O Mea E Pei Ona I Ai Lava
Mai se lauga i le faeasaite a le Ofisa o Aoga a le Ekalesia na tuuina atu i le Iunivesite a Polika Iaga–Idaho i le aso 3 Me, 2009.
Ou te tuuina atu se leo o le lapataiga faaaposetolo e uiga i aafiaga tatou te ono mu ai, momole ai, taofiofia ai, ma omia ai i nisi o fesootaiga faaeletonika ma aafiaga i o tatou agaga.
A o ou tulimatai ma tapenapena mo lenei avanoa tatou te aoao faatasi ai, sa iu ina ou malamalama lelei ai i lagona malolosi o Iakopo, le uso o Nifae. Fai mai o ia, “A o le aso ua sili ona mafatia ai au … i le manao ma le popole tele ona o le manuia o outou agaga” (Iakopo 2:3). O le savali ou te fia faasoa atu ia te outou i le aso ua leva ona oo malie mai i lo’u “agaga e pei o le sau mai le lagi” (MFF 121:45). Ou te talosagaina ia outou uai faamaoni mai i se mataupu ogaoga e i ai ni ona taunuuga i le taimi nei ma i le faavavau. Ou te tatalo ina ia faatasi mai le Agaga Paia ia i tatou ma aoao mai ia i tatou taitoatasi i lenei taimi ua tatou mafuta ai.
Ua leva ona faagaeetiaina au i le uiga faigofie ma le manino o le upu moni ua ta’u mai i le Tusi a Mamona: “E tautala mai le Agaga i le upu moni, ae le pepelo lava. O lea, e fai mai ai mea e pei ona i ai lava, o mea foi e pei lava ona oo mai; o lea ua faaali tino ai nei mea ia te i tatou ina ia ola ai o tatou agaga” (Iakopo 4:13; tagai foi i le MFF 93:24).
O le a tatou taulai atu i le vaega autu muamua o le upu moni ua ta’u mai i le fuaiupu lenei: “o mea e pei ona i ai lava.” O le a tatou iloiloina muamua ni vaega autu o le fuafuaga o le fiafia o lo tatou Tama Faalelagi e avea ma aoaoga faavae mo le iloaina ma le malamalama i mea e pei ona i ai lava. Ona tatou matauina ai lea o auala o osofaiga o loo faaaogaina e le fili e faasalaveia ai i tatou pe taofiofia ai lo tatou gafatia e iloatino ai mea e pei ona i ai lava. Ma le mea mulimuli, o le a tatou talanoaina tiutetauave ua i o outou luga i le avea ai ma tupulaga faiae. O le a manaomia lo outou usiusitai, ia faamamalu i feagaiga paia, ma ia iloatino mea i le ala tonu e pei ona i ai lava i le lalolagi i aso nei, lea ua faateteleina le le mautonu ma le amioleaga.
O Lo Tatou Taunuuga Paia
I le “O Le Aiga: O Se Folafolaga i le Lalolagi,” ua tautino mai ai e le Au Peresitene Sili ma le Au Fono a Aposetolo e Toasefululua e faapea, o le avea ai o ni atalii ma ni afafine o le Atua ua tatou “talia Lana fuafuaga e mafai ai e Lana fanau ona maua ni tino faaletino ma le tomai faalelalolagi latou te maua ai le atoatoaga ma iloa tino ai [o tatou] taunuuga paia o ni suli o le ola e faavavau.”1 Faamolemole ia matau le taua sili o le mauaina o se tino faaletino i le faagasologa o le agai atu i lo tatou taunuuga paia.
Na aoao mai ma le manino e le Perofeta o Iosefa Samita le taua o o tatou tino faaletino:
“Ua tatou o mai i lenei lalolagi ina ia tatou maua ni tino ma tuuina atu ma le mama i luma o le Atua i le malo selesitila. O le mataupu faavae sili o le fiafia e aofia ai le i ai o se tino. O le tiapolo e leai se tino, o lona faasalaga lena. E fiafia o ia pe a mafai ona ia mauaina le tino o le tagata, ma ina ua tuliesea e le Faaola sa ia talosaga ina ia ulu atu i le lafu puaa, ua faaalia ai ua sili atu ia te ia le tino o se puaa nai lo le leai o se tino. O tagata uma e fai tino e i ai le mana e pulea ai i latou o e leai ni tino. …
“E leai se mana o le tiapolo ia i tatou, sei vagana lava ua tatou faatagaina o ia; o le taimi lava tatou te fouvale ai i soo se mea e mai le Atua, o le a pule ai loa le tiapolo.”2
O o tatou tino faaletino ua mafai ai ona tatou maua se aafiaga lautele, loloto, ma malosi lea e le mafai ona maua i o tatou tofi i le muai olaga. Na aoao mai Peresitene Boyd K. Packer, o le Peresitene o le Korama a Aposetolo e Toasefululua, “O o tatou agaga ma o tatou tino ua tuufaatasia i se auala e avea ai o tatou tino o se meafaigaluega ae o o tatou mafaufau o se faavae o o tatou uiga.”3 O lea la, o a tatou mafutaga ma isi tagata, o le a mafai ai ona tatou iloa ma gaoioi e tusa ai ma le upu moni, ma o o tatou tomai e usitai ai i mataupu faavae ma sauniga o le talalelei a Iesu Keriso e faateleina ona o o tatou tino faaletino. I le potuaoga o le olaga i le tino, tatou te lagonaina ai le agamalu, alofa, agalelei, fiafia, faanoanoa, lē fiafia, tiga, e oo foi i luitau o le tapulaa o le malosi faaletino i auala e saunia ai i tatou mo le faavavau. I se faaupuga faigofie, e i ai lesona e ao ona tatou aoaoina ma aafiaga e tatau ona tatou maua, e pei ona faamatala mai e tusitusiga paia, “e tusa ma le faaletino” (1 Nifae 19:6; Alema 7:12–13).
