Pe Sa Faatatau Taiala ia te A’u?
Julie Letner, Arisona, ISA
O le filifili ia ou tauagafau sa faigofie lava ia te a’u. Sa ou ola ae i se aiga sa maualuluga lava ia tulaga faatonuina, ma ina ua ou faaipoipo i le malumalu, o o’u ofusa sa faamanatu mai ai ia te a’u ia ou faia ni lavalava tauagafau.
Ae peitai, o le faatauga o se ofutaele, sa iu ina avea ma se mea sa faigata ia te a’u. E aunoa ma le taiala a ofusa, sa iu ina ou manao ai e ofu ni ofutaele ou te matamuli ai pe afai e vaai i ai se tagata ou te iloaina o o’u ofuina.
Sa ma fuafua ma lo’u toalua ma te o i se tietiega vaa e tafafao ai mo na o maua lava e toalua. Sa ou faapea o le tietiega vaa e tafafao ai o le taimi lelei lava lea e ofu ai sea ituaiga ofutaele. O le a ou le vaai ai i se tagata ou te masani ai, ma o lea o le a ou le lagonaina ai le tausalaina. O le a leai se isi e iloaina o a’u o se Au Paia o Aso e Gata Ai, ma atonu foi o le a faapea uma lava ofutaele o isi tamaitai i luga o le vaa.
Ona ua ou faaipoipo, sa leai ai se mafuaaga moni mo a’u e fai ai se ofutaele tauagafau, ia po o lo’u manatu lena. O taiala o le tauagafau sa mo na o le tupulaga, a ea? Ae sa i ai se lagona sa faalavelave mai i tua o lo’u mafaufau. Sa ou faaipoipo i le malumalu. Na ou ausia la’u sini ia tumau lo’u agavaa ma ia maua se toalua agavaa. Ma sa ou manao ia faaauau pea ona ou filifilia le mea sa’o.
Sa tonu ia te a’u e vaai i le “Ofu ma Foliga Vaaia” i le Mo le Malosi o le Autalavou. Na fai si leva ou te le’i toe iloiloina le tamaitusi, o lea sa matuai aafia lava au i nei upu: “O ou ofu ma foliga vaaia, e mafai ona e faaali ai le taua o lou tino. E mafai ona e faaali atu o oe o se soo o Iesu Keriso ma e te alofa ia te Ia” ([2011], 6).
Sa tatagi pea lava pea na upu i lo’u mafaufau. Pe o a’u ea o se soo o Iesu Keriso? Pe sa ou naunau ia ou faamaoni i taimi uma ma i nofoaga uma (tagai i le Mosaea 18:9)?
Talu mai lena taimi ua ou filifili ai e tusa lava pe ua 20 ma ona tupu o’u tausaga, e ao lava ona ou faatumauina ia mataupu faavae sa ou aoaoina i lo’u talavou. O na mataupu faavae o loo faatatau pea lava ia te a’u. Ou te manao e avea ma se faataitaiga lelei i la’u fanau. Ou te manao ia latou iloa o a’u o se soo o Iesu Keriso.