Tulaga Faatonuina mo Vaitau Uma
O Lori Fuller e nofo i Iuta, ISA.
Ua faasoa mai e talavou matutua e toalima le ala na taialaina ai i latou i faataitaiga o le usiusitai mai le Tusi a Mamona a o latou faia filifiliga i le va o le sao ma le sese.
I le amataga o le matou aoaoga faaletalalelei, sa aoaoina ai i matou ia iloa le sa’o mai le sese. Sa matou aoaoina o filifiliga e i ai taunuuga, o le usiusitai e aumai ai faamanuiaga, ma o filifiliga amiotonu e avatu ai tatou e latalata atili atu i le Atua. A o matou talavou sa matou maua ai le tamaitusi Mo le Malosi o le Autalavou, lea e ta’u manino mai ai tulaga faatonuina e ola ai i le talalelei.
Ae o nisi taimi mo le autalavou matutua o e o loo tauivi e ola i le lalolagi ae le o le lalolagi (tagai i le Ioane 17:14), atonu o filifiliga ma tulaga faatonuina ua le o toe tutusa le manino. Atonu e foliga mai o loo i ai se tulaga lautele i le ogatotonu e filifili mai ai, o se eria nenefu tele i le va o le sa’o ma le sese.
E ui o filifiliga e foliga mai e sili atu le faigata pe a faasolo ina tatou matutua, e tumau lava le faatatauga o na tulaga faatonuina e pei ona sa i ai a o tatou laiti. O le mataupu faavae o le usiusitai e tumau lava. O le filifili ia usiusitai i le taimi nei e tutusa lava le taua e pei ona sa i ai lava. A o tatou feagai ma faiga faaiuga, o mataupu faavae mai le Tusi a Mamona—lea sa tusia mo o tatou aso—e mafai ona taialaina i tatou e fai ia filifiliga e sili ona lelei ma faamanatu mai ia i tatou o faamanuiaga silisili e oo mai mai le usiusitai atoatoa. I le tusiga lenei, ua faaali mai ai e ni talavou matutua se toalima ni manatu i auala o loo latou faaaoagaina ai nei mataupu faavae.
O Le Usiusitai Tatou Te Latalata Atili Ai i le Atua
“O le a se mea ou te faia ina ia mafai ai ona fanauina au i la le Atua, … ina ia mafai ona faatumuina a’u i le olioli, ina ia le mafai ona lafoaia ese o a’u i le aso gataaga? … o le a ou lafoai ese au agasala uma ina ia ou iloa [le Atua]” (Alema 22:15, 18).
Ina ua faalogo le tama o le Tupu o Lamonae i le afioga a le Atua, sa naunau loa o ia e lafoai ese uma ana agasala ina ia iloa o Ia. A o ia aoao e uiga i tulaga faatonuina a le Alii, sa naunau loa o ia e tausia ina ia mafai ona ola latalata atu i le Atua. Faatasi ai ma isi tagata Aneti-Nifae-Liae, sa ia osia ma tausia ana feagaiga ma le Tama Faalelagi ma sa “le’i pauu ese lava” (Alema 23:6).
O le mataupu faavae o le usiusitai o loo faapena foi ona tumau moni lava i olaga o le autalavou matutua i aso nei. E pei ona faamalamalama mai e Vijay Patha o Initia, “O le usiusitai tatou te latalata atili atu ai i le Atua. E aumai ai le filemu o le mafaufau, faatuatua, fiafia, alofa, ma le manatu o le a lelei mea uma. E leai lava se isi auala e maua ai nei mea ae e ala mai i le talalelei.
Sa faaauau lana faamatalaga, “A tulai mai filifiliga faigata, e mafai e le Agaga Paia ona taitaia i tatou. Pe afai e le i ai ni tuaoi, ua tatou i ai i le tulaga matautia faateleina o le pauu ese. O le tausia o a’u feagaiga e tuuina mai ai ia te au ni tuaoi. O nei tuaoi e puipuia ai a’u mai le pau ese atu i auala e le mailoa ma ua fesoasoani ia te au i le tele o taimi e fai ai ma sui o Keriso ae aloese mai le faia o mea e pei o le faaaogaina o gagana mataga. O le faataatitiaina o tuaoi e aumai ai le mafaufau manino.”
