I Le Lalolagi Atoa
Na Ta’u Atu e Aposetolo i le Au Paia i Amerika Tutotonu e, Sii Ae le Malamalama i le Lalolagi
E tatau i tagata taitoatasi o le Ekalesia ona fausia se faatuatua loloto ia Keriso, o saunoaga ia na ta’u atu e Elder M. Russell Ballard ma Elder D. Todd Christofferson o le Korama a Aposetolo e Toasefululua, i tagata o le Ekalesia i Kuatemala, Honotura, ma Nikarakua i le taimi o o la’ua tofiga i Amerika Tutotonu ia Ianuari 2011. Faatasi ai ma isi taitai o le Ekalesia, sa la’ua fautuaina ai le au paia e faamalolosia o latou aiga e ala i le tatalo, suesueina o tusitusiga paia, auaunaga i le malumalu, afiafi faaleaiga, tausia o le aso Sapati, usiusitai i poloaiga a le Alii, ma le faasoa atu o o latou faatuatua i tagata e siomia i latou.
Sa pulefaamalumalu Elder Christofferson ma Elder Ballard i konafesi i nisi o siteki ma auai i faeasaite mo taitai perisitua i le lotoifale, matua ma ulugalii faaipoipo, talavou matutua nofofua, ma le autalavou. Sa la’ua feiloai foi ma le 1,100 o faifeautalai i misiona e fa, au peresitene o siteki, epikopo, ma peresitene o paranesi.
Toe Foi Atu Elder Scott i Mozambique
Na ta’u atu e Elder Richard G. Scott, o le Korama a Aposetolo e Toasefululua i le Au Paia o Aso e Gata Ai i Mozambique, a o i ai o ia lata mai nei i le Eria a Aferika Sautesasa’e, “O outou o nisi o fanau e sili ona faapelepele i le lalolagi, ma e alofa le Atua ia te outou.” Ua sefulutasi tausaga talu ona mae’a le faapaiaina o lenei atunuu mo le talaiga o le talalelei, ae na toe foi atu Elder Scott ia Ianuari 2011 ma maua ai ua maoae le alualu i luma o le Ekalesia.
I le asiasiga muamua a Elder Scott, sa na o le 40 tagata o le Ekalesia i Mozambique, ma sa avea le atunuu ma se vaega o le Misiona a Johannesburg Aferika i Saute. I le taimi o lana asiasiga lona lua, ua tupu le Ekalesia ma ua silia i le 5,000 tagata o le au paia ua salalau atu i itu e 2, paranesi e 19, ma ni vaega se 3 e lolotu i le atunuu atoa. O Mozambique foi o le laumua lea o le Misiona a Maputo Mozambique, lea e aofia uma ai Mozambique ma Anekola.
A o le’i toe malaga ese mai, sa faaalu ai e Elder Scott se taimi e feiloai ai ma faafetai atu i fomai sa i ai faatasi i Mozambique ma le polokalama o auaunaga alofa a le Ekalesia.
Faamalolosia e Elder Bednar ma Elder Andersen le Au Paia i le Pasefika
Na aoaoina, siitia, ma faamalamalamaina talu ai nei e sui e toalua o le Korama a Aposetolo e Toasefululua o Elder David A. Bednar ma Elder Neil L. Andersen, ia tagata o le Ekalesia ma faifeautalai i le Pasefika.
Sa feiloai Elder Bednar ma faifeautalai ma le au paia i Toga, Niu Sila, Hawaii, ma le Atu Maresala. Mo le au paia i le Atu Maresala, o le asiasiga a Elder Bednar o se mea taua lea, aua e talitonuina o le taimi muamua lea ua asiasi atu ai se sui o le Korama a Aposetolo e Toasefululua.
Sa faataunuuina e Elder Andersen ni tofiga i Ausetalia, Papua Niu Kini, Niu Sila, ma Farani Polenisia.
Na saunoa Elder Bednar, “A o ma malaga atu i motu o le moana ma vaega aupito mamao o le lalolagi, ua ma vaaia ai le i ai o le Ekalesia i soo se mea.” “Ua mauaa ai, o loo tuputupu ae, ma o loo i ai ni tagata faamaoni, ma lelei. E matuai ofoofogia lava.”
Ua feiloai atu Elder Neil L. Andersen o le Korama a Aposetolo e Toasefululua i tagata o le au paia ma faifeautalai i le Eria a le Pasefika.
Ata pue mai le faaaloaloga a Elder Neil L. Andersen