Au Paia o Aso e Gata ai i Kemupotia: Ua Agai atu i se Ala Fou
E ui sa feagai ma tofotofoga sili ona faigata i le taimi ua tuanai, a ua iloa e le Au Paia o Aso e Gata ai i Kemupotia o le talalelei a Iesu Keriso ua tuuina atu ai ia i latou le faamoemoe mo le lumanai.
I le ogatotonu o le taimi o le tautotogo ma timuga i Phnom Penh, Kemupotia, o le vaitafe o le Tonle Sap River—lea sa tafe atu i le Vaitafe o le Mekong mo ni masina—sa lē usita’ia lona ala masani a ua suia le itu e tafe i ai i le isi itu.
O lenei suiga o le itu na mafua ai ona lolovaia le vaituloto o le Tonle Sap o loo i le ulu o le vaitafe ma na faalimaina lona maualuga, ma na aumaia ai foi le tele o le meaai-manaomia mo ia ma manu felelei e aai iina.
E pei o le vaitafe na suia lona ala, na lagona e le au paia i Kemupotia le ala na fesoasoani ai le talalelei a Iesu Keriso e suia le ala o o latou lava olaga. Ua matua faatumulia nei o latou loto i le olioli ma le filemu ua aumaia e le talalelei. O lenei lolovaia o le olioli ua tuuina mai ai meaai faaleagaga mo o latou agaga.
E ui lava sa feagai le atunuu ma taimi pogisa, ae o le talalelei a Iesu Keriso sa fesoasoani i le toatele o tagata o Kemupotia e iloa atu ai le malamalama o se aso fou o loo susulu mai le pogisa o le taimi ua tuanai.
Suia o le Ala
I le taimi o le vevesi o mea tau polokiki o le atunuu i le vaitaimi o le 1970, e tele tagata o Kemupotia na tuliesea mai o latou fale ma na maliliu tagata o latou aiga.
O Loy Bunseak, le peresitene o le Paranesi o Siem Reap i le Misiona o Kemupotia Phnom Penh, sa iva ona tausaga i le 1975, ina ua faamalosia lo latou aiga e tuua lo latou fale. O i latou—faatasi ai ma le faitau miliona o isi—sa faamalosia e faatino ni galuega mamafatu i laufanua tetele o le atunuu.
O le taimi lena, na maliliu ai matua o Peresitene Loy ma le toalima o ona tei mai le toavalu [sa i ai].
E ui lava i faigata, sa i ai pea ia Peresitene Loy se mea se tasi sa fesoasoani ia te ia i ona tiga.
“Sa i ai pea ia te au le faamoemoe,” o lana tala lea.
O le faamoemoe mausali na fesoasoani ia Peresitene Loy e manumalo ai i tofotofoga o lona olaga talavou o le faamoemoe lava lena e tasi na mafai ai e ia mulimuli ane ona iloa le moni o le talalelei a Iesu Keriso.
Ona o Kemupotia o le atunuu e tele lava ina lotu Puta [Budda] tagata, sa tuputupu ae Peresitene Loy e aunoa ma se malamalamaaga ia Iesu Keriso. Na amata ona aoao o ia e uiga i le Faaola ina ua malaga atu faifeautalai o le Au Paia o Aso e Gata Ai i lo latou fale ma ta’u atu ia i latou e i ai se la savali taua e faasoa atu.
“Pe a na ou le feiloai i faifeautalai, semanu ou te le faalogo lava ia Iesu Keriso,” o lana tala lea. “Sa ou manao e aoao atili e uiga ia te Ia.”
Ina ua mavae ni suesuega ma ni talanoaga loloto, sa papatisoina ia Peresitene Loy ma lona aiga i le 2001.
“Sa fesoasoani faifeautalai ia te au e aoao mai le Tusi a Mamona, ae na ou mauaina la’u molimau o lona moni mai le Atua,” o le tala lea a Peresitene Loy. “Sa mafai ona ou vaai i le auala na ola ai i aoaoga o le Tusi a Mamona, na faafiafiaina ai lo’u aiga.”
O le aafiaga na oo i ai Peresitene Loy e le o se mea fou. O Khan Sarin, o le peresitene o le Paranesi a Sen Sok i le Itu o Phnom Penh i Kemupotia i Matu, sa aveesea mai lona aiga ao talavou ma na faamalosia e galue i laufanua.
“Sa ou lagonaina le leai o se faamoemoe i lena taimi,” o le tala lea a Peresitene Khan. “Sa ou le iloaina pe mafai ona ou ola pea.”
