Manatu mo Afiafi Faaleaiga

O loo i ai i le lomiga lenei ni tala ma gaoioiga e mafai ona faaaoga mo afiafi faaleaiga. O ni nai faataitaiga nei.

“Fausia i luga o le Papa,” i. 12: A maea ona faasoa atu le tusiga, mafaufau e talanoaina le uiga o le “o lenei Ekalesia e fausia i luga o le papa o Keriso, i luga o le mataupu faavae o faaaliga e vave oo mai ma auauai mai pea.” Sue ni faataitaiga mai le konafesi aoao o faaaliga faaauau pea.

“O Mea E Pei Ona I Ai Lava,” i. 22: Mafaufau e faitau le tusiga a o lei faia le afiafi faaleaiga ma ia filifili ma le agaga tatalo ni vaega e faatatau i manaoga o lou aiga. Atonu e te manao e faaaoga le tusiga lenei mo ni lesona se lua o le afiafi faaleaiga.

“O Lau Misiona i le Olaga o le Taimi Lenei,” i. 42: Fai atu i se tagata o le aiga e faamatala mai le uiga o le fetaulaiga o ala. Mafaufau e faitau le vaega o le tusiga “O Se Misiona i Aso Uma.” Ona fai atu lea i tagata o le aiga e faasoa mai se aafiaga na latou vaaia pe na vaaia ai e isi se manaoga ma na mafai ona latou fesoasoani atu e faataunuuina.

“Faimamago po o le Le Faimamago,” i. 50: A maea ona faamatala atu le tala lenei i lou aiga, ia faamamafa atu le faamatalaga, “O le filifiliga ia aua nei faimamago e le faigata aua ua leva ona ou faia lena filifiliga.” Mafaufau e talanoaina le fesili, E mafai faapefea e le faia muamua o le filifiliga ona faigofie ai le faia o le mea sao?

Fauina o se Vaa

Sa ou suesueina ma le faamemelo tele aafiaga o le perofeta o Nifae, na faapitoa lava lo’u faamemelo i lona onosai ma le loto pulea lea na mafai ai ona ia fauina se vaa. Ua ou talisapaia le i ai o se faamoemoega poto a le Alii na poloaiina ai o ia e faia lea mea.

Ina ua asiasi atu Peresitene Gordon B. Hinckley (1910–2008) i Kuatemala i le 1997, o lana fautuaga na matua goto ifo i lo’u loto o le faamalosiauga faatauvaa ia faia afiafi faaleaiga. O le musuia ai i le tuleiga a lo tatou perofeta, na matou fono ai ma lo’u toalua, ma la’u fanau e toafa, ma faatuina se sini o le a matou “fauina se vaa e ta’ua o le afiafi faaleaiga.” Na matou iloaina le taumafaiga o le a manaomia ai, ae na matou iloaina foi ua i ai se faamoemoega poto a le Alii ua fetalai mai ai ina ia tatou faia.

O le tele o tausaga ma le faitau selau o afiafi faaleaiga mulimuli ane, ua tuputupu ae ai lo matou vaa o afiafi faaleaiga faatasi ma lo matou aiga. Ma ua matou oo i le mea tonu lava na folafola mai e Peresitene Hinckley. Mai nei faatasiga laiti—na faia e le aunoa ma le onosai—ua oo mai ai se mea matagofie lava. Ua tuputupu ae le alofa i matua. Ua faateleina le alofa i le va o uso ma tuafafine. Ma ua faalauteleina lo matou alolofa i le Tama Faalelagi ma le Faaola. Ua oo mai le agaga talisapaia i o matou loto mo le mea faatauvaa ma le manaia. (Tagai Gordon B. Hinckley, “O Ni Lesona Na Ou Aoaoina a o Ou Tamaitiiti,” Liahona, Iulai 1993, 63.)

Rony Saúl García Méndez, Kuatemala