Ataata i luga o le Puipui
“Aua le matata’u, fanau iti e, aua e a a’u lava outou, ua ou manumalo fo’i i le lalolagi” (MFF50:41).
“Tina!” O le tagi lea a le tamaitai o Desiree. “Ua ou fefe!”
Sa oo mai loa Tina ma ki faaola le moli o le potumoe a Desiree. Sa faapupuu Desiree i le tulimanu i le mea sa ia iloa ai se ataata na fefe ai. E leai se mea sa i ai iina.
“Sa ou faapea na ou vaai i se luko i lena tulimanu,” o le tala lea a Desiree.
Sa opo e Tina Desiree i ona lima, ia lagona ai e ia le mafanafana ma le saogalemu. “A ola le moli, e mafai ona taua iloa atu e leai lava ma se mea o i ai,” o le tala lea a Tina.
Ina ua lelei le faalogoga a Desiree, sa tape e Tina le moli ma toe foi e moe. Sa moeiini mata o Desiree ma taumafai e moe. Ona pupula lea o lona mata e tasi ma tilotilo atu i le puipui. Sa i ai pea iina ia ataata.
“Tina!” o lana toe tagi lea.
O le taimi la lea e lei fiafia Tina ina ua ia ki faaolaina le moli. Sa vaaia lona vaivai. Sa ia fesili atu, “Desiree, e te manatua le mea sa e matamata ai i le tv analeila?”
Na lue atu le ulu o Desiree. Sa matamata o ia i se polokalama e uiga i luko.
Sa nofo ifoTina i le moega o Desiree. “O mea tatou te matamata ai e mafai ona aafia ai i tatou—o tatou mafaufau, o tatou amioga, ma e oo lava i o tatou faalogoga.”
“Ae o le faafiafiaga sa ou matamata ai e uiga i luko e le leaga,” o le tala lea a Desiree.
“O mea tatou te matamata ai i le televise e mafai ona aafia ai o tatou mafaufau, e tusa lava pe le o se polokalama leaga. Ou te mafaufau lava au o mea sa e matamata ai anapo na i ai sana vaega i ou faalogoga,” o le faamalamalamaga lea a Tina.
Sa mafaufau Desiree i le tala a Tina. Na te lei iloaina lona aafia ai i mea sa ia matamata ai muamua.
“Oka,” o le tala lea a Desiree. “Ua tatau nei la ona ou faaeteete i le filifiliina o mea ou te matamata ai.”
Na ataata Tina. “O se manatu lelei lena, Desiree.”
“Ae faapefea lenei po? O lea lava ou te lagonaina lo’u fefe.”
“E i ai so’u manatu,” o le tala lea a Tina. Sa ia aveese se ata o Iesu Keriso mai i le kesi a Desiree ma aveesea mai i lona faavaa. Ona ia faapipii lea i le puipui o le potumoe i le mea sa vaaia ai e Desiree ataata na fefe ai. “O le a i ai pea o Ia iina mo oe e le aunoa, Desiree. Manatua lena mea pe a e fefe.”
A o tape e Tina le moli, na tumu le loto o Desire i se lagona mafanafana. Sa ia iloa o mea na ta’u mai e Tina ia te ia e moni. O le a vaavaaia pea o ia e Iesu e le aunoa, fesoasoani ia te ia, ma faafilemuina lona fefe.
Ata tusi mai ia Sam Nielson; auiliiliga mai le Keriso ma le Taulealea Mauoa, saunia e Heinrich Hofmann, faaaloaloga a le C. Harrison Conroy Co.