Auaunaga i le Ekalesia
Valaauina ma Vaetofia e Auauna Atu
O valaauga aloaia i le Ekalesia e le atoatoa vagana ua vaetofia i tatou e le pule tatau o le perisitua.
I se faaaliga na tuuina atu i le Perofeta o Iosefa Samita ma Sini Rikitone i Hiram, Ohaio, i le aso 16 Fepuari, 1832, ua tatou maua ai nei upu faamafanafana ma faamalosiau:
“O a’u, le Alii, ou te alofa mutimutivale ma faapalepale i e matatau 1 ia te a’u, ma fiafia lava e faamamalu i e auauna mai ia te a’u i le amiotonu ma le upu moni e oo i le iuga.
“E sili lava lo latou taui e faavavau foi lo latou mamalu” (MFF 76:5–6).
I le tele o tausaga ao avea au ma se tasi o le Ekalesia, na ou oo ai i se aafiaga o le faatupulaia pea o le agaga faafetai ona o le valaauina e le Atua ma mo faamanuiaga folafolaina e o mai faatasi ma le tali atu i le valaau a le Alii e auauna atu ia te Ia.
Pe a tatalo taitai ia iloa le finagalo o le Alii ao lei tuuina atu se valaauga e auauna atu, latou te mauaina se lagona o le mautinoa lea e faamautuina le sa’o o le mea o le a fai. E tatau ma faamalieloto le mauaina o se molimau patino e ala i le tatalo ua valaauina i tatou e le Atua. E ala mai Ana auauna, ua valaaulia i tatou e le Alii e auai i Lana galuega ina ia tatou iloa ma sili atu lo tatou alolofa ia te Ia (tagai Mosaea 5:13).
I le mauaina o se valaauga e auauna atu, atonu tatou te mauaina ni lagona o le le agavaa e faatusatusa lea i lagona o Enoka ina ua valaauina e le Alii e taitai ma aoao ia tagata (tagai Mose 6:31). O upu “Ua i ou luga lo’u Agaga, o le mea lea o le a ou faamaonia au upu uma lava” (Mose 6:34) atonu na aumaia le faamautinoaga ia Enoka ao ia mauaina le faaaliga i le auala e faamalosia ai o ia e le Alii e faataunuu lona valaauga paia. Na faaauau ona tusia i tusitusiga paia le ituaiga taitai maoae na avea ai Enoka aua “na savavali o ia ma le Atua” (Mose 6:39). O le aafiaga o Enoka o loo i ai ni lesona taua mo i tatou taitoatasi ao tatou auauna atu i le Ekalesia a le Alii.
O le mataupu faavae o le vaetofiaina o i latou ua valaaulia e auauna atu o loo faamatalaina i le fautuaga a le Alii ia Mose ina ua ia faatonuina Mose e “faaee lou lima i luga o [Iosua]. … Ia e tuu atu foi ia te ia nisi o lou mamalu” (Numera 27:18, 20).
E ala i lenei mamanu faalelagi ua faatulagaina, ua mafai ona tatou siitia ae i luga atu o o tatou vaivaiga, malosiaga, e oo lava i le fili. Manatu i le aafiaga o Nifae ma Liae, o atalii o Helamana: “Ua afio ifo le Agaga o le Atua mai le lagi, ma ua ulu atu i o latou loto, ona faatumuina ai lea o i latou e peiseai i le afi, ua mafaia foi ona latou tautala i upu ofoofogia” (Helamana 5:45; tagai foi i fuaiupu 17–19).
Aoao Atu e ala i le Agaga
I se faaaliga ia Iosefa Samita, sa tuuina atu ai e le Alii le fesili lenei: “O le mea lea, o Au o le Alii ou te fesili atu ia te outou lenei fesili—pe na faauuina ea outou i se a?”2 (MFF 50:13). Ua tali mai le Alii, “Ina ia talai atu lau talalelei i le Agaga, o le Fesoasoani lava lea na auina atu e aoao atu le upu moni” (MFF 50:14).
E manino lava, e i ai uunaiga e tusa ai ma le auala e tatau ona tatou aoao atu ai ia upu moni paia:
“Ia manatua o mea mai luga e paia, e ao foi ina tautala i ai ma le faaeteete, ma le uunaiga a le Agaga” (MFF 63:64).
“O le ua faauuina ia te au ma auina atu e talai atu le upu moni e le Fesoasoani, i le Agaga o le upu moni, pe na te talai atu ea i le Agaga o le upu moni po o se isi ala?
“Afai foi ua faia i se isi ala e le mai le Atua ia” (MFF 50:17–18).
Pe a valaauina i tatou i se tofiga i le Ekalesia o se taitai po o se faiaoga, o la tatou tiute o le aoao atu o le afioga a le Atua i le Agaga o le Atua, ae le o “manatu o tagata e fefiloi ma nai tusitusiga paia.”3 E pei o Enoka, Nifae, ma Liae, e mafai foi ona tatou mauaina le fesoasoani mai luga e ala mai i musumusuga a le Agaga Paia.
Atonu tatou te faia se faaiuga faapea o le faalogo po o le faitau i faamatalaga e uiga i se aoaoga po o se mataupu faavae ua lava lea. Ae peitai o sea tulaga e atagia ai le le mafai lea ona iloa o le malamalamaaga loloto i mataupu faavae e maua e ala mai i faaaliga patino (tagai Iopu 32:8). Mafaufau i lenei saunoaga musuia mai ia Ailama Samita, le uso o le Perofeta: “Talai mataupu faavae muamua o le Talalelei—ma toe talai ma toe faia pea: ma o le a e iloaina mai lea aso i lea aso auala fou ma se malamalama faaopoopo e uiga i ai, o le a faaalia ia te oe. E mafai ona e faalauteleina [na faaaliga] ina ia malamalama manino atili ai.”4
Mulimuli i Faataitaiga a le Faaola
O la tatou faataitaiga sili i mea uma lava o le Alii o Iesu Keriso, le o loo tusia ai:
“Ua faaiu e Iesu o nei upu, ona matua taufaiofo ai lea o le motu o tagata i lana mataupu:
“Aua ua ia aoao ia te i latou e pei o se ua i ai le pule, a e le pei o le au tusiupu” (Mataio 7:28–29; tagai foi i le Faaliliuga a Iosefa Samita, Mataio 7:36–37).
O Alema, o le perofeta maoae o le Tusi a Mamona, na faataitaia lenei auala “O lenei foi, ona ua aoga tele le talaiga o le upu i le taitaiina o le nuu e fai mea tonu—e moni, sa sili ona aoga ai i manatu o le nuu ai le pelu, po o se tasi mea ua oo atu ia te i latou—o le mea lea sa faapea ai Alema, e tatau ona latou tofotofoina pe aoga i ai le afioga a le Atua” (Alema 31:5).
Pe a faamoemoeina i se matafaioi paia o le aoao atu o le talalelei, ia tatou mulimuli i le faataitaiga a le Faaola ma folafola faatasi atu ma Ia, “O lau mataupu e le o sa’u lava, a o lana na auina mai au” (Ioane7:16)
Ata na saunia e Matthew Reier