Tapē ma Ta’u Mai
“Ia faamaoni, ma ia le gauai i soo se faaosoosoga” (MFF 9:13).
Sa saofai Connor i le komepiuta a le aiga ma ta i totonu le tuatasi o le uepisaite lea na tuu atu ia te ia e lana uo. “E tatau lava ona siaki le mea lea!” o le tala lea a lana uo.
Ae ina ua tatala mai le uepisaite, na lagona le le fiafia o Connor. Na ia taumafai faatopetope e tapuni le lau, ae o le tele o lona kiliki, o le tele foi lea o le oso ae o ata leaga. I lona le to’a, na kiliki ai e Connor le faamau e tapē ai le komepiuta ma tamoe i lona potu.
Na lagona e Connor le faanoanoa i lona vaaia o na ata. Talu mai lona papatisoga i nai masina ua mavae, na amata ona ia lagona le filemu faapitoa o le Agaga Paia. Ae ina ua uma ona ia vaai i na ata, e lei toe lagona e Connor lena filemu. Na ia lagona lona agasala ma le fefe ina nei iloa e se tasi le mea na ia vaai i ai.
Na filemu Connor i le taimi na aai ai i le afiafi. Na ia taumafai e faalogo i talanoaga a lona aiga, ae na ia vaai pea lava pea i ia ata i lona mafaufau. Na le mafai ona aluese le lagona faaletonu mai lona manava.
Ina ua fai lana tatalo i lena po, na tau atu e Connor i le Tama Faalelagi ia ata ia na ia vaai ai. Fai mai o ia ua salamo, ma e na te le toe faia. Ina ua uma lana tatalo sa ia lagona lona toafilemu, ae na ia lagona foi e tatau ona alu e talanoa ia Tina. E lei manao lava Connor e tau atu ia te ia le mea na tupu. A e faapefea pe a ita pe le fiafia o ia?
Na iu lava ina filifili Connor e talanoa atu ia te ia. Na alu o ia i le potu o lona Tina ma saofai i lona moega sa faitautusi ai o ia.
“Tina, e mafai ona ta talanoa?” o lana fesili lea.
“Ioe, lau pele,” o le tali lea a Tina. “O le a?”
Na masua uma atu. Na ia ta’u atu ia te ia le mea na fai mai ai lana uo, ma ta’u atu foi mea na ia vaai i ai ina ua alu i le saite. Na mata’i lelei o ia e le tina, ae e lei foliga ita.
“Sa ou le iloa le mea e fai,” le tala a Connor. “O lea sa ou tapeina ai le komepiuta ma tamoe ese. Ua ou matua salamo lava, Tina. Sa le tatau lava ona ou taina lena tuatusi i le taimi muamua lava, peitai ou te lei iloa e leaga.”
Sa opo mai e Tina ia Connor. “Connor, ou te faanoanoa ua e vaai i na ata,” o lana tala lea. “E taumafai nisi tagata e faasee tamaiti ina ia vaai i na mea leaga. Peitai na e faia le mea sao. Afai e te vaai i ni ata leaga i luga o le komepiuta, e tatau ona e “tapeina ma ta’u mai.’ O lona uiga e te oomiina le ki e tape ai le komepiuta ona e sau lea e ta’u vave mai ia te au. Ua e faia tonu lava le mea sa’o.”
Na lagona e Connor le mafanafana!
“Connor, ou te manao ia e iloa e le ona o oe,” o le tala lea a Tina. “O se mea sese, ma e le tatau ona e lagona le tausalaina i le mea na tupu.”
“Ae, tina, afai sa ou faia le mea sa’o, aisea e le o lelei ai ou lagona i totonu?”
“E tau mai ia i tatou e le Agaga Paia pe a i ai se mea e matautia,” o le faamatala mai lea a Tina. “O lena lagona na e maua o le Agaga Paia lena na fai atu e te sola ese. O le a ou tuuina se polokalama i la tatou komepiuta e poloka ai ni saite leaga, peitai e mafai lava ona ofi mai nei mea leaga i nisi taimi. O lea afai e toe tupu se mea faapea, ua e iloa le mea e tatau ona fai, a ea?”
“Tapē le komepiuta ma ta’u atu ia te oe, “o le tala lea a Connor.
“Na tonu lava!” na fai atu ai Tina.
A o lei alu Connor moe, sa ia tatalo ma faafetai atu i le Tama Faalelagi mo le toafilemu na ia maua. Ao ia tatalo, na ia lagonaina le toafilemu mai le Agaga Paia. Na ia iloa o le a lelei mea uma.
Ata na tusia e Bryan Beach