E le o aunoa ona aoao mai aposetolo ma perofeta i le taua faaletino ma le faavavau o o tatou tino. Na tautino mai e Paulo:
“Tou te le iloa ea o le malumalu outou o le Atua, o loo nofo foi le Agaga o le Atua i totonu ia te outou?
“Afai e faaleaga e se tasi le malumalu o le Atua, e faaleagaina lena tagata e le Atua; aua e paia le malumalu o le Atua, o outou lava ia” (1 Korinito 3:16–17).
Ma i lenei tisipenisione ua faaali mai ai e le Alii e faapea: “O le agaga ma le tino o le ola atoatoa lea o le tagata”MFF 88:15). O se upu moni e matua moni lava ma o le a tumau pea le moni o le, o le tino ma le agaga ua fatuina ai o tatou tulaga moni ma le faasinomaga. A le mavaevae le sootaga o le tino ma le agaga, e mafai ona tatou maua le atoatoa o le olioli; ae a mavaevae, e le mafai ona tatou maua se atoaga o le olioli (tagai MFF 93:33–34).
O le fuafuaga a le Tama ua fuafuaina e tuuina mai ai le taitaiga mo Lana fanau, e fesoasoani ia latou maua le fiafia, ma ia aumai ai i latou ma le saogalemu ia te Ia ma ni tino toetutu, ma faaeaina. O loo galue Lusifelo e faafememeai ma ia lē fiafia atalii ma afafine o le Atua ma ia faasalaveia lo latou alualu i luma e faavavau. O faamoemoega soonafai a le tama o pepelo ia tatou malaia uma “e pei o ia lava” (2 Nifae 2:27), ma e galue o ia e mimilo vaega o le fuafuaga a le Tama lea e sili ona inoino i ai.
O Satani e leai sona tino, ma ua muta lona alualu i luma e faavavau. E pei lava o le vai e tafe ae taofia i se punivai, ua faapea foi ona taofia le alualu i luma e faavavau o le fili ona e leai sona tino faaletino. Ona o lona fouvale, ua teenaina ai e Lusifelo mo ia lava ia faamanuiaga uma ma aafiaga faaletino e mafai ona maua i se tino o aano ma ivi. E le mafai ona ia aoaoina lesona ia e na o agaga ua faaofuina i tino e mafai ona aoaoina. E le mafai ona faaipoipo pe olioli i faamanuiaga o mana o le foafoaga ma le olaga faaleaiga. E le mafai ona ia tatalia le moni o le toetutu o tagata ola uma. O se tasi o faauigaga malosi faaletusi paia o le upu malaia o loo faaalia i lona le mafaia lea ona faaauau e atiina ae ma avea e pei o lo tatou Tama Faalelagi.
Talu ai o se tino faaletino e matua totonugalemu i le fuafuaga o le fiafia a le Tama faapea ma lo tatou atina’ega faaleagaga, o lea e le tatau ai ona tatou tetei i le taumafai o Lusifelo e faalavelave i lo tatou alualu i luma e ala i le faaosoosoina o i tatou e faaaoga sese o tatou tino. O se tasi o mea ua iloagofie o le faavavau, o le fili o lē ua matua faanoanoa lava ona ua leai sona tino faaletino, na te valaaulia ma faatosinaina i tatou ia tatou faanoanoa faatasi e ala i le le faaaogaina sa’o o o tatou tino. O le meafaigaluega tonu lava lea e le maua ia te ia ma e le mafai ona ia faaaogaina ua avea ma faamoemoega autu o ana taumafaiga e toso atu i tatou i le faatafunaga faaleagaga.
O Osofaiga a le Fili
E taumafai le fili e faatosina i tatou ia faaaoga sese o tatou tino faaletino ma ia faaitiitia le taua o o tatou tino. O nei auala e lua o osofaiga e taua ona tatou iloa ma tetee atu i ai.
A faaaoga sese e soo se tasi o le fanau a le Tama Faalelagi o latou tino faaletino e ala i le solia o le tulafono o le legavia, e ala i le faaaogaina o fualaau faasaina ma vailaau e fai ma mausa, e ala i le faaleagaina po o le fai faatautala o i latou lava, po o le tapuai i atua sese o faatusa o le tino, e tusa lava po o o latou lava tino po o tino o isi, ua fiafia foi Satani. Mo i tatou e iloa ma malamalama i le ata o le faaolataga, so o se faatautala lava o le tino o le tetee atu lea ma lē taliaina lo tatou faasinomaga moni o ni atalii ma afafine o le Atua (tagai Mosaea 2:36–37; MFF 64:34–35).
