O Lau Misiona i le Olaga o le Taimi LENEI

Saunia e Jan Pinborough

Mekasini a le Ekalesia

E tolu mataupu faavae e mafai ona fesoasoani ia i tatou i le laasia lea o le lumanai ma le mautinoa maoae, malosi, ma le faatuatua.

I o’u tausaga o se talavou matua, sa ou faaaluina le tele o le taimi ou te mafaufau ai i lo’u lumanai. O le misiona, faaipoipoga, aoaoga, galuega—o mea uma nei o ni fesili sa manaomia le taliina, ae sa le tele ni a’u tali. Sa ou naunau lava e faataunuu soo se misiona e finagalo ai le Alii mo au, pe a na mafai lava ona ou iloa.

Sa tuuina mai i lo’u faamanuiaga faapeteriaka se vaaiga lautele o le faamoemoega o lo’u olaga. Ae i se isi itu sa ou lagona e pei lava o loo ou taumafai e su’e lo’u auala i le faleoloa e faaogaina ai se faafanua o se faasinoala. E faapefea pe afai e sese se mea ou te afe ai? Pe mafai pea ona ou saili ma faataunuu le misiona o loo finagalo i ai le Alii mo au?

Mai i lena taimi, ua ou mauaina ni mataupu faavae se tolu lea na mafai ai ona fesoasoani ia ou laasia mea e le mailoa ma le mautinoa maoae, malosi, ma le faatuatua

1. Mo se Vaitau Itiiti

O le mataupu faavae muamua e aofia ai le taua tele o le taimi lenei.

I le amata mai i le 1831, o le toatele o le Au Paia anamua sa faamautu i Katelani, Ohaio pe tusa ma le fitu tausaga. Sa tuua o latou fale, o pisinisi, ma faatoaga i Niu Ioka ma Penisilevania ae faia ni malaga faigata i se nofoaga e le masani ai. Ma sa ta’u atu ia i latou e le Alii o lenei nofoaga e mo na o sina taimi:

“Ou te faapaiaina foi lenei laueleele ia te i latou mo ni nai aso, seia saunia e au le Alii se isi mo i latou, ma poloai atu ia te i latou ia o atu;

“E lei tuuina atu ia te i latou le ituaso ma le aso, o le mea lea ia latou galulue ai i luga o lenei fanua faapei e nofomau ai i ni tausaga, o le a fai foi lenei mea mo latou lelei” (MFF 51:16–17).

Ou te fia vaai faalemafaufau i na tagata o le Au Paia anamua i lo latou faalogo atu i faatonuga a le Alii ma faia loa. Sa latou galueaiina fanua sa latou le iloa pe latou te seleseleina, totoina laau o o latou fua e le o mailoa pe latou te taumafaina, ma fausia se malumalu matagofie o le a latou tuua i se taimi mulimuli ane. Ou te vaai faalemafaufau ia i latou ao ola ai i ni olaga e le malolo, e le mailoa le lumanai, manatunatu pe o fea o le a latou agai i ai a o afea foi. Sa latou galulue “mo ni tausaga,” ma le faamoemoe o le a le faia fua a latou galuega.

E oo i le taimi ua latou tuua ai Ohaio i le 1838, ua fesoasoani tele le Au Paia i le faataatiaina o se faavae malosi mo le tuputupu ae o le Ekalesia i le lumanai. Mafaufau po o le a le mea na tulai mai i lena vaitaimi taua ma le faamanuiaina:

Sa faatulagaina e le Perofeta o Iosefa Samita le Aoga a Perofeta, faamaeaina lana faaliliuga musuia o le Tusi Paia, ma maua le tele o faaaliga taua.
Sa faatulagaina le Au Peresitene Sili, o le Korama a Aposetolo e Toasefululua, ma Fitugafulu.
Sa fausia ma faapaiaina le Malumalu i Katelani. O iina na vaai ai Iosefa Samita ma Oliva Kaotui ia Iesu Keriso ma maua ai ki o le perisitua mai ia Mose, Elaia, ma Elia.
Sa auina atu uluai faifeautalai i Egelani.

