O Le Agaga ua Faatasia ai le Au, Sui o le Korama
O se tasi o tala matagofie ua tulai mai i Aferika i lenei taumafanafana e faatatau i le soka. Peitai, e le faatatau i le Ipu o le Lalolagi.
O loo taaalo i Aferika i Saute i le masina lenei ia au soka lauiloa mai le lalolagi atoa, ma le faamoemoe e manumalo ai i le Ipu o le Lalolagi. O le a faalagolago au taaalo i le tasi ma le isi, i o latou faiaoga, ma o latou tagata tapuai ina ia latou oo atu ai i taamilosaga faaiu. Faatasi ai ma tagata taaalo ma a latou au tapuai mai atunuu eseese, ua matuai malosi lava le agaga o le galulue faatasi o au taitasi.
Peitai e leai ni tagata o se au o le a sili atu ona faamaoni le tasi i le isi, o latou faiaoga, ma a latou au tapuai nai lo le korama a ositaulaga mai le Uarota a Kagiso, Siteki a Soweto Aferika i Saute, e ui ina e le o taaalo mo le Ipu o le Lalolagi. Ua sili teisi atu ma le tausaga, na faailoa atu ai le toalima o nei alii talavou i le Ekalesia e lo latou faiaoga soka, o ia foi o se tagata e lei leva ona liliu mai. O le taimi nei ua i ai i latou i le fatu o se isi “au”—o la latou korama a ositaulaga—ma galulue faatasi ai ma se isi “faiaoga”—o lo latou epikopo—a o latou ola i le talalelei i lea aso ma lea aso ma sauniuni ai e auauna atu o ni faifeautalai faamisiona.
Sa Atamai le Faiaoga o Solomona
E pei o le toatele o tagata i Aferika i Saute, e ese le fiafia o Solomona Eliya Tumane e 29 tausaga i le soka. Na te faaaluina le tele o itula i vaiaso taitasi e faiaoga ai i le Kalapu Soka a le Hurricanes. E alofa tele o ia i lana au taalo ma olioli i lo latou faamanuiaina. Latou te alolofa foi ma faaaloalo ia te ia. O lea, ina ua auai le Faiaoga o Solomona i Le Ekalesia a Iesu Keriso o le Au Paia o Aso e Gata Ai, sa fiailoa foi e lana au taalo.
“E sau sao lava o ia mai lana vasega inisitituti,” o le tala lea a Siyabulela Manyakanyaka lea e faaigoa ia McDonald, e 17 tausaga. “Matou te iloa atu lava ana tusitusiga paia ma mekasini a le Ekalesia i totonu o lana ato, o lea na amata ai ona matou tuufesili, ma ina ia tali mai, e faitau mai ai o ia ia i matou,” na fai mai ai Thapelo Benjamin Sesinyi, e 17 tausaga.
“Sa ou naunau lava e aoao nei fanau talavou ona ou te alofa tele ia i latou,” o le tala lea a le Faiaoga o Solomona. “Ou te manao ia latou o i le ala sao. Sa ou fai atu i se tasi o i latou, ‘O le a manuia au taumafaiga pe a e faitau i tusitusiga paia,’ o lea na latou amata faitauina ai tusitusiga paia. Sa latou fiafia i ai, o lea na ou aoaoina ai i latou e uiga i le tatalo. Ona oo lea i se tasi aso sa latou faateia a’u. Sa ou vave taunuu atu i toleniga, ma sa ou faia sina moeiini laitiiti ae latou fafaguina au ma fai mai, ‘Faiaoga, e tatau ona matou asiasi atu i lau lotu.’ O se aso lena o le a le mafai ona galo ia te a’u, aua na ou iloa ai sa agai atu i latou i le ala sao.”
