O Le Mana e Sui Ai

Taofia le igoa

E ui lava sa ou fanau mai i totonu o le Ekalesia ma na ou toaga lava seia oo i le 15 o o’u tausaga, ae na ou se ese mai le talalelei i le taimi o le talavou matua. I lena taimi, i le sailiga mo se mea e mafai ona faafiafiaina ai au, sa ou liliu atu i fualaau faasaina.

Sa ou tauivi ma se vaisu sa matua-faateteleina, ma na pei lo’u olaga o se ata tifaga leaga sa le mafai ona ou tapeina. E ui lava sa ou manao e tuu, ae sa ou iloaina sa matua le mafai lava ona ou puleaina ou mafaufauga po o faatinoga. Faatoa ou mauaina le mea na ou lē iloaina i le taimi na ou tuliina ai se faasalaga i le falepuipui mo se solitulafono tau-fualaau faasaina. Sa i ai sa’u kopi o le Tusi a Mamona ma na ou tau atu i le Alema 5:7: “Faauta, na ia faaliliuina o latou loto; ioe, na ia fagua i latou ai le moegase, ma ua latou ala mai ai i la le Atua. Faauta, sa i ai i latou i le lotolotoi o le pouliuli; e ui i lea, sa faamalamalamaina o latou agaga e le malamalama o le upu e faavavau.”

Sa ou iloaina sa ou i ai i le lotolotoi o le pouliuli, ma sa ou manao ia suia lo’u loto.

E le faapea ou te lei taumafai muamua e sui. Sa ou auai atu i nisi o polokalama mo le faamaloloina. Sa ou taumafai e tuu mo au lava ia faapea foi mo lo’u aiga. O na mea uma sa aoga lava mo sina taimi puupuu, ae sa ou sese lava e le aunoa. O lenei fuaiupu i le Alema na aumaia ai ia te au se faamoemoe ia Iesu Keriso—le faamoemoe lea e tusa lava pe leai so’u malosi ou te suia ai au lava ia (ma sa ou iloaina sa leai), e mafai lava e Ia ona suia au.

Ou te manatua lou tuuina atu o le avega o la’u vaisu i le Faaola. Sa ou tatalo ma ta’u sao atu i le Tama Faalelagi, “E le mafai ona ou faia lenei mea na o au.”

Sa ou auai atu i le polokalama a le AAG mo le faamaloloina mai mea ua fai ma vaisu, o se vasega e 12-laasaga e aoaoina e faifeau faamisiona e toalua, o se alii ma sona faletua. O mea na la aoaoina i lena vasega na laveaiina ai au. Sa la faafaileleina le fatu o le faatuatua lea na totoina i le tele o tausaga na muamua atu, ao ou tamaitiiti i le taimi sa ma o ai ma lo’u tina i le lotu. Sa aoao au e faifeau faamisiona e uiga i le salamo ma le faamagaloga. O le mea e sili atu ona taua, na la faaali mai ia te au le alofa ma ta’u mai ia te au e mafai ona ou maua le alofa sili atu mai lo’u Tama Faalelagi ma le Faaola. Sa ou lagonaina “se faaliliuina tele i [lo’u] loto” (Alema 5:12), ma sa ou iloaina o le fiafia lea sa ou sueina mo se taimi umi lava, ae sa i ai pea lava i le talalelei i le taimi atoa.

Ua atoa nei le ono tausaga talu ona ou filifili e liliu atu i lo’u Faaola. Sa tele ni galuega faigata, peitai e ala mai le malosi o le Alii, ua ou manumalo ai mai le tele o faafatiatama’i.

Semanu ou te le iloaina le fiafia ma le olioli lea ua ou mauaina nei i lo’u olaga ma lo’u toalua ma le fanau. Ua ou umia le Peresitua Mekisateko ma ua mauaina sauniga o le malumalu. Ou te faafetaia ai i nei suiga lelei o le olaga ona o Iesu Keriso. O Ia o le mana e suia ai

Ou te molimau atu ia i latou o e o loo tauivi e pei o au—ma i latou e alolofa ia i latou—e mafai ona sui ma o se mea e matua moni lava. E le tatau ona e fiu. E i ai le auala e toe foi ai i le fiafia, ma e ala atu ia Iesu Keriso.

Faamaloloina o Lou Loto Momomo, saunia e Michael T. Malm