O Le Mana o Aoaoga
Na fai mai lou tina ia ou galue malosi i le a’oga aua o le mea lea e tasi e mafai ai ona foia le mativa.
Sa ola ae lo’u tina e aunoa ma lona iloa o se mea i le tuulafoaia, fiaai, ma le mativa. E le i tele sana aoaoga na maua, ae na ia iloa le taua o le aoga ma lona mana e suia ai olaga. I le su’iina faatasi o ni fasi pepa e faia ai sa’u api mo le aoga, e tasi lava se mea na faamanino mai e lou tina: o le aoga e mafai ona fesoasoani ou te sola ese ai mai se olaga o le mativa.
Amataga Faatauvaa
Sa ou fanau i Pasila i matu ma na sili atu ma le tolu masina na vave ai ona ou fanau mai. O le tolusefulu tausaga ua tuanai, sa toetoe ina leai se avanoa e ola ai se pepe e vave ona fanau mai, i totonu o se falemai faitele e tumu i mogamoga. Sa ta’u atu e fomai i lo’u tina o le a ou oti i ni nai itula. Ou te lei oti. Sa fesoasoani mai le Alii ia ou ola.
Pe tusa o le lima o ou tausaga, na tuua ai e lo’u tama lo’u tina, o o’u tei e toafa, ma a’u. Sa tuulafoaia foi lo’u tina e ona matua a o laitiiti lava o ia, ma o lea sa leai sona aiga e liliu atu i ai mo se fesoasoani. E lei lava se matou tupe e totogi ai se fale, ma o lea na matou nofo lisi ai i se fasi eleele. Sa fausia lo matou fale i ni fasi laau, pepa, ma se palasitika faatasi ai ma se taualuga e faia i laulaau mamago. E leai ni a matou meaafale e ese mai i se taupega, lea e tele ina faaaoga faatasi e ni tagata se toalua pe toatolu foi, ma lo matou moega, sa matou fauina mai ni pusa pepa ua faamafolafola. E leai se paipa, leai se eletise. Sa leai ni a matou meatotino.
Sa faigaluega lo’u tina o se tausifale ma faia tagamea a tagata. Sa ma o i le vaitafe, ma fesoasoani atu ia te ia i le mea sili ou te mafaia; ona ma savavali lea mo le tele o itula e tiliva lavalava. O lea taimi sa ma galulue faatasi ai, o se mea e pele ia te au. O iina sa ou fausia ai se sootaga ma lo’u tina.
E ui lava sa ma galulue malosi, ae na foliga lava e le lava le tupe. O nisi taimi e tau le lava ai sa matou meaai. E aumai e lou tina lana meaai mo i matou ma o nisi taimi e le ai ai lava mo le tele o aso. Matou te inuina ni vai ona o lea e momoe aua ua pau lena o se mea na mafai ona matou faia e foia ai le fiaai.
E te iloa faasoa se fuamoa se tasi mo ni tagata se toaono? Ou te iloa.
Sa i ai ni au uo a o ou laitiiti, ae ina ua matou matutua, sa eseese auala na matou uia. Sa liliu atu teineiti e faatau o latou tino ina ia maua ai ni tupe, a o tama e gaoi. Ina ua latou valaaulia au matou te faatasi, sa ou lagona se mea na ta’uina mai ia te au e le sa’o. Sa ou iloa na silafia au e le Alii i lena lava taimi, a o lei avea au ma se tagata o le Ekalesia, ma sa faaauau pea ona ou vaaia ia faamaoniga o Lona aao i lo’u olaga.
Musu e Tuu le A’oga
Ua leva ona matou i ai ma nai ou tei i le lisi faatalitali mo a’oga a le malo. Ina ua oo mai lo matou avanoa e lesitala ai, sa tau mai e lo’u tina ni mea lelei e uiga i le aoga. Fai mai o ia, afai ou te faamaoni i le aoga, o le a avea a’u ma se tagata faamanuiaina i se aso. O le a le galo lava ia te au ana upu: “Ou te faamalie atu ua le mafai ona ou tuuina atu se olaga lelei mo oe. Ou te faamalie atu ua e aoaoina i se auala faigata le taua o le galue a o e laitiiti, ae o lea ua e maua le avanoa e a’oga ai. Po o le a lava le mea e tupu, aua lava nei e musu e aoga aua na pau lena o le auala e aveesea ai oe mai lenei olaga.”
O le taimi lava na ou i ai i le aoga, e tatau ona matou sogasoga i le auala e maua ai ni a matou meaaoga. Ou te sueina ni fasi pepa e i ai ni avanoa, i totonu o kalone lapisi ma aumai i le fale. Sa su’i faatasi e lo’u tina e faia ai se api. Na te faatauina mai se penitala ma vae tolu ina ia tofu i matou ma ou uso e toalua ma se vaega e tusi ai i le aoga. E lei oo ina aoaoga nai isi ou tei e toalua.
