Savali a Faiaoga Asiasi
Faafouina o Feagaiga e ala i le Faamanatuga
Ia aoao atu ma le agaga tatalo mau ma upusii nei po o se isi mataupu faavae o le a faamanuiaina ai uso o loo e asia, pe afai e manaomia. Ia molimau atu e uiga i le aoaoga faavae. Ia valaaulia i latou o loo e aoaoina e faasoa mai mea ua latou lagonaina ma aoaoina.
O Iesu Keriso na Faavaeina le Faamanatuga
“Ua tago Iesu i le areto, ua faafetai ona tofitofi ai lea, ma avatu i ana Aposetolo, ua faapea atu, ‘Ina tago ia, ina aai’ (Mata. 26:26). ‘O lou tino lenei, ua foaiina atu mo outou: tou te faia le mea nei e fai ma faamanatuga ia te au’ (Luka 22:19). Na faapea foi ona ia tago i le ipu uaina, e masani lava ona sui i le vai, ua faafetai ma faamanuia, ona tufatufa atu lea ia i latou na siomia o ia ma faapea atu: ‘O lenei ipu o le feagaiga fou lea i lo’u toto,’ ‘ua faamaligiina … e faamagaloa’i agasala.’ ‘Tou te Faia Le Mea Nei ma Faamanatuga ia te Au.’ …
“Talu mai lena mea na tupu i le afeafe aupitoaluga i le afiafi a o lumanai le mea na tupu i Ketesemane ma Kolokota, ua osi feagaiga fanau o le folafolaga ina ia manatua le taulaga a Keriso i lea auala patino e sili atu ona fou, sili ona maualuga, ma sili ona paia.”1
Elder Jeffrey R. Holland o le Korama a Aposetolo e Toasefululua.
Tatou te Faafouina a Tatou Feagaiga o le Papatisoga i le taimi o le Faamanatuga
“Pe a papatisoina i tatou, tatou te tauaveina i o tatou luga le suafa paia o Iesu Keriso. O le tauaveina i o tatou luga o Lona suafa o se tasi lea o aafiaga aupito i taua ua tatou maua i le olaga. …
“O vaiaso taitasi i le sauniga faamanatuga tatou te folafola atu ai e manatua le taulaga togiola a lo tatou Faaola ao tatou faafouina a tatou feagaiga o le papatisoga. Tatou te folafola atu e faia e faapei ona faia e le Faaola—ia usiusitai i le Tama ma tausi i Ana poloaiga. O faamanuiaga tatou te maua mai ai o le i ai pea lea o Lona Agaga e faatasi ma i tatou.”2
Elder Robert D. Hales o le Korama a Aposetolo e Toasefululua.
“Sa ou faatasi ai ma se teineitiiti e valu-tausaga i le aso o lona papatisoga. I le faaiuga o le aso na ia faapea mai ai ma le mautinoa uma, ‘Ua atoa le aso talu ona ou papatiso, ae ou te lei agasala faatasi!’ Peitai o lona aso atoatoa sa lei tumau ai e faavavau, ma ou te mautinoa ua ia iloaina i le taimi nei, e pei ona tatou iloaina uma, po o le a lava le malosi tatou te taumafai ai, e le o taimi uma e mafai ona tatou teena ai tulaga leaga uma, filifiliga sese uma. …
“… E le mafai ona faia se suiga moni na o i tatou lava. O lo tatou lava manao o le naunau ma faamoemoega lelei ua le lava lea. A tatou faia ni mea sese pe leaga foi a tatou filifiliga, e tatau ona tatou maua le fesoasoani a lo tatou Faaola e toe foi ai i le ala. Tatou te aai i le faamanatuga i lea vaiaso ma lea vaiaso e faaali ai lo tatou faatuatua i Lona mana e suia i tatou. E ta’uta’u atu a tatou agasala ma folafola atu e lafoaia.”3
Julie B. Beck, peresitene aoao o le Aualofa
Ata na pueina e Jerry Garns