O lenei uso e ma tuafafine, e le mafai ona ou tauina atu ia te outou auala uma lava tou te ono faaaoga sese ai o outou tino, “aua ua tele ala ma togafiti eseese, e faapea ona tele ou te le mafai ona faitau ai” Mosaea 4:29). Ua outou iloa le mea e sao ma le mea e sese, ma ua ia te oe e toatasi le tiutetauave o le aoao mo oe lava “i le suesue ma le faatuatua” (MFF 88:118) i mea e tatau ma mea e le tatau ona outou faia ma mafuaaga faaaoaoga faavae e tatau pe le tatau ai ona outou faia na mea. Ou te molimau atu ao outou mananao e aoao, ia “leoleo ia te outou lava, ma o outou manatu, ma a outou upu, ma a outou galuega, ma tausi i poloaiga a le Atua, ma tutumau i le faatuatua i mea ua outou faalogoina e uiga i le afio mai o lo tatou Alii, e oo lava i le iuga o o outou olaga” (Mosaea 4:30), o le a faamalamalamaina faaleagaga ma puipuia outou. Ma e tusa ai ma lou faamaoni ma le filiga, o le a e maua le mana e iloatino ai faiga taufaasese ma tetee atu ai i osofaiga a le fili a o ia faaosoosoina oe e faaaoga sese lou tino faaletino.
E taumafai foi Satani e faatosina ia atalii ma afafine o le Atua ina ia taufaatauvaaina le taua o o latou tino faaletino. O lenei ituaiga osofaiga e sili ona faatiapolo ma maaleale. Ou te fia tuuina atu ni nai faataitaiga o auala e mafai ai e le fili ona faalotomalie ma faamoe i tatou i se lagona o le saogalemu i la le tino (tagai 2 Nifae 28:21) ma uunaia i tatou e tuu i se tulaga e lamatia ai ia aafiaga faalelalolagi tatou te aoao ai lea na mafua ai ona tatou alalaga i le olioli i le muai olaga (tagai Iopu 38:7).
Mo se faataitaiga, e mafai ona maua e i tatou uma le olioli i le anoanoai ma le eseese o gaoioiga lelei, malie, ma le manaia. Ae tatou te tuuitiitia le taua o o tatou tino ma lamatia o tatou manuia faaletino e ala i le o atu i tuaoi e le masani ai ma le matautia e saili ai ni “lagona” e malolosi atu ma sili atu le faatutu mone. Atonu tatou te manatu e faapea, e leai lava se leaga o na amioga soonafai ma le fia tofotofo. Ae peitai, o le tuuina i se tulaga lamatia o le meafaigaluega e tasi ua tuuina mai e le Atua ia i tatou ina ia tatou maua ai aafiaga aoaoina o le olaga i le tino—e tau lava ina faatino ai le tuinanau po o se mea e faapea e malie, ina ia uunaia ai le taua o le tagata lava ia, pe ina ia taliaina ai—e matua tuuitiitia moni ai le taua o o tatou tino faaletino.
O le mea e faanoanoa ai, o nisi o alii ma tamaitai talavou i le Ekalesia i aso nei, ua latou le amanaia “mea e pei ona i ai lava” ma lē amana’ia ai sootaga e faavavau mo mea omiomi faasoesa, [mea] faapasi taimi ma ’alofaga e le tumau ni aoga. E tagiuu lo’u loto pe a oo se ulugalii talavou—na faamauina faatasi i le maota o le Alii mo le olaga nei ma le faavavau e le mana o le perisitua paia—i faafitauli faaleulugalii ona o aafiaga o mea ua fai ma vaisu o le ova o le taalo i vitio po o evaevaga i luga o le initoneti. E ono faamaimauina e se alii po o se tamaitai talavou se taimi tele, tolopo pe lafoai ni galuega po o taumafaiga faaakatemia, ma iu ai ina ositaulaga mafutaga faapelepele a tagata ona o vitio faape mafaufau ma agaga mo taaloga i luga o le initoneti. E pei ona fetalai mai le Alii, “O lea, ou te tuuina atu ai ia te i latou le poloaiga … : Aua e te faamaumauina ou aso, pe natia lau taleni ia le iloa” (MFF 60:13).
Atonu o le a e fesili ifo ia te oe lava, “Ae Brother Bednar, na amata ona e talanoa mai i le aso e uiga i le taua o le tino faaletino i lo tatou alualu i luma e faavavau. Pe o le uiga ea o lau tala o taaloga vitio ma isi ituaiga o fesootaiga e faaaoga ai komepiuta e i ai sona aafiaga i le tuuitiitia o le taua o o tatou tino faaletino?” O le mea tonu lava lena o loo ou fai atu ai. Sei ou faamatala atu.