I le toe tepa i tua, na lagona ai e Peresitene Khan na puipuia o ia e le Alii mai faigata i le tele o taimi o lona olaga. Ao avea ma se alii talavou sa ulufale o ia i le ami ma sa fanaina o ia pe tusa ma le 20 futu (6m) le mamao ae lei lavea. Sa tu foi o ia i luga o le tele o maina ola na i le eleele, ae le’i pāpā. E tasi le maina na i le eleele na tu ai ma sa pa, ae le’i manua tigaina o ia.
Ona o tulaga matautia na i ai fitafita, sa latou faia soo se mea e mafai ona puipuia ai i latou. O le toatele o alii i le militeli na tata ni pe’a i o latou tino ona sa latou talitonu o pe’a e mafai ona faasaoina mai i latou.
“Ao lei avea au ma se tasi o le Ekalesia, sa ou le iloaina se mea,” o le tala lea a Peresitene Khan. “O lenei la ua ou iloa o Iesu Keriso—ae le o pe’a—na faasaoina mai au.”
Ina ua uma ona feiloai le faletua o Peresitene Khan, o Suon Sokmo, i faifeautalai ma ua papatisoina, sa faagaeetia o ia i suiga na mafai ona ia vaaia ia te ia. Sa ia taliaina lana valaaulia la te suesue faatasi i tusitusiga paia, ma e lei umi ae tonu loa ia te ia e papatiso.
“O le mea e sili ona taua na ou mauaina i lo’u olaga o le molimau lea na ou maua mai le suesue i tusitusiga paia,” o lana tala lea.
O Pich Sareth, o se tasi o le Paranesi 12 a Phnom Penh i le Itu o Phnom Penh Kemupotia i Matu, sa vaai foi i tofotofoga i le taimi ao laitiiti o ia. Sa na o le lima ona tausaga ae aveesea loa o ia mai lona aiga ma faamalosia e galue i laufanua. O nisi o taimi e na te su’eina ai ni paa po o ni lane e mafai ona ia aia e faamalie ai lona fiaai.
O le faletua o Brother Pich, o Seng Tha, ma lona aiga na faamalosia foi e o ese mai lo latou fale. Ona sa na o le fa ona tausaga ma sa laitiiti, sa le manaomia ona galue o ia, e pei o isi tamaiti. Sa aveesea o ia mai lona aiga i le vaega tele o le aso ma na vaaia e olomatutua sa le mafai ona galulue.
Ina ua uma ona ia feiloai i faifeautalai i le 1995, na amata ona aoao Brother Pich ma lona faletua e uiga i le alofa o le Tama Faalelagi mo i latou. “I taimi o o’u faafitauli, sa mafai ona ou iloaina o le tatalo e fesoasoani ia te au e foia ai,” o le tala lea a Brother Pich. “Na ou iloaina e popole mai le Tama Faalelagi.”
Ina ua uma ona filifili Brother Pich e papatiso, sa maua foi e lona faletua se molimau o le talalelei ma sa papatisoina.
O se Lolovai o le Olioli
Talu mai o la papatisoga, ua matauina e Brother Pich ma lona aiga le olioli lea na tatupu mai i le mauaina o se molimau ia Iesu Keriso. E faaaluina e le aiga o Pich le taimi i aso taitasi e faitau ai tusitusiga paia. Ao latou faia lenei mea, na sasala le manogi o le talalelei i o latou agaga.
“Matou te lagonaina ua matou i ai nei i le ala sa’o, ma matou te mananao e tumau ai i lenei ala vaapiapi ma faaauau pea ona alualu i luma,” o le tala lea a Sister Seng. “Ou te faafetai i aso uma ua mafai ona ma i ai faatasi ma le ma fanau i luga o lenei ala.”
O le olioli lea ua lagonaina e Peresitene Loy ua faalauteleina i itu uma e lua—i ona tuaa ae faapena foi i ē tupuga mai ia te ia. Sa asiasi atu Peresitene Loy ma lona aiga i le Malumalu o Hong Kong i Saina i le 2004. E le gata na faamauina le faletua o Peresitene Loy ma lana fanau ia te ia, ae na faia foi sauniga faaola o le malumalu mo lona tama, tina, ma ona uso ma tuafafine na maliliu.
“E matua le mafai ona ou faamatalaina le olioli na ou lagonaina i totounu o le malumalu,” o le tala lea a Peresitene Loy. “Na ou iloaina sa faamalosia lo’u aiga. Ou te iloa o le malumalu e manaomia mo aiga ina ia mafai ona nonofo faatasi ai e faavavau.”
Sa maua foi le avanoa e faamau ai Peresitene Khan ma lona aiga o se aiga e faavavau i le Malumalu i Hong Kong. “O le lagona sa ou faalogoina i le malumalu o se mea ou te lei faalogoina muamua lava. E faigata ona faamatalaina o’u lagona i upu,” o le tala lea a Peresitene Khan.
