Tala Faamamai o le Talalelei
Fausia i luga o le Papa
I le 1847 o le Au Paia o Aso e Gata ai, i lalo o le taitaiga a Peresitene Polika Iaga, … [na poloaiina] e faatulagaina i latou lava i ni vaega taiselau, tailimasefulu, ma le taisefulu, e saunia ai mo le malaga umi ma le faavaivai tagata o taavale e toso e povi e agai i le Vanu o Sate Leki.
Ma o lenei la ou te fia tuuina atu ni nai fesili: Pe mata o se tulaga atamai pe talafeagai i soo se tasi i lenei vaitaimi le taumafai e faataunuu tulaga na tuuina atu i lena faaaliga? Mata o le a sou manatu i se tagata, i le vaitaimi o nofoaafi ma taavale ma vaalele, ae nonoa faatasi ni povi iinei i Iuta, ma amata se malaga mo le Vaitafe o Misuri? …
O le lesona ou te fia tuuina atu o lenei: o i tatou o ni tagata alualu i luma, aua o i tatou o le nuu o le Atua, ma ona o lena ua ia i tatou le aia e faaaogaina ai ni metotia faaonapo nei, o nei meafaigaluega faasaenitisi toe faaleleia, ua saunia e le Alii ma tuuina mai i o tatou lima mo le faalauiloaina o Lana galuega ofoofogia. …
O Le a le Mea ua Ese Ai i Tatou?
I le tele o tausaga ua mavae na sau ai i Iuta se taitai atamai o [se isi] lotu … , ma sa faia se ma talanoaga. Sa ia auai i se sauniga faamanatuga “faaMamona” ma e tele ni ana faitioga i le auala o loo tatou taulimaina ai le Tausamaaga a le Alii, ae maise lava i lo tatou faaaogaina o le vai nai lo le uaina i na sauniga. Fai mai a ia na ia gatete ina ua ia vaai atu i tagata o mitiina le vai; ma na ia faasino maia le mea moni, ona o le mea moni lava, e tusa ai ma le Tusi Paia o le Faaola, ina ua Ia faatulagaina le faamanatuga i tagata Iutaia, na faaaogaina le uaina, ma folafola atu o Lona toto lena pe e suitulaga i Lona toto. E mafai ona ou faaopoopo atu o le Tusi a Mamona o loo tau mai ai foi na faaaogaina e le Faaola le uaina ina ua Ia folasia atu le faamanatuga i sa Nifae.
O la’u … uo, pe na ia iloaina pe leai, sa mauaina tonu lava le mea taua e iloa gofie ai ma ese mai ai le Ekalesia a le Atua mai isi lotu uma lava i lalo o le la—o lenei, ao fausia isi ekalesia i luga o tusi ma tu masani ma aoaoga a tagata, o lenei Ekalesia e fausia i luga o le papa o Keriso, i luga o le mataupu faavae o faaaliga e vave oo mai ma auauai mai pea. O le Au Paia o Aso e Gata ai e le faia ni mea ona o loo lolomiina i se tusi. Latou te le faia ni mea ona sa ta’u atu e le Atua i tagata Iutaia e fai; latou te le faia foi pe tuua se mea e le faia ona o faatonuga na tuuina atu e Keriso i tagata o sa Nifae.
So o se mea lava e fai e lenei Ekalesia e fai ona o le Atua, o loo fetalai mai le lagi i o tatou aso, ma ua poloaiina lenei Ekalesia e faia. … O le faavae lena o le Ekalesia a Keriso. Afai tatou te faaaogaina le vai nai lo le uaina i le faamanatuga o le Tausamaaga a le Alii, ua faia ona ua poloaiina ai e Keriso.
O Le Galuega a le Atua e Agai i Luma
O faaaliga faalelagi e fuafuaina lava i tulaga ma manaoga o tagata, ma mai lea suiga i lea suiga ao agai i luma le galuega a le Atua i lona taunuuga. E le lava le tele po o le lelei o se tusi e taitaia lenei Ekalesia.