Ua tatou ola i aso ua mafai ai ona faaaoga tekinolosi e faafoliga ai o ni mea mo’i, e suitulaga i mea mo’i, ma fatu ai e pei lava e mo’i. Mo se faataitaiga, e mafai e se fomai o le soifua maloloina ona faaaoga polokalama faataitai o le komepiuta e maua ai se poto masani e taua i le faatinoina o se taotoga faigata e aunoa ma le lamatia ai o le soifua o le tagata gasegase. O se pailate e lele i se vaalele e faafoliga o se mea mo’i e mafai ona faataitaia soo auala e tulaueleele faafuasei ai lea e mafai ona laveaiina ai le tele o soifua. Ma o tusiata ma enisinia o fale e mafai ona faaaogaina tekinolosi fou e faataitai ai ni mamanu faigata ma auala e fauina ai lea e faaitiitia ai le maumau o ola o tagata ma le faaleagaina o fale e afua mai i mafuie ma isi faalavelave faalenatura.
I nei faataitaiga taitasi, o le matua faamaoni aiai i le faataitaiga po o le faatusa e i ai sona sao tele i le aoga ma le mataalia o le aafiaga. O le upu faamaoni aiai e faaalia ai le tutusa o le va o le mea mo’i ma se faafoliga o le mea mo’i. O se faataitaiga faapena e mafai ona aoga tele pe afai e maualuga le faamaoni aiai ma lelei foi ni faamoemoega—mo se faataitaiga, o le mauaina o le poto masani e faapea ona laveaiina ai ola pe faaleleia atili ai le tulaga auau mama o le olaga.
Faamolemole matau le faamaoni aiai i le va o le faafoliga o le mea moni i le ata faatusa i le komepiuta (itulau 26) ma le moni o le potu atoa i le ata o loo i le itulau e sosoo ai.
I nei faataitaiga taitasi, na faaaogaina ai le matua faamaoni aiai ina ia ausia ai se faamoemoega aupito taua—o le mamanu ma le fausiaina o se malumalu paia ma matagofie. Ae peitai, o se faataitaiga po o se faatusa e mafai ona taitaiina atu ai i le faatamaia o le faaleagaga ma le matautia pe afai e maualuga le faamaoni ae leaga ona faamoemoega—e pei o le, faataitai i amioga e le tusa ai ma poloaiga a le Atua po o le faatosinaina o i tatou e mafaufau pe faia mea ia e semanu tatou te le mafaufau i ai pe faia foi “aua ua na o se taaloga lava.”
Ou te tuuina atu se leo o le lapataiga faaaposetolo e uiga i aafiaga tatou te ono mu ai, momole ai, taofiofia ai, ma omia ai i nisi o fesootaiga faaeletonika ma aafiaga i o tatou agaga. O atugaluga ua ou ta’ua e le fou; e faatatau tonu lava i isi ituaiga ala o faasalalauga e pei o le televise, tifaga ma musika. Ae i se lalolagi o fesootaiga faaeletonika, ua sili atu ona taatele ma malolosi nei luitau. Ou te augani atu ia te outou ia outou mataala i aafiaga faapogisa mafaufau ma faataumaoi faaleagaga o tekinolosi o loo faaaogaina e aumaia ai le faamaoni aiai ae faapea ona faalauiloaina ai faamoemoega mataga ma le faatiapolo.
Afai e le mafai ona faatosina i tatou e le fili e faaaoga sese o tatou tino faaletino, o le isi ana auala e sili ona malosi o le faasese lea o oe ma au o ni agaga ua faaofu i tino ina ia tatou o ese malie moni ai mai mea e pei ona i ai lava. O lona uiga moni, na te uunaia i tatou e mafaufau ma gaoioi e pei ona sa tatou i ai i o tatou tulaga i le muai olaga, e le’i faaofuina i le tino. Ma, afai tatou te faatagaina ai o ia, o le a mafai ona ia faaaogaina ma le poto leaga nisi o vaega o tekinolosi o ona po nei ina ia ausia ai ana faamoemoega. Faamolemole ia outou faaeteete i le soona faaaogaina ma le gaua’i atu i le fatufatu ata, feau i telefoni feaveai, mea faalogologo, fesootaiga e ala i faamatalaga pupuu, ma le tuuina o faamatalaga o lou olaga i le initoneti, ma le fai ma vaisu o le faaaogaina o ala o faasalalauga ma le Initoneti, e faapea ona e le iloa ai le taua o lou tino faaletino ma misia ai le taua o talanoaga faafesagai. Ia faaeteete ma mataala i le mau masini omiomi ma faamatalaga o fesootaiga e faia i komepiuta lea e mafai ona suia ai le vaega atoa o le gafatia ma aafiaga faaletino.
Faitau ma le totoa i le upusii ua taua i lalo o loo faamatala ai se mafutaga mafana a se tamaitai ma se uo tama na faia i luga o le initoneti. Ma matauina le ala na faaitiitia ai e le fesootaiga le taua o le tino faaletino: “Ma o PFSlider [le igoa o le alii i le lau] na avea ma au ou i aso uma o le olaga. Na galoma ese atu mea faitino uma. Na le i ai so’u tino Na leai so’u pa’u, leai ni lauulu, leai ni ivi. O manaoga uma na liua i se peau o mafaufauga lea na leai se mea na oo atu i ai ae na o lo’u lautaliga lava. Na leai se olaga i fafo mai o le fale, leai se olaga o aga fesootai, leai se tau. Sa na o le lau lava o le komepiuta ma le telefoni, ma lo’u nofoa, ma atonu foi ma se ipu vai.”4
E ese mai lena, e tatau ona tatou gauai atu i le apoapoaiga a Paulo: “Ia taitasi outou ma iloa ona fai o lana lava ipu ma le faapaiaina ma le tauleleia” (1 Tesalonia 4:4).
