Faia o se Uo Fou

Saunia e Laura Potts, Illinois, ISA

Sa matou saofafai i se laulau e aai faatasi ma a’u uo ae ou matauina ai ua i ai se tamaitiiti fou e igoa ia Mikaele i le matou piliota o le malologa o le aoauli. Sa foliga mai na te le’i iloaina lelei se isi ae sa naunau e faia ni uo fou. Sa ia filifili e saofafai faatasi ma se vaega o tama e matutua atu, o e sa faafoliga e pei o ni ana uo mo sina taimi ae sa iu ane ina latou faia o ia ma mea ula. Sa faauau lava ona latou taufaalili ia te ia seia oo lava ina amata ona tagi o ia. Sa ou vaai atu o tupu lenei mea, ma sa matuai faalavelave mai lava ia te a’u. Sa ou iloaina mulimuli ane o Mikaele e maua i le mai e tau faaletonu ai lona mafaufau.

Sa tonu loa o le a ou fesili atu ia Mikaele pe fia nofo faatasi ma i matou ma a’u uo. Sa fai mai o ia e leai, atonu ona o lona fefe ina nei toe ula atu tagata ia te ia. Sa tonu ia te ia e sili ai lona nofo na o ia.

O le isi aso na sosoo ai, sa ou alu atu ai ia te ia ma faailoa atu o ia i a’u uo. Sa mafai ona ou iloaina sa fiafia o ia i lo’u le tuulafoaia o ia, ma sa amata ona matou talanoa. Sa ou iloaina o ia o se tagata e lelei tele i le taaloga o le ekisi[x]-ma le-lio[o]. E toetoe lava a le mafai ona faatoilaloina o ia. Sa ou iloaina foi e tulagaese lona atamai. Na te iloaina uma lava peresitene o le I.S. ma e mafai ona ia tauina atu tausaga sa avea ai i latou ma peresitene. E maoae tele o ia, ae sa le toatele ni tagata sa mananao e vaai i tua at o lona le atoatoa. O nisi o isi tamaiti aoga sa ula mai ia te au ona o le ma saofafai faatasi ma ia, ae ou te lei faatagaina na mea e faalavelave ia te a’u. Sa ou fiafia ma te tafafao ma Mikaele.

O aso taitasi a o ma fetaui mo le malologa, sa ou iloaina sa faasolo ina avea Mikaele ma se tagata fiafia lava. E tulimatai o ia i malologa i aso uma, ma sa faapena foi a’u. O le mea sa ou faapea sa na o se faatinoga o le auauna atu o le mea moni o le amataga lea o se faauoga matagofie.