I le faia o lenei tala, ou te tautala ma le ava e tatau ai i afioga tusitusia a le Atua, lea o loo lolomiina i tusi, o se vaega o na tusi atonu ua tuai, ina ua maea ona faataunuuina o lona faamoemoega ma ua taatia i le fata, ao le isi vaega o loo malosi, tumu i le ola, ma fetaui tonu i lo tatou tulaga o i ai nei—o lo tatou tulaga o i ai nei o le atiina ae. Ae oo foi i lenei vaega e tatau ona faamatalaina sao. E le tatau i se tagata ona finau mo mea o loo i totonu o tusi, i le fofoga fetalai o le Atua, o le e saunoa mo Ia ma faamatalaina Lana upu. O le faia faapea o le faananau atu lea i tusi mate nai lo le profeta soifua, e masani lava o se tulaga sese.
O le mea na fetalai atu ai le Alii i le au Iutaia ma sa Nifae i le 2,000 tausaga talu ai po o mea na Ia fetalai atu ai i le Au Paia o Aso e Gata ai i le 50 po o le 60 tausaga talu ai e leai lava sona malosi i le taimi nei vagana ua fetaui tonu lava ma faaaliga o aso-nei, faatasi ai ma faatonuga lata mai a le Alii i Ona tagata e ala mai i Ana auauna filifilia pe valaauina; ma o i latou e le amanaiaina lenei mea moni o le a ono oo i puapuaga. O le afioga sili ona lata mai mai le Atua e tatau ona faalogo i ai, nai lo se isi faaaliga tuai, tusa lava po o le a le moni.
O le Atua lava lena e tasi o loo faapea mai, fai lea ma lea i le aso nei e mafai ona faaleaogaina lena poloaiga taeao, e aunoa ma le suia po o le le ogatusa foi. O le malo, e tailua tausaga ma fono, faaleaogaina tulafono tuai po o ana galuega faatino ua mavae ua uma le aoga; ae leai se tasi e mafaufau e molia le au faitulafono ona o le fesuisuiai po o le feteenai o i latou lava. E faapefea la ona mafaufau e le tumau le Atua pe afai e fetalai mai nei o Ia i se mea ma toe suia i le aso e sosoo ai po o le isi masina po o le isi tausaga ina ia fetaui ma tulaga ua suia ai?
Na Ia poloaiina Aperaamo e fasioti lona atalii, ma na saunia Aperaamo e faia lena mea ae o le Atua lava lena e tasi na toe fetalai mai, “Soia le oo lou lima i le tama” [Kenese 22:12]. Sa i a Aperaamo se tiute … e usitai i le poloaiga lona lua nai lo le muamua; ma semanu e solitulafono pe a na le faia.
E Tatau Ona Tatou Tuliloaina
E ono ou faaauauina pea le autu e faavavau ae o le a faaiuina nei i se manatu lenei. O le Galuega a le Atua o loo alualu i luma. E suia lona foliga ae le suia lava ona mataupu faavae. O upu moni o loo faavae ai e faavavau, e lē masuia, ae tele tulafono lea e sui ma sui ma sui, ao agai pea i luma le galuega a le Atua. O le talalelei faavavau o se mea e sili atu nai lo le solaese mai le afi, o se auala e aluese mai ai i tulaga matautia. O se fuafuaga paia mo le alualu i luma faaletagata, o le ala i le atoatoa; ma o le agaga o le talalelei o le agaga o le toefaaleleia, o le agai i luma.
O le galuega a le Atua o le a agai pea i luma, ae pe o le a mafai e oe ma a’u ona o atu faatasi ai? … E faapefea ona tatou o faatasi ma le galuega a le Alii? E i ai lava le auala e tasi, ma o le faia lea o mea ua Ia poloaiina mai ae tuu mea ua Ia faasaina. …
Ou uso e, ma tuafafine o le Ekalesia a Keriso! Ia tatou ala mai ma tutu i luga ma faia loa. … Faaauau le faia o se mea mo le Atua, ina ia faatasi le agaga o Lana galuega ia te outou ma taitaiina outou i lena ala “ma e tuputupu pea le pupula o lea malamalama seia oo mai le aso atoatoa ona lelei” [tagai MFF 50:24].
O Le Alii o Iesu Keriso, saunia e Del Parson
O Le Ositaulagaina o Isaako, saunia e Jerry Harston, © IRI