Sa Ou Le Toe Popole Lava

Boris Antunez, Chile

Sa faapea o le a matou tufaina atu ni tamaitusi e saili ai ni tagata e faasino atu i faifeautalai mo le gaoioiga o la matou konafesi a le autalavou a le siteki. Sa ou faitauina le Mo Le Malosi o le Autalavou. Ina ua amata le gaoioiga, sa ou toe togiina i luga o le laulau i le mea sa ou maua ai. Ae sa oo mai se manatu ia te au e tatau ona ou aveina. O lea sa ou aumaia ai ma tuu i totonu o a’u tusitusiga paia.

Sa matou popole uma e talatalanoa i tagata matou te le masani ai e uiga i le talalelei, ae ina ua matou tutu e talanoa atu i se tina sa tautau lana tagamea, sa fiafia o ia ma na ia aveina se tasi o a matou tamaitusi. I le taimi o la matou talanoaga sa ia ta’u maia ona popolega mo lona aiga. O se tasi o ana tama tama sa tauivi faapitoa ma fualaau faasaina ma isi faafitauli. Sa matou taumafai i le mea sili e faamafanafana ia te ia, ona matou faaauau ai lea.

I ni nai minute mulimuli ane sa tatalaina au tusitusiga paia. Ina ua ou vaaia la’u tamaitusi o le Mo Le Malosi o le Autavou, sa ou manatuaina le tala a le tina e uiga i lana tama tama ma ou lagona ai e tatau ona ou toe foi i ai. Sa ou le toe popole.

Sa matou mauaina atu le tina o loo i fafo pea. Sa ou fai i ai o loo ia te au se mea atonu e fiafia i ai. Sa ou faamatalaina i ai tulaga faatonuina o a tatou talavou ma ave i ai le tamaitusi la te faitauina faatasi ma lana tama tama. Sa ou matauina lona fiafia i ai. Sa ia valaau i lana tama e sau i fafo, ma sa mafai ona matou setiina se avanoa ma faifeautalai mo i la’ua.

Sa lagona lou pei o se faifeautalai! O se fiafiaga le maua o le avanoa e aoao atu ai ma atonu e fesoasoani ai i lenei alii talavou. Sa ou iloa o le Agaga Paia sa ta’u mai ia te au ou te aveina lenei tamaitusi.