Ia I Ai i le itu o le Alii

Saunia e Peresitene Dieter F. Uchtdorf

Fesoasoani Lua i le Au Peresitene Sili

Aumai mai le “Uo i le Uo,” Liahona, Aperila 1999, U2–U4.

Ao ou laititi, sa ou nofo i Zwickau, i Siamani. Sa i ai se uo a lo’u tinamatua e sina ma uumi lona lauulu. O lona igoa o Sister Ewig, ma sa ia valaaulia lo’u tinamatua i le lotu. Ina ua o atu lo matou aiga iina, na matou vaaia le toatele o tamaiti. Na faagaeetia uma i matou i musika, aemaise lava pesepesega. O se tasi o pese, “E Manao Iesu Ia Ou fai ma Sulu,” na faagaeetia ai au.¹ Na ou lagonaina lou latalata atu ia Iesu ina ua ou usuina. Ou te iloa e finagalo o Ia ina ia ou fai ma sulu mo Ia. Ou te fiafia lava i lena pese—ma le molimau foi na ou maua mai i le Faaola.

O lou aiga atoa—sei vagana ai au, ona e na o le ono ou tausaga—na papatisoina uma ma avea o ni tagata o Le Ekalesia a Iesu Keriso o le Au Paia o Aso e Gata Ai. Ina ua valu ou tausaga, sa papatisoina au e lo’u tama i se vaitaele.

Ina ua 11 ou tausaga, na tuua e lo matou aiga Siamani i Sasae. Na matou malaga atu i Frankfurt, i Siamani i Sisifo. Na ou auai ai i le Paranesi a Frankfurt, ma e le toatele pei o le [paranesi] o loo i Zwickau. E laitiiti le falesa i Frankfurt, ma sa faia vasega i le vaega pito i lalo o le fale. Sa aoaoina matou e faifeautalai i mataupu faavae taua o le talalelei.

O se tasi o faifeautalai, o Elder Stringham, na faafiafiaina au i ana aoaoga e uiga i le Penina Tautele, aemaise lava vaega na iloa ai e Mose o ia o se atalii o le Atua (tagai i le Mose 1:3–4). Sa aoao mai foi e Elder Stringham ia te au le mau o loo faapea mai, “Afai ua ‘au ma i tatou le Atua, o ai se faasaga tau mai ia i tatou?” (Roma 8:31). O le mea lenei ua ou maua ai le mafanafana ma le lototele, ma talu ai ona o le taimi lena, e leai se faamoemoega o le lumanai na i ai i Siamani. O le aai o Frankfurt sa faatafunaina ma o fale sa tu’iina i pomu. O lena aoaoga sa tumau ia te au i lou olaga atoa. Na aoao mai ai ia te au e tatau ona ou i ai i le itu a le Alii. E le mafai ona ou le i ai i le itu a le Alii.

Ou te tuuina atu se luitau ia te outou le fanau ia mulimuli i afioga a perofeta. Afai tou te mulimuli ai, o le a outou maua tali i a outou fesili, e tusa lava pe 6, 9, 11, 19, ou tausaga, pe pei foi o au ua 69!

Faamatalaga

1. “E Manao Iesu ia Ou fai ma Sulu,” Tusi Pese a Tamaiti, 38.

Ia Fai ma Sulu mo Iesu

Ina ua faatoa alu lava Peresitene Uchtdorf i le lotu, na ia faalogo ai i le pese “E Manao Iesu ia Ou fai ma Sulu.” E mafai ona avea oe ma sulu i lou aiga e ala i le faia o mea lelei ma tuu atu ni tusi faafetai faafiafia:

1. Kopi le ata o le la i luga o se pepa manifinifi, ona ‘oti ese lea.

2. Tusi le igoa o se tasi o le aiga i le isi itu o le la, ma valivali i sau lava lanu e pei o le la e te fiafia i ai.

3. I le isi itu, tusi se tusi e faafetai ai i se tasi o le aiga mo mea sa ia faia mo oe.

4. Fai se galuega lelei faalilolilo mo lena tagata, e pei o le teuina o se moega pe gaugau lavalava, ma tuu ai se tusi faafiafia.

Faifeautalai Faapitoa

E pei o Peresitene Uchtdorf, ua avea nei oe ma tagata o le Ekalesia aua sa aoaoina e se tagata faapitoa se tasi o lou aiga e uiga i le talalelei. Fesili i lou tina po o lou tama po o ai na avea ma tagata muamua o le Ekalesia i lo outou aiga, ma vaai pe mafai ona e sailia ē na aoaoina tagata muamua o lo outou aiga i le Ekalesia. Faatumu le tele o tali o i lalo e te mafaia:

O le uluai tagata o le Ekalesia i lou aiga:

O anafea sa ia auai ai i le Ekalesia:

O fea sa ia auai ai i le Ekalesia:

Pe na faapefea ona ia iloa le Ekalesia ma maua ai se molimau:

O ai sa aoaoina o ia e uiga i le talalelei:

Tua atu: ata na saunia e Dilleen Marsh; tusi © Getty Images