O Le Faitalia E Taua mo lo Tatou Alualu i Luma e Faavavau

Ua tuuina mai e lo tatou Tama Faalelagi ia i tatou le faitalia. O lenei tomai e filifili ai mo i tatou lava o se vaega taua o le ata o le faaolataga.

I le Fono i le muai olaga i le Lagi, sa tuuina mai ai e lo tatou Tama Faalelagi Lana fuafuaga, lena na aofia ai le mataupu faavae o le faitalia. Sa faatuiese Lusifelo ma “saili e faaumatia le saolotoga o le tagata” (Mose 4:3). O le taunuuga, sa tutulieseina o ia faatasi ma i latou na mulimuli ia te ia. O i tatou na totoe na filifilia le fuafuaga a le Tama Faalelagi, lea na faatagaina ai i tatou e o mai i le lalolagi ma maua se tino faaletino. Sa saunia ai foi ma se Faaola, o Iesu Keriso, lē o le a togiolaina a tatou agasala. E ala mai le salamo ua mafai ai ona faamagaloina i tatou. Sa tatou alalaga fiafia (tagai Iopu 38:7)!

O le auala tatou te faaaogaina ai le meaalofa o le faitalia i le olaga faaletino e aafia ai lo tatou fiafia faavavau po o le faanoanoa. Ua aoao mai i tatou e tusitusiga paia “o loo i ai le tulafono, e le matatalaina i le lagi … , e autu ai faamanuiaga uma lava” ( MFF 130:20)—ma i lenei tulafono ua i ai foi le “sala” (Alema 42:22). O le mea lea, pe afai tatou te filifilia le ala o a tatou faatinoga, ua tatou filifilia foi le taunuuga o a tatou gaoioiga (tagai Kalatia 6:7). E ui lava o taunuuga atonu e le vave oo mai, ae o le a mulimuli mai lava. O le filifili e mulimuli i poloaiga a le Atua e taitaiina atu ai i tatou i le filemu ma le ola e faavavau. O le filifili e talia faaosoosoga a Satani e taitaiina atu ai i tatou i le agasala ma le lototiga.¹

O le perofeta o le Feagaiga Tuai o Iosua na faatuina se faataitaiga mo i tatou ina ua ia saunoa mai, “Ina filifili ia o outou i le aso nei po o ai tou te auauna i ai; … ao au nei ma lo’u aiga, matou te auauna ia Ieova” (Iosua 24:15).

O lo tatou olaga faaletino o se taimi lea o le suesueina pe o le a faapefea ona tatou faaaogaina lo tatou faitalia (tagai Aperaamo 3:25).
E tatau ona i ai le “faafeagai i mea uma” ina ia tatou iloa ai le eseesega i le va o le lelei ma le leaga. E aumaia ai ia i tatou le avanoa e filifili ai. (Tagai 2 Nifae 2:11–16; MFF 29:39.)
Ua tuuina mai e lo tatou Tama Faalelagi ia i tatou taitoatasi le Malamalama o Keriso tatou te iloa ai le lelei mai le leaga (tagai Moronae 7:12–17).
Pe a tatou filifilia lo tatou ala o faatinoga, pe lelei pe leaga, ua tatou filifilia foi le taunuuga e o faatasi ma a tatou faatinoga (tagai Teuteronome 11:26–28; 30:15–20; Kalatia 6:7; Faaaliga 22:12).
Ona “[o i tatou] ua tuusaunoa e filifili mo i [tatou lava],” ua pau i o tatou lava luga a tatou faatinoga (tagai Helamana 14:30–31).
Pe a tatou filifili e usitai i poloaiga a le Atua, ua faateleina o tatou avanoa, ma ua tele atu lo tatou saolotoga (tagai 2 Nifae 2:27; MFF 58:26–28; 93:20).
Pe a tatou filifili e le usitai i poloaiga a le Atua, ua faaitiitia o tatou avanoa, ma atonu o le a avea i tatou ma pologa i le amioleaga (tagai 2 Nifae 2:29; Ioane 8:34).
O lo tatou Tama Faalelagi “na te le tuuina atu [tatou] i le tofotofoga e sili i se mea ua [tatou] lavatia; a e saunia … se mea e sao ai,” pe a fai tatou te filifili e tetee atu i le faaosoosoga (1 Korinito 10:13).
E tatau ona tatou faamaulalo i tatou lava ma “tatalo e le aunoa” ina ia mafai ona tatou tetee atu i faaosoosoga (tagai Alema 13:28).

Ina ua mavae le Pau, o Atamu ma Eva “sa ia i laua le saolotoga o amioga po o le mafaia lea ona filifili i le va o le lelei ma le leaga. Ua mafai e lenei mea ona la aoao ai ma alualu ai i luma. Ua mafai ai foi e i laua ona faia filifiliga sese ma agasala” (Talai La’u Talalelei [2004], 50).

Ata na saunia e Matthew Reier, vagana ua faamatalaina; atapu’e o le lalolagi © Corbis; Atamu ma Eva ua Tuliesea mai le Faatoaga o Etena, saunia e Gary Kapp; ata tusi o se alii ma se leoleo na saunia e Robert Casey