O Le A Fesoasoani le Atua ia i Tatou ia Usiusitai
“O le a ou alu ma fai mea ua poloaiina e le Atua, aua ua ou iloa e le tuuina mai e le Alii ni poloaiga i le fanauga a tagata, vagana o le a saunia e ia se ala mo i latou ina ia mafai ai ona latou faataunuuina o le mea ua ia poloaiina ai i latou” (1 Nifae 3:7).
O nisi taimi e foliga ai e faigata ona mulimuli i poloaiga, ae ua folafola mai e le Tama Faalelagi o le a Ia saunia se ala mo i tatou e usitai ai. E pei o Nifae, o le au talavou matutua o e naunau ia faamaoni e mafai ona liliu atu i le Tama Faalelagi e maua mai ai le malosiaga ma le gafatia e usiusitai ai. Ua faamatala mai e Duncan Purser o Egelani le auala na tupu ai lenei mea ia te ia:
“O le sefuluai o se poloaiga faatasi ma ni tuaoi ua faataatitiaina: tatou te totogia le 10 pasene o mea tatou te maua. Ae o le taulaga anapogi ua tuuina mai ia i tatou se tulaga sili atu o le fetuutuunai i lo tatou usiusitai.
“A o ou faaputuina se tupe mo lo’u pili i le iunivesite, sa avea le manatu o le totogiina o le taulaga anapogi o se luitau ia te a’u. Sa matuai faigata lava ia te a’u i Aso Sa anapogi le taumafai e filifili pe tatau ona totogi [la’u taulaga anapogi] ae pe fia foi se aofaiga e maua ai se taulaga ‘limafoai’. Ou te liliu atu i le tatalo, ma e le gata ina sa musuia au i taimi uma e totogi taulaga anapogi, ae sa ou lagonaina foi se manao faateleina e fai o lea.
“Ua ou iloa e faamanuia e le Alii i latou o e tausia lenei poloaiga, ma a o ou usiusitai, e le faapea lava ua aunoa au ma ni mea e manaomia o le olaga. A o tatou ola i le talalelei, tausi poloaiga, ma iloa o i tatou o ni faataitaiga i tagata e siomia i tatou, o le a faapea ona faateleina lo tatou mananao e avea ma se tagata e sili atu ona lelei, ma o le a faaali mai e le Alii ia i tatou mea e ao ona tatou faia.
“Ua tuuina mai e le Alii ia i tatou ia tulaga faatonuina mo lo tatou manuia. E mafai ona tatou filifili po o le a le maualuga tatou te ola ai i nei tulaga faatonuina ma pe o le a suia foi i tatou e lo tatou usiusitai pe leai. I lo’u aafiaga, ua ou vaaia le oo mai o faamanuiaga a o ou mulimuli i uunaiga a le Agaga.”
E Finagalo le Alii ina Ia Tatou Usitai ma le Sa’o Atoatoa
“Sa latou usiusitai ma tausisi e fai upu uma o poloaiga ma le sao atoatoa; ioe, ma sa faia ia te i latou e tusa ma lo latou faatuatua” (Alema 57:21).
O le taumafai e usiusitai a’ia’i, e pei ona sa faia e le autau o fitafita talavou, o le a fesoasoani ai i soo o Iesu Keriso ia latou faapei o Ia. Peitai ua silafia lelei e lo tatou Faaola ma le Tama Faalelagi e leai se tasi e atoatoa. Mo taimi tatou te le atoatoa ai, ua Laua saunia se ala mo i tatou e salamo ai ma taumafai ia sili atu le lelei.
“Sa mamulu atu ma a’u le tamaitai sa ou faamemelo i ai ona sa ma solia le tulafono o le le gaoia—sa na o sina faatinoga laitiiti,” o le tala lea a Taila (ua suia le igoa). “Peitai o le solia o le tulafono o le le gaoia i ‘sina faatinoga laitiiti’ o le solia lava lea o le tulafono o le le gaoia. Sa fai lava ma ou misia ia faamanuiaga taua o le usiusitai; sa ou manao e i ai le Agaga i lo’u olaga.
