Toe Faafou Ou Tulaga Faaleagaga

O le tali mai a autalavou matutua a le Ekalesia atoa i le saunoaga a Elder David A. Bednar i le faeasaite “O Mea e pei Ona I Ai Lava,” lea sa ia saunoa ai ia Me 2009 (tagai i le itulau 22 o lenei lomiga), i le toe iloiloina lea o le faaaogaina o komepiuta, telefoni feaveai, ma isi tekinolosi. O nisi nei o i latou na tautalagia le suiga sa latou faia e tali atu ai i le savali ma faamanuiaga na latou mauaina ua avea o se taunuuga.

O Le Manaomia e Taulai Atu

O nisi tekinolosi, e pei o masini feaveai e tata ai musika, e mafai ona taofia oe mai le taulai atu i mea o loo tutupu i ou autafa. Sa fesoasoani le saunoaga a Elder Bednar ou te iloa ai ao ou sauni e auauna atu i se misiona, e manaomia lou faamasani atili i fegalegaleaiga ma isi tagata. Ou te iloa e tatau ona faaitiitia lo’u faalagolago i tekinolosi, e ui lava ina manaia. I le avea ai o se faifeautalai e tatau ona ou taulai atu i isi tagata ma le galuega o le a ou faia mo le Alii.

Andrew Hovey, Massachusetts, ISA

Ua Faamalolosia Sootaga

O le savali a Elder Bednar o se tasi lea [o savali] e tele ina manatu mama i ai, pe le amanaiaina ona o aafiaga le lelei o le faaaogaina sese o tekinolosi, e ono foliga mai e le taua tele. Ua ou iloa nei e tatau ona ou aloese mai i soo se tulaga lea e ono faalavelavea ai le ma mafutaga ma le Agaga. Mo se faataitaiga, o nisi o gaoioiga o loo ofaina mai e la’u telefoni feaveai, e pei o auaunaga o teugatupe e ala i le telefoni, e aoga ma faigofie. Ae peitai, o nisi o gaoioiga e tele ai le taimi e faaalu ai ma e mafai ona aveese mai ai lo’u mafaufau ma taulai atu i mea e sili atu ona taua.

Ua ou faia nei ni taumafaiga se tele ou te asia taitoatasi a’u uo ma aiga nai lo le faaaogaina o isi fesootaiga faaeletonika. O le faia o lenei mea, ua faamalosia ai a matou sootaga. O lea ua sili atu nei lo’u talisapaia o mea e matua taua moni lava i lo’u olaga.

Jayoung Lee, Seoul, Korea

O Se Tautinoga ia te Au Lava Ia

Sa ou iloiloina lo’u faaaogaina o tekinolosi ma ou iloa ai atonu o nisi o tekinolosi ua avea tele ma vaega o lo’u olaga i aso taitasi. Sa ou faia se tautinoga ia te au lava ia e faataua ma faaaogaina ma le atamai lo’u taimi. Nai lo le nofo i luma o le komepiuta ma gauai atu i ni fesootaiga faalauaitele, e sili ai pe a faaalu lo’u taimi e faitau ai se tusi lelei po o le aoaoina o se tomai fou e maua mai ai ni tomai faaleaoaoga ma uunaia ai le tuputupu ae. Ou te taumafai lava e faaaluina atili le taimi ma tagata e fausia ai faigauo ma talie fiafia.

Ruth Barilea, Manila, Filipaina

Mailei Faatekinolosi

E i ai la’u pisinisi o telefoni feaveai ma o a’u o se enisinia faaeletonika, ma o lea sa avea ai lava e le aunoa ia mea faatekinolosi ma vaega o lo’u olaga i aso taitasi. O le Initoneti, taaloga faavitio, ala o faasalalauga faaeletonika ma masini—o mea uma nei e tatau ona aumaia ni faafiafiaga talafeagai lelei. Ae peitai, o le tele o nei mea e faigofie lava ona faaaogaina i se auala e le amiotonu.

E le mafai ona ou vaai faalemafaufau i lagona o lo tatou Tama Faalelagi pe a tatou pauu atu i mailei faatekinolosi ma faamaumauina o tatou taimi i mea le aoga. Ona o upu musuia a Elder Bednar, ua ou faia ai se sini ou te faaaogaina ma le talafeagai ia tekinolosi i taimi uma lava ma faaaoga tatau lo’u taimi.

Christian Alejandro Zerlin, Managua, Nicaragua