Meaai e Ola Ai
Faafetai i le faasalalauina o le talalelei, ua mauaina e le au paia i Kemupotia meaai faaleagaga latou te manaomia e ola ai. E ui lava ua ola le Ekalesia i Kemupotia, e faamoemoe le au paia o lenei tuputupu ae e na o se taimua i se fua tele mai o le talalelei i lo latou atunuu.
E pei lava ona maua ai e i’a ma manu ia meaai e manaomia ina ua pa le Vaituloto o le Tonle Sap, ua faapena foi ona maua e se numera faatupulaia o tagata Kemupotia ia meaai faaleagaga, e tatau ai ona latou faafetai i le naunautaiga tele o loto o tagata o le ekalesia e faasoa atu le talalelei.
“Pe a ufiufi se ulo, e puna i lalo le vai,” o le tala lea a Peresitene Khan. “O le lagona lenei o loo i totonu o lo’u loto. E tatau ona tatala lo’u loto ma ta’u atu i tagata uma le mea o loo ou lagonaina.”
E faamoemoe Peresitene Loy o le aoga faavavau o le talalelei ua aoaoina i lona aiga o le a mafai ai e lana fanau teine ona faaauauina le opoina mai o le talalelei ma aoao a latou fanau.
“Ina ua ou malamalama e uiga ia Iesu Keriso, na amata ona lelei mea uma i lo’u olaga ma lo’u aiga,” o lana tala lea. “O le i ai o le perisitua i lo’u aiga e tuufaatasia ai i matou. A i ai sa matou faafitauli, matou te nonofo i lalo ma talanoaina o se aiga.”
Talu ona tuuina mai e le malo o Kemupotia le faatagaga e faalauiloa aloaia ai le Ekalesia i le 1994, e faitau afe ma afe tagata Kemupotia ua taliaina le talalelei. Ua tulimatai atu le aiga o Pich i le aso o le a oo atu ai le talalelei i vaega uma o le atunuu. Ua faapea mai Brother Pich, “Ou te faamoemoe e i ai se aso o le a i ai se malumalu i Kemupotia.”
E ioe Sister Seng: “O loo soifua le Tama Faalelagi ma Lona Alo, o Iesu Keriso. O lo’u faamoemoe mo le lumanai, ia faaauau pea le faatupulaia o le Ekalesia ina ia mafai ona fausia se malumalu.”
Ua matauina e Peresitene Khan ala ua suia ai lona olaga talu ona aoao i le Faaola. E talitonu o ia ua na o le talalelei a Iesu Keriso e mafai ai ona faamaloloina tagata o Kemupotia mai o latou tofotofoga ia ua mavae.
“Ina ua uma ona avea au ma se tasi o le Ekalesia, sa ou le toe lagonaina le tele o tiga na ou lagonaina mai mea na tutupu i aso ua mavae. Na ou mauaina se malamalama fou ou te lei mauaina lava muamua,” o lana tala lea. “Ua pei e fou mea uma lava.”
Ata na pueina e Chad E. Phares, vagana ua ta’ua
Itulau faafeagai: Loy Bunseak, peresitene o se paranesi ma se taiala o tagata asiasi mai i Siem Reap, o loo faaali atu i tagata asiasi ia malumalu anamua o le aai. Na ia mauaina foi ni avanoa e aoao atu ai e uiga i malumalu o le Au Paia o Aso e Gata Ai e ala i le faapipiiina o se ata o le Malumalu o Hong Kong i lana taavale e feavea’i ai maimoaga. Agavale: E ui lava i lona lagona o le leai o se faamoemoe i taimi ao laitiiti, na auai le peresitene o le paranesi o Sen Sok o peresitene Khan Sarin i le Ekalesia ina ua valaaulia o ia e lona toalua, o Suon Sokmo, la te suesue faatasi i tusitusiga paia. Luga: Phnom Penh.
Lalo: O se falelotu faatoa maea o loo faaaogaina e le au paia lea o loo faatupulaia pea le aofai o tagata o le ekalesia i le laumua o Kemupotia o Phnom Penh. Lalo: Ao laiti i laua, o Pich Sareth ma lona toalua, o Seng Tha, na aveeseina mai i o laua aiga mo ni taimi uumi. La te lagonaina le agaga faafetai mo le avanoa e faaaluina ai lo la’ua taimi ma le la fanau ma aoao i latou i totonu o le Ekalesia.
Tua atu © Getty Images; atapu’e o le Malumalu o Saina i Hong Kong saunia e Craig Dimond
E ui lava i fausaga anamua ma e tele malumalu i Kemupotia, ae ua aumaia e le talalelei se lagona faafouina i olaga o tagata o le Ekalesia iinei.
Tua atu © Getty Images