Ia toe mafaufau ane i le faataitaiga na ou ta’ua muamua i se ulugalii talavou na faaipoipoina lata mai nei i le maota o le Alii. E ono tuuto atu e se toalua mafaufau faatamaitiiti pe taitai seseina foi le tele o le taimi e taalo ai i taaloga vitio, talanoa i le initoneti, po o nisi auala e faatagaina ai masini omiomi e pulea pe faoa mea e pei ona i ai lava. O le taimi muamua e foliga ai e le leaga tele le faaalu ai o le taimi, e faapea o ni nai minute e toomaga i ai mai le pisi ma le mamafa o fuafuaga o le aso. Ae e misia avanoa taua mo le atiina ae ma le faaleleia atili o tomai i le vafealoai, mo le talie ma fetagisi faatasi, ma le fatuina o sootaga tumau ma le faamanuiaina o lagona alofa o’oo’o. E faifaimalie lava, o faafiafiaga e foliga mai e le afaina, e mafai ona avea ma se ituaiga o faapologaina faataumaoi.
Ina ia lagona le mafanafana o se opo alofa mai se soa e faavavau po o le vaaia o le faamaoni i mata o le isi tagata a o faasoa atu le molimau—o nei mea uma e oo i ai e pei ona i ai lava, e ala i le faaaogaina o o tatou tino faaletino—e mafai ona ositaulagaina mo se tuinanau faamaoni aiai lea e leai sona taua tumau. Afai tatou te le mataala, e mafai ona tatou “le toe lagona” (1 Nifae 17:45), e pei ona oo i ai Lamana ma Lemuelu o anamua.
Sei ou tuuina atu se isi faataitaiga o le vavaeese malie moni mai mea e pei ona i ai lava. O aso nei e mafai e se tagata ona ulu atu i se lalolagi manaia e pei o se Olaga Lona Lua, ma faaaoga ai se faasinomaga fou. E mafai ona fatu e se tagata se faailoga faaeletonika, po o ni uiga faaeletonika, lea e tutusa ma ona lava foliga vaaia ma amioga. Po o le mafai foi e se tagata ona fatu se faasinomaga taufaasese e leai ma se mea e fesootai ai i mea e pei ona i ai lava. E tusa lava pe o le a le latalata o le talitutusa o le faasinomaga fou ua faaaogaina i le tagata, o amioga faapena o se faataitaiga manino lea o mea e le o i ai moni. Na ou faamalamalamaina muamua atu le faamaoni aiai o se faataitaiga po o se faatusa. Ou te fia faamamafa atu nei le taua o le faamaoni aiai o le tagata lava ia—o le fesootaiga i le va o se tagata moni ma se tagata fatu, o se faasinomaga faaeletonika. Faamolemole ia matau le leai o se faamaoni aiai faaletagata lava ia o le faamatalaga lenei na lipotia mai i le Wall Street Journal:
O Ric Hoogestraat o se “tamaloa tino tele [53-tausaga le matua] e fai sana poni sinasina umi, e mafiafia ona talafa, ma se ’avaaluga e uliuli ma sinā. … E [faaalu e Ric] le ono itula o le po ma e masani lava e 14 itula sosoo i faaiuga o vaiaso e fai ai ma Dutch Hoorenbeek, o lona faatusa faaeletonika lea … e ono futu le maualuga ma tino lelei. O le [tagata] e pei e foliga laitiiti, ua faaleleia atili le tulaga faaletino o [Ric].” …
“… E saofai o [ia] i lana komepiuta ae e tapunipuni uma pola o lona potu. … A o matamata lona toalua o Sue, i le televise i le potu malolo, e talanoa Mr. Hoogestraat i luga o le initoneti i le ata e foliga mai i luga o le lau o se [tamaitai] umi, faasasao, lauulu mumu.
“E le’i feiloai lava o ia i le tamaitai i tua atu o le lalolagi o le komepiuta o le Olaga Lona Lua, o se lalolagi ua faamaumauina lelei ai mea e tutupu i le omiomi [o ki o le komepiuta]. … E lei talanoa atu foi ia te ia i le telefoni. Ae o le la mafutaga ua ese lava le tulaga moni ua oo i ai. Ua i ai ni a la taifau se lua, totogi faatasi le la mokesi, ma faaaluina le tele o o la taimi [i lo laua lalolagi faaeletonika] e fai a la’ua faatauga i faleoloa tetele ma alu ni a la tietiega mamao i pasika. … Ua matua malosi lava la la’ua sootaga o lea, i le tolu masina talu ai na talosaga atu ai Mr. Hoogestraat ia Janet Spielman, le tamaitai Kanata e 38-tausaga o le na faatautaia le lauulu mumu, ina ia avea o ia ma ona toalua faafoliga.
