Autalavou
E Lava Tupe
Sa ou feiloai i faifeautalai i le 17 o ou tausaga. I lena taimi sa ma nonofo faatasi ai ma lou uso matua. Na maliu lo ma tina i le tausaga ua mavae, ma sa faigata le olaga. Ina ua aoaoina au e faifeautalai, sa ou iloa ai o le Ekalesia lea ua leva ona ou sailia. Ae o faatosinaga a au uo na taofia mai ai au i le alu i le lotu i Aso Sa.
I se tasi taimi sa ou alu ai i se gaoioiga a le Ekalesia i se aso o le vaiaso. Sa aumaia ia te au le fiafia sili i le vaavaai atu i le autalavou atoa o loo talitalie ma taaalo. Sa faaaogaina e faifeautalai, ma le autalavou, lena avanoa e aoao mai ai ia te au se lesona o le talalelei, ma sa ou matua lagonaina le fiafia ma tonu ai loa ou te papatiso.
Ae e ui ina ou auai i le Ekalesia, sa ou feagai lava ma luitau. Sa na o au le tagata o le Ekalesia i lena vaega o le taulaga ma sa mamao le mea ou te nofo ai mai le falesa. E le i toe fia talanoa au uo le lolotu ia te au. Pe a tuua na o au, sa ou tatalo ma lagonaina le alofa o le Alii.
O masina taitasi, ou te mauaina ai se vaega tupe laitiiti mai se tupe na tuua e lo’u tina. Sa faigata le tausia o au lava i se tupe itiiti. Ae sa ou naunautai lava ina ia usiusitai. Sa ou totogiina le sefuluai ma le pasese e alu ai i le seminare ma sauniga lotu i Aso Sa. Ou te le i malamalama pe na faapefea, ae e oo atu i le faaiuga o le masina, sa lava le tupe e faia ai nei mea uma.
Ou te iloa sa faamanuiaina au i le totogiina o le sefuluai. O le tausia o lenei poloaiga na fesoasoani lea ia te au i le mauaina o se molimau malosi, auauna atu i se misiona, ma iloa faamanuiaga ina ia mafai ai ona ou faamalosia tagata fou o le ekalesia o loo fetaiai ma luitau.