O Mea e Sili ona Taua
“Ua ou iloaina o soifua lou Tama, ma Ia alofa ia te a’u. Le Agaga e tau mai. Le Agaga e tau mai.” (“Ua Ou Iloa o Soifua Lo’u Tama,” Tusipese a Tamaiti, 8.)
O le vasega lima sa o se tausaga faigata lea ia te a’u. Sa i ai lava a’u uo masani mo le tele o tausaga aoga, ma sa ou faapea o le a matou faauo ai pea lava. Ae e le’i leva ona amata le vasega lima, ae amata ona faaaoga e a’u uo ia gagana leaga ma faia ni amioga sa ou iloaina e le fiafia i ai le Tama Faalelagi. Sa amata foi ona latou agaleaga atu i isi tamaiti o le matou vasega ma fai tala e uiga i isi tagata.
Mulimuli ane, sa oo ina avea au ma se tasi o na tamaiti sa taufaalilili i ai a’u uo. Sa iu lava foi ina latou faaigoaina au i se igoa tauvalaau e le manaia o: Salote Laugutu Mafia, po o le “SLM” pe a faapuupuu. Sa matuai ou tiga ai lava. Sa amata ona ou taumafai e aloaloese mai a’u uo i le aoga, ae sa faigata aua sa matou i ai lava i le vasega e tasi.
“Malo, suga!” na ou fai atu ai i se tasi o aso i le malologa, ma taumafai ia ou faauo atu ma foliga fiafia.
“Malo, SLM! Salote Laugutu Mafia!” o le latou valaau faatasi mai ma fai mai o latou foliga taufaalilili ia te a’u.
Sa ou tamoe ese, ma taumafai e taofiofi lo’u loimata. Sa ai na o au lau meaai ma faitau minute ou te alu ai i le fale.
“O le a le mea o tupu, lau pele?” o le fesili lea a Tina ina ua ia iloaina mai o’u alafau loimata ina ua tuua le aoga.
“O tamaiti ia sa masani ona avea ma a’u uo ua amata ona latou valaauina au i se igoa le manaia. Ua ou le malamalama pe aisea latou te agaleaga mai ai ia te au.” Sa amata ona ou toe tagi.
“E le tatau i tamaiti na ona faia na ituaiga amioga. Ae o le mea moni e le afaina po o a manatu o tagata e uiga ia te oe. E te aulelei, ma e leai se mafuaaga e te faalogo ai fua i tala e fai mai e na tamaiti le alolofa.”
“Ae Tina,” o lau tala lea. “Ou te vaai i aso uma ia i latou. Ou te ano i o latou manatu e uiga ia te a’u. Ma e faalogo foi i ai isi tagata i a latou tala e fai e uiga ia te a’u. E faapefea ona ou le amanaiaina tagata uma?”
“Salote, na pau lava manatu e sili atu ona taua o ou lava manatu ma le Alii. Afai o loo e lagonaina le fiafia ia te oe lava ma mea e te faia, ma afai e fiafia le Tama Faalelagi i au filifiliga, ona le afaina lea o igoa e valaau ai oe e tagata po o a latou tala e fai e uiga ia te oe. O la’u tala mo’i lava.
A o ou alu atu i le aoga i nai isi vaiaso na sosoo ai, sa talie mai lava a’u uo ia te a’u ma ula mai ia te a’u. Ae sa le’i umi ae ou iloaina e mafai lava ona ou fealuai solo ma le toafilemu i lo’u loto. Sa ou iloaina afai sa le afaina i le Tama Faalelagi o’u laugutu mafiafia, e mafai foi la ona ou faapena.
Sa mafai ona ou aoga pea seia oo i le faaiuga o le tausaga lima. Sa iu ina ou faia ni uo fou o e sa le’i ula ia te a’u ma o e sa fesoasoani foi ia ou maua lagona lelei e uiga ia te a’u lava. Ae o le mea na aupito taua, sa ou aoaoina ai afai e fiafia le Tama Faalelagi i le ituaiga tagata ua ou i ai, ou te le tau popole fua lava la i manatu o se isi lava tagata.O Charlotte Wood Wilson e nofo i Oregon, ISA.
O Salote i le vasega lima …
ma i le aso o lana faaipoipoga.
Ata na tusia e Shawna J. C. Tenney; lalo: ata mai faaaloaloga a Charlotte Wood Wilson