Ma se Faatagaga
Ae sa le mafai e le faiaoga ona faataunuu lena tulaga e aunoa ma se faatagaga a o latou matua. Sa oo atu o ia i aiga o tama taaalo taitasi, e tai tasi i le taimi, e talosagaina pe talafeagai pe a valaaulia tama taaalo i le lotu. Na malilie i ai matua. “Sa matou o mai i le lotu i vaiaso sosoo e tolu,” e manatua ai e Thapelo. “Sa matou mananao e suesue ma saga suesue pea.” O lea na toe talosagaina ai foi e le faiaoga se faatagaga mai i matua, ae o le taimi lenei e mo tama taaalo e suesue faatasi ai ma faifeautalai faamisiona. Ma na toe malilie foi i ai matua.
“Sa tofu i matou ma se kopi o le Tusi a Mamona na aumai e faifeautalai,” o le tala lea a McDonald. “Sa la faatonuina i matou e faitau ma tatalo e uiga i ai aua ua moni, ma sa matou faia lava. Sa ou tatalo ma faitau ma ou iloa ai e moni le Tusi a Mamona.” Sa faapena foi isi tama taaalo, o lea na papatisoina ma faamauina ai. E toalima tagata o le au ua avea nei ma tagata o le Au Paia o Aso e Gata Ai.
Sini o le Talalelei
O le tele o au e faatutu ni sini mo se manumalo i le taamilosaga, ae o nei talavou e toalima o le au a le Hurricanes o loo taumafai foi mo se isi sini e le o toe mamao atu i le lumanai. Faatasi ai ma le taitaiga a Epikopo Bongani Mahlubi, o se tamalii ua latou manatu i ai o se faiaoga faaleagaga, ua latou sauniuni ai mo le auaunaga faafaifeautalai faamisiona.
“O i latou o se malosiaga tele i la matou uarota,” o le saunoaga lea a le epikopo. “Ma o i latou o se tino o lena au maoae o le au perisitua o e o loo umia le Perisitua Arona ma le Perisitua Mekisateko i le lalolagi atoa. E fai faatasi e nei alii talavou ia mea uma lava—latou te savavali faatasi i le aoga, taaalo soka faatasi, o faatasi i le seminare, ma auauna faatasi i le perisitua. Afai ou te fai atu i se alii talavou se toatasi pe mafai ona fesoasoani mai, e o mai uma ai lava le toalima.” Fai mai McDonald e suesue e le aunoa le korama a ositaulaga mai le Tala’i La’u Talalelei, ma fai mai Thapelo i le faaopoopo atu lea i le valaaulia o uo i le lotu, e saili foi e sui o le korama i latou ua le toe auai mai. “O le tele lava o itu, o loo matou aoao e avea ma faifeautalai i le taimi nei,” o lana tala lea.
“E masani ona matou faalogo i nei alii talavou i lotu molimau,” o le saunoaga lea a le epikopo. “E masani ona latou folafola atu i le Faiaoga o Solomona o le a latou o e fai ni misiona.” E leai se mea o le a sili atu ona fiafia ai lo latou faiaoga soka. “Ua le mafai ona tatali lou fia vaai ua latou auauna atu,” o le tala lea a Solomona.
O le lotogatasi, malamalama o le talalelei, ma se aoaoga faamasani e uiga i le auaunaga—o vaega uma na o se faiga mausali o se aoaoga faamasani mo e ua faamoemoe e avea ma ni faifeautalai. Ma le isi, o nei alii talavou ua uma ona latou atiina ae se naunautaiga malosi e galulue faatasi e faia mea lelei. E pei foi o au soka o loo tausinio mo le Ipu o le Lalolagi, e faalagolago foi i latou i le tasi ma le isi, i o latou faiaoga, ma a latou au tapuai (e aofia ai tagata o le uarota, aiga, ma uo) ina ia latou sao atu i la latou “suega siamupini.” Faatasi ai ma lena ituaiga agaga i le au, o le a faapea ona ausia ai a latou sini.
O le au taaalo o Siyabulela “McDonald” Manyakanyaka, Thapelo Sesinyi, Emmanuel Pebe, ma Lawrence Tsetse o se vaega na auai i le Ekalesia ona o le faataitaiga a lo latou faiaoga o Solomona Tumane (ogatotonu).
Ata na pueina e Richard M. Romney