Savali a le Au Peresitene Sili
Manulele e togi Faaefuefu o Latou Apaau
Pe a ma le 60 tausaga talu ai, ao avea au ma se epikopo talavou, na maliu ai Kathleen McKee, o se tina ua maliu lana tane i la’u uarota. I ana meatotino sa i ai ma ni manulele fagafao e tolu. O le lua, sa lanu samasama atoa, sa tatau ona tuuina atu i ana uo. O le lona tolu, o Billie, e lanu samasama ae e pisipisia faaefuefu ona apaau. Sa tusia e Sister McKee se tamai tusi mo au: “Pe mafai ona avea lo outou aiga ma ona aiga? E le aulelei o ia, ae o lana pese e sili lava.”
O Sister McKee sa pei lava o lana manulele samasama e togi faaefuefu ona apaau. E lei faamanuiaina o ia i le lalelei, e lei faameaalofaina i le tulaga maoae, pe faamamaluina i se fanau. Ae o lana pese na fesoasoani i isi ia tauaveina ma le lotomalie a latou avega ma mafai ai ona tauaveina a latou galuega.
Ua tumu le lalolagi i manulele samasama e i ai togi faaefuefu i o latou apaau. O le mea e faanoanoa ai e matua toaitiiti lava ua aoao e pepese. O nisi o tagata talavou o e le iloa po o ai i latou, po o le a le mea e mafai ona avea ai i latou pe o le a foi le mea e mananao e avea ai i latou; pau lava le mea latou te mananao ai o le avea ma se tagata. O isi ua faatuapi’o ona ua matutua, mamafatu i le popole, po o le tumu i le le mautonu—o loo ola i ni olaga e matua maualalo atu nai lo le mea latou te gafatia.
Ina ia ola manuia, e tatau ona tatou atiina ae le malosiaga e taulima ai faafitauli i le lototele, lē fiafia i le lotofiafia, ma le manumalo i le lotomaualalo. Tou te fesili, “Pe faapefea ona matou ausiaina nei sini?” Ou te tali, “I le mauaina o se vaaiga moni po o ai tonu lava i tatou!” O i tatou o atalii ma afafine o se Atua soifua, o lē ona le faatusa na faia ai i tatou. Mafaufau i lena mea: faia i le faatusa o le Atua. E le mafai ona tatou talitonu faamaoni i lenei mea e aunoa ma le aafia i se lagona fou loloto o le malosiaga ma le mana.
I lo tatou lalolagi, o le amio pulea ua tele ina foliga mai ua faaitiitia le taua nai lo le lalelei po o le faatosina. Ae mai lava anamua o loo faalogoina pea le fautuaga a le Alii ia Samuelu le perofeta: “E le vaai Ieova pei o le vaai o tagata; aua e vaai tagata i le tino, a e vaai Ieova i le loto” (1 Samuelu16:7).
Ina ua sailia e le Faaola se tagata faatuatua, Na te lei filifilia mai o ia mai le toatele o e faafia-amiotonu sa maua soo lava i totonu o sunako. Nai lo lena, na Ia valaauliaina o ia mai tagata faifaiva o Kapanaumi. O le le mautonu, le a’oga, osovale o Simona na avea ma Peteru, le Aposetolo o le faatuatua. O se manulele samasama e togi faaefuefu ona apaau sa agavaa mo le faatuatuaga atoa ma le alofa tumau o le Matai.
Ina ua filifilia e le Faaola se faifeautalai o le lototoa ma le malosi, Na te lei mauaina o ia i Ona soo ae na maua i Ona fili. O Saulo le faaoo sala na avea ma Paulo le faifeautalai.
Sa filifilia e le Faaola tagata lē atoatoa e aoao atu le ala i le atoatoa. Na Ia faia i lena taimi. O loo Ia faia pea nei—e oo lava i manulele samasama e togi faaefuefu o latou apaau. E valaau o Ia ia te oe ma au e auauna atu ia te Ia i lalo nei. O la tatou tautinoga e tatau ona atoatoa. Ma i la tatou tauiviga, pe a tatou pauu, ia tatou faatoga atu: “Taitai matou, oi taitai matou, Lē Foafoa sili o tagata, mai le pogisa ina ia toe taumafai tasi.”1
Ou te tatalo ia tatou mulimuli i le faataitaiga a le Tamalii o Kalilaia, o lē na maua o faatasi soo ma e matitiva, e na solia i lalo, e na faanoanoa, ma e na puapuagatia. Talosia ia oo mai se pese moni mai o tatou loto a o tatou faia faapea.
Ata na tusia e Steve Kropp
Ata na saunia e Christina Smith; ata tusi na saunia e Maryn Roos