O tausaga o lo’u talavou matua o ni tausaga pito i sili ona taua o se “vaitau itiiti” na tuuina mai e le Alii mo au. I le vaitaimi o lo matou talavou matutua, sa matua faamanuiaina le tulaga faaletino ma le mafaufau. E mafai ona tatou faia le tele o nei mea i le filifili lea e faatuatua i le Atua ma galue “mo ni tausaga.” Ona mafai lea ona avea nei tausaga ma se vaitaimi faapaiaina o faamanuiaga tulaga ese, tuputupu ae, aoaoina, ma auaunaga.

2. O se Misiona i Aso Uma

O se mataupu faavae lona lua aoga e maua mai i se malamalama faigofie. O la’u misiona i le olaga sa lei faatalia au i se lumanai lē mautinoa ma le mamao. O se tulaga o aso uma ma le faifai pea.

Sa faamatalaina e Peresitene Polika Iaga (1801–77): “E leai se alii po o se tamaitai i lenei Ekalesia e le o auai i se misiona. O lena misiona o le a i ai pea lava i lo latou olaga atoa.”¹ I se isi faaupuga, o la’u misiona i le olaga ua leva ona amataina. E lei tau manaomia ou te sailia aua ua ou iloaina.

Sa ou maua se auala e tasi e iloa ai e ala lea i le malamalama i elemene e tolu lea ua leva ona avea ma vaega o lo’u olaga:

O se vaega tulaga ese o ni meaalofa patino.
O se vaega tulaga ese o luitau patino.
O ni manaoga faapitoa i le lalolagi lea e finagalo le Alii ou te tali atu i ai.

I se faaupuga faigofie, tatou te faataunuuina a tatou misiona pe a fesootai nei elemene e tolu ma tatou filifili e galulue. Toe mafaufau pe na faapefea ona aoga i le olaga o Iosefa i le Feagaiga Tuai (tagai Kenese 37–47).

Sa tele ni meaalofa sa ia Iosefa. Sa tausia o ia i se aiga sa malamalama i le Atua, ma o ia o se suli o le feagaiga faaAperaamo. Sa ia te ia le meaalofa faaleagaga o le faamatalaina o miti.

Sa tele foi ni ona luitau. E foliga mai o nisi o luitau o Iosefa e aofia ai se tama e alofa faapito, ni uso e lotoleaga, ma le le lava o sona tomai e taulimaina ai. I lona olaga talavou sa faatauina o ia e fai ma pologa i se nuu ese, tuuaia sese i se solitulafono o le le faamaoni, ma sa lafoina i le falepuipui.

Ae sa naunau Iosefa e galue, i le faaaogaina o ana meaalofa ma ona luitau e tali atu ai i manaoga faapitoa i lona lalolagi. I le tele o taimi, e aofia ai ma lona i ai i le falepuipui, sa ia filifili e faaaoga ana meaalofa faaleagaga e faamatala ai miti a tagata. O lenei filifiliga, i se tali mai, na tatala ai le avanoa e faigaluega ai mo Farao, i le teuina o meaai mo tagata Aikupito. Ona sa ia faatuatua ma filiga i lenei tofiga, sa mafai ai e Iosefa ona faatinoina se misiona o le faasaoina-o ola, laveaiina o le toatele, e aofia ai ma lona lava aiga, mai le matelaina.

O le tuufaatasia o meaalofa ma luitau a Iosefa sa tuu ai o ia i se tofiga tulaga ese e tali atu ai pe a oo mai le oge i le nuu. Talu ai o Iosefa, o lona lava lea ituaiga o tagata, ma le mea sa i ai o ia, ma talu ai sa ia filifili e galue faamaoni ma le usiusitai, o lea na ia faataunuuina ai se misiona tulaga ese e auauna atu ai i le Alii, o tagata o Aikupito, ma lona lava aiga.

