O Le a le Lalelei Moni?

Na saunoa mai Peresitene Monson i lenei savali, “I lo tatou lalolagi, o le amio pulea ua tele ina foliga faaitiitia lona taua i lo le lalelei po o le faatosina.” Atonu o loo tauivi tamaitai talavou ma o latou faatusa po o ai i latou ma le tulaga e mafai ona avea ai i latou. Mafaufau i nei manatu e uiga i le lalelei moni mai ia Elder Lynn G. Robbins o le Fitugafulu:

O se tamaitai talavou e susulu mai i ona fofoga le fiafia ma le mama o loo ia faasusuluina foi mai totonu le lalelei.
O le ataata amioatua e matua matagofie lava aua o loo susulu mai i se auala masani moni lava. O lenei lalelei moni e le mafai ona valiina i luga [o fofoga] ae o se meaalofa a le Agaga.
O le tauagafau o se faailoga lea o fafo ma o se mea e manaomia mo le lalelei i totonu.
Afai o e lotovaivai ona o ou foliga vaaia, o le a fesoasoani lou vaai ia te oe lava mai fofoga o i latou o e alolofa ia te oe. O le lalelei natia e vaaia e i latou e alolofa ia te oe o le a avea lea ma se faata mo le faaleleia o oe lava ia.
O le ituaiga alii e fia faaipoipo i ai se tamaitai amioatua “e le vaai” o ia e pei o le tagata o le lalolagi (tagai 1 Samuelu 16:7). O le a tosina atu o ia i le lalelei moni e faasusuluina mai [e le tamaitai] mai se loto mama ma le fiafia. E faapena foi ona moni mo se tamaitai talavou o loo saili mo se alii talavou amioatua.
E faamoemoe le Tama oi le Lagi ina ia filifili e Lana fanau uma le mea sao, aua ua na o le pau lena o le ala i le fiafia tumau ma le lalelei mai totonu.
A i ai faatasi ma le Alii, e leai se tauvaga. E maua e tagata uma le faamanuiaga lava e tasi o le i ai o Ona foliga i o latou mata (tagai Alema 5:19). E leai se isi lalelei e sili atu le moni.

Ina ia faitau le savali atoa, tagai Lynn G. Robbins, “True Beauty,” New Era, Nov. 2008, 30. E mafai foi e alii talavou ona mauaina ni fautuaga lava e tasi ia Errol S. Phippen, “O Le Tamai Pato Auleaga po o le Manuvai Malualii? E Pule Lava Oe,” Liahona, Oke. 2009, 36.