“Ou te le’i manao e fai soo se mea laitiiti lea e manatu tagata e le afaina ‘pe afai tatou te le tau vaaia ai le epikopo.’ Sa ou manao e 100 pasene i le tausiga o le tulafono. Peitai o la’u filifiliga ina ia ou usiusitai sa fai lava si tuai mo le sefeina o le ma mafutaga; sa faaleagaina e le solia o le tulafono o le le gaoia.
“O le tulafono o le le gaoia ua i ai iina mo lo tatou puipuiga. E le o se tapulaa i lo tatou alofa. Ae, o le auala mulimuli lava lea o le faaali atu o lo tatou alofa. O le tausia o le le gaoia, tatou te fai atu ai, ‘Ou te alofa tele ia te oe e faaaloalo ai ia te oe ma tausi ai poloaiga a le Atua. Ou te alofa tele ia te oe e faatumauina ai le faatotonugalemu o Keriso i o taua olaga.’
“I le avea ai ma ni talavou nofofua matutua, tatou te taofimau foi i tulaga faatonuina o loo i le Mo le Malosi o le Autalavou. O le tulafono o le le gaoia e faatatau i tagata uma lava, e le afaina po o le a lou matua po o lou tulaga. Ou te faafetai mo lenei molimau fou ua ou mauaina aua o le a fesoasoani ia te au e faalatalata atili atu ai i le Faaola ma i la’u soa e faavavau pe a ou maua o ia.”
O Le Usiusitai A’ia’i e Taofia Ai i Tatou mai Tulaga Lamatia
“Ma sa oo ina ua maua e Leoneti le savali, sa fefe o ia e alu ifo i lalo i vae o le mauga. … Ma sa oo ina ua iloa e Amalekia ua le mafai ona ia faia ia sau Leoneti i lalo mai le mauga, sa ia alu ae i luga o le mauga” (Alema 47:11–12).
Sa naunau lava Leoneti e taofi mau i ona tulaga. Ae sa ia filifili o le alu ifo laitiiti i lalo, e faafetaui lona fili, o le a le afaina lea. E ui lava ina sa mautinoa e Leoneti o ia sa faafoea [le feiloaiga], ae sa amata ona “avatu [e Amalekia] fuafua vai ona” (Alema 47:18) seia oo ina oti ai Leoneti, atonu sa le’i iloaina le tulaga lamatia seia oo lava ina ua tuai tele.
Ua faamatala mai e Claudia R. o Colorado, ISA, le ala sa ia tausisia ai ona tulaga faatonuina:
“Ou te lagona e pei ua see atu le lalolagi i se itu puaoa. Mo se faataitaiga, o le a fai mai tagata e uiga i le ava malosi, ‘E te le oti i se miti se tasi.’ O lena ituaiga alofaga o le mea moni o lou taalo o oe lava faalemafaufau. Ma o tulaga faapena—o tulaga e foliga mai e leai se leaga—e sue moni ai lava le faitalia.
“O lea e tatau ai ona e iloa ona taofi, ia e ta mau. O nisi tagata e avea le mea sa amata atu o se tulaga puaoa, ma iu ai ina avea lena tulaga puaoa ma se tulaga pogisa. Ia ona e mau ai lea.
“Sa ma o ma se tasi o tagata i ni tafoaga faamasani malie, ae i se tasi taimi sa ma nofonofo ai na o maua i totonu o le taavale i le pogisa, ma sa ia taumafai ai e fai se gaoioiga ia te a’u. Sa ou iloaina o le mea sa ia manao e fai o le a oo atu ai i isi tulaga. Sa ou le faatagaina lena mea e tupu, o lea sa ou oso ai i fafo mai le taavale.