“E lei fiafia i ai le fafine ua faaipoipo i ai o ia faaletulafono. ‘E matua faataumaoi lava,’ o le tala lea a Sue Hoogestraat, … o le ua fitu masina talu ona faaipoipo ia Mr. Hoogestraat.”5
Uso e ma tuafafine, faamolemole ia outou malamalama. Ou te le o fai atu o tekinolosi uma lava e matua leaga; e leai. Pe o ou fai atu foi e le tatau ona tatou faaaogaina ona mau gafatia i auala tatau e aoao ai, fesootai ai, siitia ai ma faamanuiaina ai olaga, ma fausia ai ma faamalosi le Ekalesia; ioe e tatau ona tatou faaaogaina. Ae ua ou tuuina atu se leo o le lapataiga e le tatau ona tatou faamaimauina ma faaleagaina mafutaga moni e ala i le soona mafaufau i matufaga e le moni. “Toeitiiti 40% o alii ma le 53% o tamaitai o e taaalo i taaloga i le initoneti na fai mai, o a latou uo faafoliga na tutusa lava pe sili atu foi nai lo a latou uo moni o le olaga, e tusa ai ma se sailiiliga i le 30,000 o tagata taaalo na faia … e se tagata faauu o le tofamanino po o le Ph.D. lata mai nei mai le Iunivesite o Stanford. E silia ma le kuata o tagata taaalo [o e na tali mai i le sailiiliga na faaalia e faapea] o le mea na aupito sili ona faagaeetia i le vaiaso ua tuanai na tupu lea i se lalolagi o komepiuta.”6
E ese le taua, ese le mausali, ma e ese foi le fetaui o le faauigaga o le upu moni e le Alii: “o mea e pei ona i ai lava.” Na fesili le perofeta o Alema, “O lea, e le moni ea lenei?” (Alema 32:35). Sa talanoa o ia e uiga i le malamalama ma le lelei lea e matua manino e mafai lava ona tofo i ai. E moni, “o i latou o e nonofo i luma [o le Tama] … latou te vaaia e pei ona vaaia i latou, ma latou iloa e pei ona iloa i latou, ona ua latou maua mai lona atoatoa ma lona alofa tunoa” (MFF 76:94).
Ou uso e ma tuafafine pele, ia faaeteete! O le maualuga o le faamaoni aiai o le tagata lava ia e faaitiitia i fesootaiga e faaosofia i komepiuta, ma faamoemoega o na fesootaiga e taufaasese, e taufaavalea, ma amioleaga, o le faamoemoega mo faafitauli faaleagaga e matua maualuga lava. Ou te augani atu ia te outou ina ia outou liliu ese vave mai ma ia tumau ona o ese ai mai na ituaiga nofoaga ma gaoioiga (tagai 2 Timoteo 3:5).
O lenei, ou te fia taua se uiga faaopoopo o osofaiga a le fili. E masani ona tuuina mai e Satani se taufaasese faatosina o le faanenefu. E taumafai lava Lusifelo i taimi uma e faataunuu faalilolilo lana galuega (tagai Mose 5:30). Ae, ia manatua, o le liliuese e le faapea e le o iloa, aua o loo tulai mai i le lesitala o le uepi, pe ala mai foi i se faasinomaga faatupufua i se uepi talanoa saoloto [chat room] po o se lalolagi e le moni. O mafaufauga lē mama, upu, ma amioga o taimi uma lava e le mama ai, e oo lava i se nofoaga fatu e ave i ai faamatalaga faaeletonika. O amioga pepelo lea e manatu e punitia i le faalilolilo, e pei o le sii mai faagaoi o musika mai le Initoneti po o le kopiina o CD po o DVD mo le tufaina atu i uo ma aiga, o le lē faamaoni lava lea. Tatou te tali uma atu i le Atua, ma e iu lava ina faamasinoina i tatou e Ia e tusa ai ma a tatou amioga ma manaoga o o tatou loto (tagai Alema 41:3). “Aua e pei ona manatu [se tagata] i lona loto, ua faapea lava o ia” (Faataoto 23:7).
O loo silafia e le Alii pe o ai moni i tatou, o mea tatou te mafaufau moni i ai, ma mea moni tatou te faia, ma pe o ai moni o loo avea ai i tatou. Ua Ia lapataiina i tatou “e tuia i le faanoanoa tele o e ua fouvale; aua e tautalagia a latou amioleaga i tumutumu o fale, ma o le a faaalia a latou amioga lilo” (MFF 1:3).
Ua ou tuuina atu se leo o le lapataiga e uiga i na o ni nai mea matautia faaleagaga i lo tatou lalolagi ua faamasani i mea faatekinolosi ma ua televave ona suia. Sei ou toe fai atu: e le faapea o tekinolosi po o le televave o suiga lava ia e lelei pe leaga; ae o le luitau moni, o le malamalama lelei lea i anotusi o le fuafuaga e faavavau o le fiafia. O le a uunaia oe e Lusifelo e faaaoga sese ma ia faaitiitia le taua o lou tino faaletino. O le a taumafai o ia e sui le tulaga e le masuia o le fai soo o mea e le moni mo foafoaga eseese e le muta a le Atua ma faatalitonu i tatou ua na o i tatou o ni mea o le olaga faitino e galueaiina ae le o ni agaga e faavavau ua faamanuiaina i se saolotoga e filifili ai le mea sa’o tatou te galulue ai mo i tatou lava. Na te faatosinaina ma le poto ia agaga ua faaofu i tino ina ia lafoai i faamanuiaga ma aafiaga e aoao ai “i le tino” (1 Nifae 19:6; Alema 7:12–13) lea e mafai ona tatou maua e ala i le fuafuaga o le fiafia a le Tama ma le Togiola a Lona Alo e Toatasi na Fanaua.