Ae o nei elemene e tolu e le na o olaga o tagata lea tatou te faitau ai i itulau o tusitusiga paia e fesootai i ai. E fesootai i aso uma o o tatou olaga taitoatasi.

Sa i ai i se tina talavou se meaalofa o le tusitusi ma ni aafiaga patino i tulaga faatoilaloina. Ina ua feagai lona uso talavou ma se tulaga faigata i le aoga, sa mafai ona ia matauina ua amata ona o’o atu lona uso i se tulaga o le leai o se faamoemoe. I le gauai atu i musumusuga a le Agaga, sa ia tusia ai ni faamatalaga matagofie, e faailoa atu ai lona alofa ma le faamautinoa, e tasi i aso uma o se vaitaimi sili ona faigata i lena lua vaiaso. I lena filifiliga laitiiti e tali atu i manaoga o lona uso, sa ola ai lenei tamaitai i lana misiona.

I lenei filifiliga e gauai atu i musumusuga a le Agaga ma faaauau ai ona galue i lea aso ma lea aso, o lea vaiaso ma lea vaiaso, ma lea tausaga ma lea tausaga, na fatuina ai se vaaiga lautele o le a tatou iloa i se taimi mulimuli ane, o le misiona lea o loo finagalo le Alii tatou te faataunuuina.

3. Ina Soia ma ia Iloa

I tausaga ina ua mavae lo’u 20 tausaga, lea ua luasefulu ma ona tupu nei, ua mafai nei ona ou iloa mea na tutupu i lo’u olaga i le auala lava lea sa faamatala mai i lo’u faamanuiaga faapeteriaka i le tele o tausaga talu ai. E le faapea la ona sa ou iloa tonu lava le mea o loo ou faia ma le tulaga e oo i ai lo’u lumanai. Sa ou matuai le iloaina lava.

Sa i ai ni faigata ma ni luitau i lo’u olaga lea sa ou faapea ai pe ua ou se ese. Peitai i se taimi mulimuli ane, sa lei manaomia ona ou popole. Sa silafia pea e le aunoa e le Alii le mea sa ou i ai ma le mea e finagalo o Ia ou te alu i ai. Sa ou taumafai pea i le mea sili e mulimuli ai i Ana poloaiga, auauna atu ia te Ia, ma faalogo i le Agaga. E ui lava sa tele ina ou le iloa le eseesega i lena taimi, ae ua ou iloa nei sa i ai pea lava i taimi uma Ona aao i lo’u olaga.

O vaitausaga o talavou matutua ua faatumulia i faaiuga taua ma nisi o mea le mautonu e masani ai ma le faapopoleina. Ae o se faamautinoa sili e oo mai pe a tatou aoao lea e faalagolago e mafai e le Alii ona aumaia Lona faamoemoega mo o tatou olaga—i lea aso ma lea aso. Ona tatou iloa lelei lea ona “soia, ma iloa [o Ia lava o le] Atua” (Salamo 46:10). Ma i le faia o lena mea, tatou te maua ai le filemu.

Sa galulue le Au Paia anamua i Katelani “mo ni tausaga” ma le faatuatua o le a le faia fua a latou galuega. A e faatuatua i le Alii ma galue “mo ni tausaga” o le a mafai ona e faia le mea sili i laasaga uma o lou olaga.

Ona o ana meaalofa, o ona luitau, ma lona faamaoni, sa mafai ai e Iosefa o Aikupito ona faataunuuina se misiona tulaga ese e auauna atu ai i le Alii ma isi. E fesootai lelei lava nei elemene e tolu i o tatou olaga taitoatasi i aso uma.

Ata na tusia e John Luke; O Taimi, Taleni, ma Mea Uma Ua Ia Te Oe, saunia e Garth Oborn, e le mafai ona kopiina