“I le avea ai ma talavou nofofua matutua, a i ai se mea e le ogatasi ma o tatou tulaga faatonuina, e tatau ona tatou tumau mausali [i le tulaga faatonuina]. I tafaoga faamasani, ioe, e te manao e uu lima, feopoai, ma feasogi. Peitai e manao Satani e faasese i tatou i le mafaufau faapea o le tulafono o le le gaoia o se tulaga puaoa lea e leai se afaina o i ai i le usitaia o se vasega.
“Ua tatau ona sili atu le mausali o o tatou tulaga faatonuina mai lo se isi lava taimi. E tatau ona tatou faia ia faaiuga a o le’i tulai mai ni filifiliga faigata. E tatau ona tatou tetee malosi atu pe vaaia ni mea sese. Ua ou iloa e le faigofie lo tatou lalolagi; ua tele naua mea o loo tutupu. Ae ua tuuina mai ia i tatou e perofeta ma aposetolo ia tulaga faatonuina ma taiala. O loo ou tauaveina se lomiga e ofi i le atotupe o le Mo le Malosi o le Autalavou, ma e fesoasoani ia te a’u i taimi faigata.”
E Mafai Ona Tatou Usiusitai Pe Afai E Le O Usiusitai Isi Tagata o Siomiaina i Tatou
“Afai e le i ai ia i latou le alofa mama e le afaina i lea mea ia te oe, sa e faamaoni; o le mea lea, o le a faamamaina ou ofu” (Eteru 12:37).
Ina ua tatalo Moronae ina ia faamanuia i tagata Nuuese o le lumanai, sa ta’u atu e le Alii ia te ia lea mea sa sili ona taua o le, sa tumau faamaoni o ia. E le faafaigofieina e le lalolagi le ola ai o talavou nofofua matutua faamaoni i o latou tulaga faatonuina. Ae e tusa lava pe filifili e isi se isi ala, e mafai lava ona [tatou] filifilia se auala e maualuga atu.
E pei foi o le toatele o isi talavou matutua, na oo Victor Kim o Korea i Saute i ni tulaga lea sa le tutusa ai ona tulaga faatonuina ma tulaga o isi tagata:
“O nisi taimi i le galuega, matou te o ai o se vaega ma le matou aufaigaluega e aai, ma o taimi uma lava e inu pia ai. Sa tele le tauanauina o a’u ia ou auai i le inuga, sa le faigofie le fai atu i tagata uma e leai. O taimi uma sa ou faamautinoa ai lava ia latou iloa muamua ou te le inupia. Ae e tusa lava, sa tatau ona ou malosi ma faaali atu lo’u to’a i totonu o o’u siosiomaga.
“I lo’u aafiaga, o i latou o e e le manino lo latou iloaina o tuaoi, e mafai ona faamalieina, ma e mafai ona iu ai ina faatalitonuina i latou lava e faapea o sina agasala itiiti ua le afaina lea. E oo ina mafai ona latou le lagonaina le Agaga ma le toe mafai ai ona iloa le mea e sese ma le mafuaaga e sese ai.
“O faatosinaga a lau tupulaga e mafai foi ona malosi tele. O i latou e le o malolosi e ono iu ai ina auai i totonu aua e foliga mai o faamatalaga e fai mai e a latou uo e foliga talafeagai, e ui lava e le fetaui ma o tatou tulaga faatonuina. Ae e leai se mea faaafaafa. O le faaiuga, e tatau lava ona e filifili.
“Ina ia tumau le malosi, e fesoasoani le i ai o se uo lelei e mafai ona talanoa atu le tasi i le isi ma faalagolago atu le tasi i le isi. O lena faiga e mafai ai ona oulua tutumau malosi. A ou tausia o’u tulaga faatonuina, ou te lagona le saogalemu. Ou te agavaa e ole atu i le Atua e puipui mai a’u. Ou te faatuatua afai ou te usiusitai, o le a Ia fesoasoani mai ia te a’u.”
O loo aoao mai i le Tusi a Mamona ia mataupu faavae o le usiusitai e mafai ona fesoasoani ia i tatou e pipii mau ai i le ai uamea a o tatou feagai ma faiga filifiliga.
Ata na tusia e Howard Lyon