Mo lou fiafia ma le puipuiga, ou te valaaulia ai oe e suesue atili ma le filiga i le aoaoga faavae o le ata o le faaolataga—ma ia mafaufau loloto ma le agaga tatalo i upu moni ua tatou faamanatuina. E lua ni fesili ou te tuuina atu e te tagai i ai i au lava manatunatuga patino ma suesuega ma le agaga tatalo:
1. Pe o le faaaogaina o tekinolosi eseese po o auala o faasalalauga e valaaulia ai pe taofia ai le mafutaga faifai pea a le Agaga Paia i lou olaga?
2. Pe o le taimi e te faaaluina i le faaaogaina o tekinolosi eseese ma auala o faasalalauga e faalautele pe faatapulaa ai lou mafai ona ola, ona alofa, ma auauna atu i auala tauaogaina?
O le a e maua tali, musumusuga, ma aoaoga mai le Agaga Paia e fetaui ma ou tulaga ma manaoga patino. Ou te toe fai atu ma faamautuina atu le aoaoga a le Perofeta o Iosefa: “O tagata uma e fai tino e i ai le mana e pulea ai i latou o e leai ni tino. E leai se mana o le tiapolo e pulea ai i tatou, sei vagana lava ua tatou faatagaina o ia.”
O nei upu moni e faavavau e uiga i le taua o o tatou tino faaletino o le a e malosi atili ai e tetee atu i le taufaasese ma osofaiga a le fili. O se tasi o o’u faanaunauga loloto mo outou o se molimau e tumau le faateleina ma le talisapaia o le Toetu—e oo lava i lou lava toetu ma se tino selesitila, faaeaina “ona o lo outou faatuatua [i le Alii o Iesu Keriso] e tusa ma le mea ua folafolaina” (Moronae 7:41).
O Le Tupulaga Faiae
Ou te fia tautala tonu atu ia te outou e pei ona outou i ai lava. O outou moni o le tupulaga faiae i totonu O Le Ekalesia a Iesu Keriso o le Au Paia o Aso e Gata Ai. Ia Oketopa o le 1997, na asiasi atu ai Elder Neal A. Maxwell (1926–2004) o le Korama a Aposetolo e Toasefululua i le Iunivesite o Polika Iaga–Idaho e saunoa ai i se sauniga lotu. I le aso na i ai o ia i le lotoa, sa ma talanoa faatasi ai e uiga i ni autu eseese o le talalelei i se tulaga faalauaitele ae na faapitoa lava i le autalavou a le Ekalesia. Ou te manatua le taua e Elder Maxwell o se faamatalaga na faapea ona matua faagaeetia ai au. Na ia saunoa, “O le autalavou o le tupulaga lenei ua i ai se malosiaga sili atu mo le usiusitai nai lo se isi lava tupulaga na i ai muamua.”
Ona ia faailoa mai lea o lana faamatalaga na faavae i se upu moni e pei ona sa aoaoina mai e Peresitene George Q. Cannon (1827–1901), Fesoasoani Muamua i le Au Peresitene Sili: “Ua faapolopoloina e le Atua agaga mo lenei tisipenisione o e ua i ai le lototoa ma le naunautai e fetaiai ma le lalolagi, ma mana uma o le tiapolo, o ē e vaaia ma ē le vaaia, ia folafola atu le talalelei ma faatumauina le upu moni ma fausia le Siona a lo tatou Atua e le fefefe i soo se taunuuga. Ua Ia auina mai nei agaga i lenei tupulaga e faataatia le faavae o Siona e le toe mafai ona faatoilaloina, ma ia tausia ni fanau o le a amiotonu, ma o le a ava i le Atua, ma ava ia te Ia i mea uma, ma usitai ia te Ia i tulaga uma.”7
E masani ona faamamafa mai e matua ma taitai o le Ekalesia e faapea o alii ma tamaitai talavou o lenei tupulaga na faapolopoloina mo lenei vaitau i le talafaasolopito o le lalolagi ma o nisi ia o fanau aupito totoa a le Tama Faalelagi. Ioe, e moni lava ia saunoaga. Ae ua tele taimi ou te mafaufau ai pe o le faalogoina soo e tagata talavou o lenei faauigaga ua oo ai ina ova le faaaogaina ma ua pasiā—ma atonu ua le amanaia ai lona taua ma le fautuaga loloto. Ua tatou iloa “o le ua foaiina atu i ai mea e tele e sueina mai ia te ia mea e tele” (MFF 82:3). Ma o aoaoga a Peresitene Cannon ma Elder Maxwell e fesoasoani tatou te malamalama atoatoa ai i mea o loo manaomia mai ia i tatou i aso nei. O oe ma au e tatau ona lotototoa ma “usitai ia the Ia i tulaga uma.” O lea la, o le usiusitai o le auupega autu lea e tatau ona faalagolago i ai le tupulaga faiae i le taua i aso e gata ai i le va o le lelei ma le leaga.
