FaaaogainaTatau o le Initoneti
O le Initoneti e maua ai fesootaiga faavavave i le tele o punaoa na e mafai ona faamalosia ma faatamaoaigaina ai o tatou olaga. O le tele o Uepi saite faaleagaga ma le musuia e aumaia ia faasinoala ma musumusuga. O manatu nei e mafai ona fesoasoani ia te oe e faatumauina ai lou sootaga ma le mea moni e aunoa ma le motusia atoatoa mai mea lelei o loo ofoina mai e le Initoneti.
Faatapulaa Lou Taimi
O Rebecca Renfroe, mai Idaho, ISA, sa masani ona tusitusi i le initoneti ma faitau i tusi a isi toeitiiti lava o aso uma. O lona mafaufau sa i ai pea e le aunoa i le tulaga o le “tusitusi”—lea e tusitusi ai i lona mafaufau mea na ia faia ma lana fanau nai lo le faia o na mea ma i latou. Na ia iloaina e tatau ona i ai se faapaleniina.
Fai mai a ia, “Na fesoasoani ia te au le Agaga i le iloaina lea o le faia o se tusi [i le initoneti] e le o le faafitauli lea—ae o le faaaluina o le tele o lou taimi ma le malosi i lena mea. Sa ou lafoa’ia moni lava ni vaega o lo’u olaga: lafoa’ia taimi taua e faatasi ma la’u fanau ma lo’u toalua, lafoa’ia taimi mo suesuega loloto ma le auiliili o tusitusiga paia, ma ua oo lava i le lafoa’ia o itula e moe ai lea na aafia ai lo’u tulaga gafatia e auauna atu ai i isi, ma le lagonaina o le Agaga, ma le faatumauina o se olaga soifua maloloina lelei.”
Na aoaoina e Sister Renfroe ia aua nei faatagaina mea lelei e faalavelave i mea e silisili ona lelei, e pei ona fautua mai ia Elder Dallin H. Oaks o le Korama a Aposetolo e Toasefululua: “Tusa lava po o se mea e lelei e le lava lena mafuaaga e fai ai lena mea. … E moni e lelei le matamata i faafiafiaga e lelei po o le mauaina o faamatalaga e fiafia i ai. Ae le o mea uma o lena ituaiga e aoga i le vaega o lo tatou olaga tatou te faaaluina ina ia maua ai. O nisi mea e lelei tele, ae o isi e silisili ona lelei.”1
Filifili Faasalalauga Faagaeetia
E faafetaia e Amy Paulsen o Uosigitone, ISA, le Uepi saite lea na fatuina ai e nisi o tina ma tuuina mai ai ni manatu mo ni lesona ma gaoioiga mo le aoaoina o fanau iti i mataupu faavae o le talalelei. Pe a manaomia e ia le fesoasoani i mea tau ata, na te sueina ata i le initoneti e lolomi mai ai. Pe a manaomia e ia ni metotia, na te sueina ni sootaga i tusiga i mekasini a le Ekalesia, lauga o konafesi, ma tusi lesona i le initoneti.
“Ua fesoasoani le Initoneti ia i ma’ua ma lo’u toalua e saunia ai ni afiafi faaleaiga aoga mo le ma fanau,” o le tala lea a Sister Paulsen. “E ese foi le faamafanafana loto o le iloaina lea o loo i ai foi le tele o isi tina o loo ‘aoao a latou fanau e tatalo, ma savavali sao i luma o le Alii’” (MFF 68:28).
Faaaoga le Initoneti e Faasoa Atu ai le Talalelei
O se tasi o le ekalesia, o Lin Floyd o Iuta, ISA, na fatuina se Uepi saite o le talafaasolopito o aiga na i ai ata pue ma talaaga o tuaa. O lana Uepi saite ma isi e pei o lena ua fesoasoani i tagata e aoao atili ai e uiga i le Ekalesia ma ona mataupu faavae. O nisi ua mananao e papatisoina po o ua toe toaaga mai i le Ekalesia. O nisi ua maua fesoasoaniga mo le faia o talafaasolopito o aiga, faataunuuina o valaauga, ma le faamalolosia o faaipoipoga.
E tele naua mea lelei e tatau ona tatou faia i le Initoneti. Ao e faatulagaina ni taiala mo le faaaogaina o le Initoneti—i le faamautinoaina o saite e te asiasi i ai e faalauteleina lou mafaufau, faateleina ou avanoa, ma fafagaina lou agaga—o le Initoneti e mafai ona avea ma risosi maoae mo le faatamaoaigaina o lou lava olaga ma le faamalosia o lou aiga.