O Se Faatuatuaga Fou
Ona sa pagatia tele lo’u tina i lona olaga atoa, o lea na te lei talitonu ai e i ai se Atua. I lo’u laitiiti, ou te lei talitonu foi. Ae ina ua amata ona ou matua, na amata ona ou faia ni fesili e uiga i le Atua. Sa ou fesili pe aisea e le i maua ai e lo’u aiga se avanoa e maua ai se olaga lelei ma pe aisea ou te lei maua ai ni meataalo, lava ni meaai, po o ni ofu fou. O taimi uma lava ou te faia ai nei fesili, ou te lagona lava i lo’u loto e le o tuua na o au. Na faamafanafanaina au e lenei lagona mo le tele o tausaga.
Pe tusa o le 13 o ou tausaga, na o mai ai faifeautalai o le Au Paia o Aso e Gata Ai i lo matou fale. Na la taliina au fesili uma lava ma aoaoina au e uiga ia Iesu Keriso. Sa la tau mai ia te au e i ai se ekalesia e mafai ona ou aoao atili ai e uiga i le talalelei i vasega faapitoa mo tagata o la’u tupulaga. Na aoaoina au i le auala e tatalo ai. Sa la tau mai ia te au le Tusi a Mamona. Ina ua ou papatiso, e leai se tasi o lo’u aiga na sau.
Sa ou lagona le tuulafoaiina, ae na ou iloa sa ou faia le mea sao. Sa faailoa mai ia te au se olaga fou—o se olaga o le faamoemoe, fiafia, faatuatua, ma le alofa. Sa ou iloa, na saili e a’u taaga ni toomaga i fualaau faasaina ma le ola le mama. A o au sa ou mauaina i se Tama Faalelagi alofa ma le talalelei a Lona Alo. Ina ua uma ona ou papatiso sa ou iloaina sa silafia au e le Alii i lo’u olaga atoa.
Ua ou aoaoina ni mea se tele e uiga i le talalelei. Sa ou feiloai atu i tagata na tutusa o matou talitonuga. Sa iloa e nisi o le ekalesia sina mea e uiga i lo’u olaga ina ua latou asia au i lo’u aiga. Na latou fesoasoani mai ma le agalelei e faatau ni lavalava ma ni seevae mo le lotu ma ni api aoga mo le aoga. Sa masani ona ou tausitama mo tagata o le Ekalesia ma maua ai ni tupe se tele ou te lei mauaina lava muamua. Ona o lo’u laitiiti tele, atonu na faigofie lava ona ou aluese mai le talalelei. Peitai, o le lagolago mai o tagata o le Ekalesia, o lea sa ou tumau mausali ai i lo’u faatuatuaga fou ua maua.
Na suia moni lava lo’u olaga e le talalelei. Ina ua uma ona ou papatiso, sa ou lagona ua sili atu lo’u malosi e aoao ai i le aoga. Sa ou aoao le tele o mea ma sa avea au ma se faiaoga. Afai ou te le iloa se mataupu, ou te aoaoina seia ou matua iloaina lelei ina ia mafai ona ou aoaoina atu. Sa ou faaaogaina le tupe e fesoasoani ai i le fale.
Sa maua lo’u faamanuiaga faapeteriaka ma na fautuaina au e auauna atu i se misiona aua na faapolopolo e le Alii se faamanuiaga faapitoa mo la’u misiona lea o le a suia ai lo’u olaga e faavavau. Ou te lei iloa le uiga o lea mea, ae na ou iloa o le a ou malamalama i ai i se taimi e tatau ai pe a ou usitai.
O Avanoa Fou
Sa ou faamisiona i le Misiona a Pasila Curitiba mai le 2000 i le 2002. E ala i le ma mafutaga ma se soa faapitoa, sa mafai ai ona ou alu i le Iunaite Setete e aoga ai. Sa ou iloa o le a avea moni lava lea mea ma auala e suia ai lo’u olaga e faavavau. Sa ou iloa na silafia au e lo’u Tama Faalelagi ma na i ai se fuafuaga faapitoa mo au. O lenei avanoa e faalautele ai la’u aoga sa avea lea ma se tali i au tatalo.
Sa ou iloa o le a avea ma se luitau le aoaoina o se gagana lona lua, ae sa ou iloa foi e mafai pe afai ou te matua galue malosi. Sa ou aoga i le Nofoaga Autu o le Gagana Peretania a le Iunivesite a Polika Iaga ma faaalu le sili atu ma le 10 itula o le aso i totonu o le potutusi. Sa fautua mai se tasi o o’u faiaoga ma te tatalo mo le meaalofa o gagana, ma o po uma lava ou te tatalo ai ma aioi atu i le Tama Faalelagi mo lenei meaalofa. Na ia fesoasoani moni mai lava ia te au.
