Faateleina le Manaomia Faavaomalo o Tagata e Aoina Mai Faamaumauga mo Galuega Faalemalumalu
O loo saili tagata i le lalolagi atoa mo o latou tuaa.
Ma i le lalolagi atoa, o loo mafai e isi tagata ona faatinoina lena sailiga.
O le polokalama a le FamilySearch mo le aoina mai o igoa, lea sa faalauiloa i le initoneti i le 2006, ma ua taulamua ai volenitia i le lalolagi atoa, o le faiga lea e tuu uma ai faamatalaga mai faamaumauga (e pei o faamatalaga i ata mataninii) i se polokalama i le initoneti e mafai ona sailiili i ai tagata.
O le faamaeaina e le 122,000 o tagata o le AAG ma tagata e le auai i le ekalesia o loo galulue malosi i le aoina mai o faamatalaga o faamaumauga e 547,978,000 talu mai lona amataga, ua matuai iloga ai lava le faamanuiaina o le aoina mai o faamatalaga e le FamilySearch. Ae peitai, ua i ai se sini fou a i latou o loo faamaopoopoina le aoina mai o faamaumauga: o le aoina mai lea o faamaumauga i gagana e ese mai i le gagana Peretania.
“Ua tele igoa o loo matou aoina mai e le o ni igoa faa-Peretania,” o le saunoaga lea a Jim Ericson, o le pule o le maketi mo le FamilySearch. “O loo matou taumafai e aumai ni tagata e ese gagana e tautatala ai ia aafia malosi ai, ina ia sili atu se galuega tatou te faia i igoa e le faa-Peretania.”
E ui o loo faaauau pea ona faateleina le aoina mai o faamaumauga i le gagana Peretania, ae ua matuai sili atu ai lava le tele o faamaumauga o atunuu faavaomalo. Ua amata ona maua ia galuega faatino mai atunuu eseese ina ua nofouta ia isi malo ma i latou e teuina faamaumauga i auaunaga e tuuina atu e le FamilySearch, na fai mai ai Brother Ericson.
Ina ia amataina, e aumai e tagata faigaluega o le FamilySearch ia faamaumauga mai malo, faletusi, ma isi lava punaoa, ma fatu ai ni kopi faafuainumera faaeletonika o ia faamaumauga. Ona tuu lea o nei kopi i ni vaega laiti e ta’ua o “seti,” lea e mafai ona faaaoga e volenitia i luga o le initoneti. E o volenitia i le polokalama o le FamilySearch, sii mai se seti, ma ta mai faamatalaga latou te vaaia i luga o le lau. O lena faamatalaga e mafai i se taimi mulimuli ane ona maua e tagata e sailia talafaasolopito o aiga. O seti taitasi o se tuufaatasiga o galuega e mafai ona faamaea e se volenitia i le pe tusa ma le 30 minute, o le tala lea a Katie Gale, o le Taitai Faamaopoopo o le Galuega Faatino o le Aoina mai o Faamatalaga a le FamilySearch.
O volenitia e auai i le aoina mai o faamatalaga a le FamilySearch e ono aofia ai tagata o o latou gagana moni e le o le Igilisi (o le taimi nei e fitu gagana e maua ai le saite), ae e mafai foi ona aofia ai tagata ua i ai tomai i gagana mai auaunaga faamisiona, aoga, po o isi aoaoga faamasani.
E tusa lava pe le o maua ia galuega faatino i se atunuu o loo e aumau ai po o auauna ai, ae e mafai lava ona maua mai ia galuega faatino mai atunuu o loo faaaoga ai lea lava gagana e tasi.
Ina ua fausia le Malumalu o Kyiv Iukureini, sa auai le Au Paia i Iukureini i se galuega taulamua e sue ma ao mai ai igoa e aumai i le malumalu pe a mae’a. E oo ane i le taimi na faapaia ai le malumalu, ua toa 401 tagata e aoina mai faamaumauga mai Iukureini, Rusia, Amerika i Matu ma Saute, ma Europa sa galulue i le galuega faatino mo Kyiv, ma sa mafai ai e le Au Paia ona aumai igoa Iukureini e 200,000 i le malumalu.
A o faateleina le galuega o le aoina mai o faamatalaga i se eria, o le a faapea ona faailoa atu e taitai o le FamilySearch latou te tuuina atu seti o igoa, ia eria ua faateleina ma, i nofoaga e mafai ai, e faatelevaveina ai le faamatuuina atu o galuega faatino e faatatau i lena risone.
I le televave o loo i ai nei le aoina mai o faamatalaga, o nisi atunuu e ono oo atu i le sefulu tausaga faatoa faamaeaina ia seti ua uma ona faamatuuina atu—o le ala lea o le manaomia o nisi tagata e aoina mai faamatalaga. O le tele o seti i gagana e ese mai i le Igilisi o le averesi e i le va o le lua i le ono tausaga e faamaea ai.
“Afai e faifai pea ai lava se galuega faatino, o le a leai se taua i se tagata,” o le saunoaga lea a Paul Starkey, Pule o le Faatautaiga o le Aoina mai o Faamatalaga mo le FamilySearch. “O le faamoemoega atoa lava o le aoina mai o faamatalaga, ia mafai lea ona maua nei faamaumauga [faaeletonika] ina ia mafai ai e tagata ona saili o latou tuaa. Matou te taumafai lava ia vave faamaea ia nei galuega faatino.”
O loo umia e le Ekaleisa le tusa ma le 2.4 miliona o lola o ata mataninii o loo i ai faamaumauga o gafa o loo teuina i le Granite Mountain Record Vault. O nei faamaumauga e talitutusa lava ma le 15 piliona o faamaumauga o loo faatalitali mo le aoina. E anoanoai isi faamaumauga faitino o loo i ai i le lalolagi atoa.
“[O le mauaina o se igoa ma ni faamaumauga patino] o se aafiaga lea e liliu atu ai loto o le au suesue i o latou tamā,” o le saunoaga lea a Brother Ericson. “E mafai e tagata o le Ekalesia ona faaaoga faamatalaga ua uma ona aoina mai e tusitusi ai gafa o o latou tuaa ma faia ai sauniga faaola o le malumalu.”
E ui toetoe o tagata uma e i ai se komepiuta e mafai ona auai i le galuega faatauvaa o le aoina mai o faamaumauga, ae e le tatau ai ona faaitiitia lona taua, o le faamatalaga lea a Sister Gale. “Afai e [mafai] e tagata ona vaai o le aoina mai o faamaumauga o le vaaiga mamao maoae lea o le talafaasolopito o aiga, e mafai foi ona latou vaaia lona taua ma le manaomia pea o ni volenitia se toatele.”
“Matou te manaomia pea ni tagata se toatele e faatinoina le aoina mai o faamaumauga,” o le saunoaga lea a Brother Ericson,“ma ua matou talosagaina ai tagata e faasoa atu lenei polokalama i a latou uo ma aiga, e tusa pe o i latou o ni tagata o le Ekalesia pe leai foi. E le faapea e mo na o tagata o le Ekalesia. E i ai se feoeoeaiga malie pe a galulue tagata uma i se sini e laugatasia ai.”
Ua i ai se sini fou a taitai e faamaopoopoina le aoina mai o faamaumauga a le FamilySearch mo volenitia: o le aoina mai lea o faamaumauga i isi gagana e ese mai i le Igilisi.
Ata na pueina e Welden C. Andersen, © iri