popole Etana,” sa ia fai mai ai. “Ou te iloa o le tele o taaloga e i ai le faatulagaga lena e le lelei, ae ou te mautinoa o le a faataga oe e lou tina e te taalo i le taaloga lenei.” Sa ataata o ia ma aluese atu ma le potu.
Sa faaauau pea ona taalo Chase, sa tuu i lalo e Etana lana laau faatonutonu. “Chase, ae a pe a ta taaalo i le taaloga miliga lea sa ou aumaia?” na fesili atu ai Etana.
Sa faamimigi tauau o Chase ma faaauau pea ona pulatoa atu i le lau. “Leai, e sili ai lo’u taalo i le taaloga lea.”
Sa tu malie ae ia Etana ma alu atu i le potu o Chase lea sa ia maua ai ni taavale tutuu meataalo ma taalo ai loa. Sa le malie tele e pei o lana taaloga vitio, ae sa maua e Etana le lagona lelei i le iloaina sa mulimuli o ia i le tulafono a lona aiga.
Ata na tusia e Bryan Beach