Ina ua maea au aoga i le Nofoaga Autu o le Gagana Peretania, sa taliaina au i le tele o iunivesite. Sa ou filifili e auai i le Iunivesite o Polika Iaga–Idaho ma talosaga mo le polokalama faatausimai. Sa ou faalogo e matuai faigata lava ona e mauaina le polokalama, aemaise lava ia tamaiti aoga mai isi atunuu. Ma o lea sa ou suesue ai ma le malosi. Sa ula mai au uo ia te au, ma fai mai e tatau ona ou masi’i atu i le potutusi ona o le tele o le taimi ou te faaaluina iina. E tusa lava pe a tapuni, ou te alu i le fale ma faaauau ai pea au suesuega.
Pe a oo mai taimi faigata, ou te manatua ai upu a Peresitene Gordon B. Hinckley (1910–2008): “E te manaomia aoaoga uma e mafai ona e maua. Ia ositaulagaina le fia maua o se taavale; ia ositaulagaina soo se mea lava e tatau ona ositaulaga ai ina ia faaagavaaina ai outou e faia galuega i le lalolagi.”1 Sa ou iloaina o upu na a se perofeta a le Atua, ma sa ou matua talitonu i ai.
Ina ua talia au i le polokalama faatausimai, sa faatumulia lo’u loto i le agaga faafetai ma le fiafia. Sa ou iloa o le a faigata ma o le a ou faaauau pea ona faia ni osigataulaga, ae sa ou iloa o le a faatasi mai le Alii ia te au.
A o ou i ai i le aoga, sa ou feiloai i lo’u toalua, ma na ma faaipoipo i le 2007. Na auai foi lo’u tina i le Ekalesia i le tausaga lena. Sa ia fai mai e na te le iloaina pe aisea sa ou matua fiafia ai, e ui lava i le tele o mea faigata na tutupu ia i matou. Ae ina ua ia auai i le Ekalesia, sa malamalama o ia. Ua faamanuiaina lo’u aiga e le talalelei a Iesu Keriso, ma ua ou fiafia e vaai atu i lo’u tina ua faamanuiaina ina ua mavae le tele o ana osigataulaga na faia. O le a tumau pea lo’u lotofaafetai mo ia.
I le amataga o le 2010, sa ou sauniuni ai mo le faauuga—ma sa ou maitaga i le ma tama muamua. E lua masina a e ou te lei faauu mai le polokalama faatausimai, sa i ai ni faafitauli i lo’u maitaga, ma sa fai le taotoga e fanau mai ai le ma pepe. Sa fai mai ou faiaoga e malolo mai le aoga mo sina taimi se’i faauu i se taimi mulimuli ane. Ae ua matua lata lava—e toe lua masina!
O lea na ma faatulagaina ai ma le faaeteete ma lo’u toalua o ma taimi ina ia mafai ona faapaleniina mea e tatau ona faamuamua ia mafai ai ona faauma la’u aoga. Sa ou faatulagaina o’u taimi e suesue ai ina ia maua ai e lo’u toalua ma lona atalii le taimi la te manaomia. O nisi taimi e nonofo ai matua o lo’u toalua ma le ma tama a o fai la’u vasega. E toalua nisi o la’u vasega na fesoasoani tele ia te au i le toe iloiloaina o ni meaaoga a le vasega. Sa ou lagona e pei sa auina mai e le Alii nei tagata uma ina ia lagolago mai ia te au i lenei taimi faigata.
O Se Olaga Sili Atu
Ina ua uma le faauuga sa pasi la’u suega o le tusipasi a le setete ma amata ai loa ona ou faigaluega o se tausimai e fesoasoani e tausi lo’u aiga ao faauma le aoga a lo’u toalua. E ui ou te le o fuafua e faigaluega pe a amata le matata a lo’u toalua, a e pe a oo mai se mala po o se tulaga faigata tautupe e tatau ai ona ou faigaluega i le lumanai, e fesoasoani la’u a’oga e saunia a’u e faia.
Na sao lava tina: o aoaoga e i ai moni lava le mana e suia ai olaga. Ua suia ai lo’u olaga, ma o le a sui ai foi olaga o la’u fanau. Ou te faamoemoe o le a latou iloa na faamanuiaina au ona o lo’u mulimuli i le fuafuaga a le Alii mo au. Na finagalo o Ia ina ia ou a’oga, ma sa fesoasoani mai o Ia i laasaga uma o le ala. Ou te faamoemoe ia aoao e la’u fanau le auala e galulue ai e pei ona ou faia ma ia latou faatauaina aoaoga e pei ona ou faia.
Ina ua talia a’u i le polokalama faatausima’i, sa ou iloa o le a faigata, ae na ou iloa foi o le a faatasi mai le Alii ia te a’u.
Ata na tusia e Dan Burr
Ata o Peresitene Hinckley na pueina e Drake Busath