Ua tatou fiafia ona o le Alii e ala mai i Ana auauna faamaonia ua “siitia ai le alafua” mo alii ma tamaitai talavou o aso nei. E tusa ai ma mea ua tatou iloa e uiga i le pe o ai i tatou ma pe aisea ua tatou i ai iinei i le lalolagi, e faafetaia ai lava ma talisapaia ia ituaiga o taiala musuia. Ma e tatau ona tatou iloa o loo taumafai pea Lusifelo e “faamaualalo ifo le alafua” e ala i le tauanauina o i tatou ia faaaoga sese ma tuuitiitia le taua o o tatou tino faaletino.
Ua faafia ona lapataiina i tatou e le Faaola ina ia faaeteete i mea taufaasese a le fili:
“Ona tali atu lea o Iesu, ua faapea atu ia i latou: Ia outou nei faaseseina outou e se tasi; …
“Aua o le a tutu mai i ia aso ni Keriso pepelo, ma ni perofeta pepelo, ma o le a latou faaali mai foi ni faailoga matautia ma le ofoofogia, i le malosi sili, o le a latou faaseseina ai, pe a mafai, e ua filifilia, e ua filifilia e tusa ma le feagaiga. …
“Ma o se na te tausia au upu, e le faaseseina lava” (Iosefa Samita—Mataio 1:5, 22, 37).
O le usiusitai e tatalaina ai le faitotoa i le mafutaga faifai pea ma le Agaga Paia. Ma o meaalofa faaleagaga ma tomai e faaosofia e le mana o le Agaga Paia o le a mafai ai ona tatou aloese mai le taufaasese—ma ia vaai, ia lagona, ia iloa, ia malamalama, ma ia manatua mea e pei ona i ai lava. Ua faaeeina ia te oe ma au se mana sili atu mo le usiusitai e faapitoa mo ia mafuaaga. Na folafola mai e Moronae:
“Ia faalogo i le afioga a le Atua, ma ia ole atu i le Tama i le suafa o Iesu i mea uma tou te matitiva ai. Aua nei masalosalo, a ia faatuatua, ma ia amata e pei o anamua, ma ia o mai i le Atua ma o outou loto atoa, ma ia galulue ma le matau, ma le gatete i ona luma, ina ia outou ola ai.
“Ia popoto outou i aso o outou olaga; ia lafoaiina e outou mea eleelea uma; aua le ole atu i se mea ina ia outou faauma ai i o outou tuinanau, a ia ole atu ma le le mafaagaeetia, ina ia le gauai atu outou i le tofotofoga, a e auauna atu outou i le Atua moni, o Le soifua” (Mamona 9:27–28).
A o tatou faalogo atu i lena fautuaga musuia, e mafai ma o le a faamanuiaina i tatou ia iloa ma tetee atu i osofaiga a le fili—i le asō ma i le lumanai. E mafai ma o le a tatou faataunuuina o tatou tiutetauave na muai faauuina ai i tatou ma saofagā ai i le galuega a le Alii i le lalolagi uma.
Ou te molimau atu o loo soifua le Atua ma o [Ia] o lo tatou Tama Faalelagi. O Ia o le mataisau o le ata o le faaolataga. O Iesu o le Keriso, o le Togiola o [Lona] tino na manua, gauia, ma saeia mo i tatou a o Ia ofoina mai le taulaga togiola. Ua toetu o Ia, o loo soifua o Ia, ma o Ia o le faaao o Lana Ekalesia i nei aso e gata ai. Ina ia “siosiomia [i tatou] e faavavau i aao o lona alofa” (2 Nifae 1:15) o le a avea o se aafiaga moni ae le o se aafiaga faafoliga.
Ou te molimau atu e mafai ma o le a faamanuiaina i tatou i le lototoa ma le naunautai e fetaiai ma le lalolagi ma mana uma o le tiapolo. O le a manumalo le amiotonu. E leai se lima e le paia e mafai ona taofia lenei galuega mai lona alualu i luma. Ou te molimau atu ai ma tautino atu nei mea uma e pei ona i ai lava ma e pei o le a i ai lava, i le suafa paia o le Alii o Iesu Keriso, amene.
O lenei ata o loo faaalia i lalo o se ata faatusa na faia i le komepiuta o se potu faamauga o le Malumalu o Newport Beach i Kalefonia. O le ata lenei ma isi ata e talitutusa lava o loo faaaogaina o se vaega o le faagasologa o le fuafuaina ma le mamanuina o malumalu fou taitasi ua fausiaina. O le ata o loo faaalia ai ie, meaafale, masini, moli, fua, ma se vaega e faaalia ai foliga o le a foliga ai vaega taitasi pe a maea. O le agaga atoa lava, o le malumalu atoa ma ona vaega uma e mamanuina auiliili muamua a o lei amataina ona fausia.
O le ata lenei o le potu moni lava o faamauga i totonu o le Malumalu o Newport Beach i Kalefonia.
Ata na tusia e © Corbis ma © Getty Images
Agavale: ata faatusa na saunia e Craig Lofgreen, © IRI; taumatau: ata na pueina e Welden C. Andersen, © IRI
Ata na saunia e Steve Bunderson
Ata na tusia e Craig Dimond
Ata na tusia e Welden C. Andersen