Seia Tatou Toe Feiloai
O Mafatiaga e Iloagofie
O se pi ma se tietiega pasi na fesoasoani lea ou te iloa ai se auala e aloese mai ai i faigata—ae o le tele lava o taimi e tatau ona tatou faatuatuaina se tagata o loo i ai se vaaiga mamao.
I le pasi e agai atu ai i le galuega i se tasi taeao, sa ou nofo i autafa o le faamalama. E lei umi ae ou iloa ai se pi o loo taumafai e alu ese mai se tulaga faigata. Sa mau o ia i tioata o faamalama e lua, ma i lona taumafai malosi e lele ese, sa le mafai lava ona ia maua le ala e aluese atu ai i fafo. I le mau ai i se falepuipui tioata, sa mafai ona ia iloa atu le saolotoga ae sa le mafai ona ia maua le auala e sola ese ai. Atonu i le fefe, sa tata malosi ai ona apaau ma matua naunau e featofai o ia i le faamalama.
O au o se tagata ou te le fia vaai o lavea se tasi po o soo se mea lava. O lea la ina ua maea ona ou matauina le pi mo sina taimi, sa ou taumafai loa e faasao mai i le saisaitia. Peitai i le leai o se faatuatua ma le malamalama i lo’u naunau e fesoasoani, na te lei taliaina ai le fesoasoani sa ou ofoina atu. O le mea moni lava, pau a le mea sa ia faaauau pea ona fai o le featofai o ia i le faamalama. Na iu lava, ina amata ona ou ita.
Ae sa ou toe mafaufau i isi tagata lea latou te oo foi i ni tulaga talitutusa faapea. Tatou te oo i tulaga faigata—o isi e le o ni mea sa tatou faia. Tatou te faia foi ni mea sese, e oo lava i tulaga tuga. E pei o le pi, tatou te lagonaina le saisaitia i nei mafatiaga. Ae paga lea, e ui lava ina silafia e le Alii mea tatou te manaomia ina ia tatou aloese ai mai i o tatou tofotofoga, ae tatou te le faalagolago atu ia te Ia i le tele o taimi—po o i latou ua Ia valaaulia e taitaia i tatou—mo se fesoasoani i taimi tatou te moomia ai. Tatou te le o gauai atu i musumusuga a le Agaga ae o loo tatou taumafai e taulimaina o tatou lava luitau, nai lo le faalagolago atu ia i latou o loo i ai se vaaiga mamao.
I le avea ai o se tagata o le Au Paia o Aso e Gata Ai, o loo tatou iloaina lava le auala e foia ai nei mafatiaga: o loo ia i tatou tusitusiga paia, tatalo, ma le mafutaga ma le Agaga Paia. Ua valaauina o tatou taitai e le Alii ma ua latou saunia ma mananao e fesoasoani.
Ae ou te lei oo i le nofoaga ou te nofo ai ma ina ua tigaina tele si tamai pi, sa mafai lava ona ia sola ese mai lona tulaga faigata. Sa ou aoao mai ia te ia e mafai foi ona tatou aloese mai i o tatou faigata—i le itiiti o le taimi e faasalaina ai i tatou pe a tatou faalagolago ma faatuatuaina le Tama Faalelagi ma Lona Alo o Iesu Keriso, lē o loo ia silafia o tatou mafatiaga.
Ata na saunia e Jorge Cocco