Fesoasoani Tagata na Faasaoina mai i Afa i Isi Tagata na Afatia
E ui ina uma ona faalolovaia e le Afa Fulifao o Ketsana le laumua o Filipaina, o Manila, ma eria lata ane i le faaiuga o Setema 2009, ae sa le gata ai iina le faatafunaga. Sa le muta foi ina ua uma ona osofai atu le Afa Malosi o Parma i itu i matu o le Atu Filipaina i le na o le valu o aso na sosoo ai. Sa le uma ai lava le faatafunaga ina ua toe sui le alamatagi a Parma ma toe taia ai foi i nai aso mulimuli ane e se matagi malosi, lea na faateleina atili ai mea na faaleagaina.
E ui i lea, sa lei nofoa’i ai le Au Paia i Filipaina atoa, e oo lava ia i latou sa tauivi e toe faatulaga o latou olaga mai matagi na muamua atu, mo le faatamaiaga lona tolu ma le mulimuli a Parma, e amata fesoasoani atu ia i latou sa manaomia le fesoasoani.
Foai Atu o Mea Na Faasaoina
O le Aai o Parañaque, e lata i Manila, sa taia e le Afa Fulifao o Ketsana i le faaiuga o Setema. I le taimi na sili ona matautia ai le matagi, na faatafea ai se epikopo o se tasi o uarota e fa i le lotoifale i se ufi o se pusaaisa momi opeopea i vai tatafe e pau mai i lona ua le maualuluga, e fesoasoani e aveese mai ni aiga se toatolu. Na le oo le sauniga faamanatuga i le aso na sosoo ai; ae peitai, o le toatele o tagata o le uarota na aafia, e ui ina feagai foi i latou ma taunuuga o le afa, ae sa potopoto i le falelotu i ofumoe, ofuvae pupuu, ma peleue, i le la’uina atu o mea taumafa ma lavalava e tuuina atu ia i latou na manaomia le fesoasoani. Pe tusa ma le lua itula, ae asia uma aiga o le uarota, siaki, ma fesoasoani atu i ai.
Ma, e na o le lua po talu ona uma ona asa le toatele o i latou i mea e tele na faaleagaina o o latou lava alalafaga, ae faapotopoto tagata o le eria a Parañaque i lo latou falelotu ma tuufaatasi ni taga lavalava se 26, ia na latou foaiina, faavasega ma tuu taga uma.
“O se tasi o afiafi faaleaiga aupito faagalo gata mo le tele o aiga o la matou uarota,” o le saunoaga lea a Epikopo Franco Advincula.
Sa valaau mai i le epikopo se tuafafine mai se aiga na manaomia le fesoasoani, e fesili po o afea e mafai ona tuuina mai ai a latou foai. “Sa faateia lava au, ma sa ou le maua foi ni upu talafeagai e fai atu,” o le tala lea a Epikopo Advincula. “Ae peitai, sa musuia au e le tatau ona ou taofia mai lenei tuafafine lelei le avanoa e fesoasoani atu ai.”
Fesoasoani Pea lava Pea
Ina ua taia e Ketsana ia Metro Manila, fai mai le peresitene o le Itu a Alamino Filipaina, o Porferio Balute Jr., sa musuia o ia e talosaga atu i tagata o lana itu e fesoasoani atu i o latou tuaoi o loo i saute. Peitai, e toatele tagata o le Ekalesia i le itu o Alamino sa toe tau faatulaga lelei mai o latou olaga mai le Afa Malosi o Emong, lea na taia ai i latou i le fa masina na muamua atu ia Me 2009. O le afa aupito sili lea ona matautia ua taia ai lena aai i sisifo o Filipaina. O le toatele o tagata o le ekalesia e ola i le fagogota po o le faifaatoaga, ma na faatamaia uma a latou galuega e lologa na sosoo ai.
E ui ina popole o ia e talosaga atu mo ni mea se tele mai ia i latou o e na tauivi pea ia toe tulai mai i ni tulaga lelei, ae sa talosaga atu pea i ai Peresitene Balute.
O lena aoauli na taunuu ane ai le au paia i le falelotu ma ni taga lavalava se 21, o se taga meaai ma le tupe Filipaina e $1,500.
Ina ua agi le afa o Parma i se vaiaso mulimuli ane, o le taimi lenei i le itu i matu, na toe tali atu foi le au paia a le itu o Alamino ma tuu faatasia nisi lavalava e tele atu, meaai, ma tupe. Na iu lava foi ina ofo atu nisi o i latou e o e tufa atu ia mea.
“Sa na ona matou mananao e fesoasoani atu,” o le saunoaga lea a Peresitene Balute. “Matou te lei iloaina lava o le a matou maua nei mea e tele. Sa faatupulaia o matou faatuatua, na faateleina lo matou alolofa i o matou uso a tagata, na faamalosia a matou molimau, ma na atili loloto o matou malamalama i le alofa o le Faaola ma Lana Togiola.”
O Le Le Manatu Faapito ma le Talitonu o le a Lelei Mea Uma
O Elder Kendall Ayres, o le o loo auauna atu ma lona faletua i le polokalama o le Tupe Faaagaga mo Aoga, sa tofia e vaaia ma faatulaga le tufatufaina o sapalai. Sa ia faamatalaina le lotogatasi o le Au Paia Filipino i lenei taumafaiga mo le toomaga.
“O se mea e maofa ai le vaavaai atu i le maua e i latou o e ua sili ona tele mea na aveesea, le tele o lo latou toomaga i le liliu atu ma le tuuina atu o le fesoasoani i isi o e ua tutusa lava le ogaoga o o latou aafiaga,” o le saunoaga lea a Elder Ayres. “Ua ou malamalama i le uiga o le ‘faamaumau lou ola ona maua ai lea’ i se auala ou te lei oo muamua lava i ai. Ia te au lava ia ua le o toe avea ma se aoaoga—ae o se faatinoga. Ua sili atu ona tele talosaga mo le fia auai nai lo manaoga e fia faataunuu. O le sasaa mai o le alofa ma taumafaiga ua toetoe lava a le mafai ona malamalama i ai; ua o se faaaliga.”
“O tagata Filipaina e tele lava ina toe vave oo i tulaga lelei,” o le saunoaga lea a Elder Benson Misalucha, o se Fitugafulu Eria o le Eria a Filipaina. Nai lo le vaai atu i le ipu malamalama e afa pe ua toeitiiti foi uma, “sa matou vaai atu i le ipu malamalama ma faapea ifo, ‘Ia, o se ipu malamalama manaia, e tusa lava pe leai ni vai o i ai.’”
Na tuua ai foi taavale mafulifuli pe tanumia i nofoaga na lolovaia ona o le afa malosi i Pangasinan, Filipaina. Na aapa atu tagata o le Ekalesia e fesoasoani atu ia i latou na manaomia le fesoasoani, e ui ina sa aafia foi i latou.
Ata na pueina e Nate Leishman