O Le Perisitua O Le Pule lea e Galue ai i le Suafa o le Atua

E pulea e lo tatou Tama oi le Lagi le lagi ma le lalolagi. O Lona mana faavavau o loo faatumauina ai le atoatoa o le faatulagaga o le atulaulau. Ua Na faasafua mai se vaega o Lona mana i alii agavaa o le Ekalesia, e pulea ai Lana Ekalesia i le lalolagi. Ua ta’ua lenei pule ua faasafua mai, o le perisitua. Ua tatou vaaia lenei mamanu o tiutetauave ua faasafua atu, i le Feagaiga Fou, ina ua tuuina atu e Iesu Keriso i Ana Aposetolo le pule e galulue ai i Lona suafa (tagai Mataio 16:19).

O le mamanu lenei a le Atua e faatatau i le taitaiga. Ua faatulagaina i le lalolagi i le taimi nei. Ua faatagaina i latou o e umia le perisitua e galulue i le suafa o le Atua i le taitaiina o Lana Ekalesia ma le faafoeina o sauniga paia e tatau ai mo le faaolataga, e pei o le papatisoga, faamauga, taulimaina o le faamanatuga, ma le faaipoipoga faalemalumalu. E moomia e alii, tamaitai, ma tamaiti faamaoni uma o le Au Paia o Aso e Gata Ai ni sauniga faaleperisitua ma o le a faamanuiaina i latou i le mauaina o na sauniga.

Tofi o le Perisitua

E lua vaega o le perisitua: Mekisateko ma le Arona. E sili atu le pule a le Perisitua Mekisateko nai lo le Perisitua Arona.

I totonu o nei vaega e lua, o loo i ai ni tofi faapitoa, po o ni vaega o tiutetauave. O tofi e aofia i le Perisitua Arona o le tiakono, aoao, ositaulaga, ma le epikopo. E aofia i le Perisitua Mekisateko ia tofi o le toeaina, faitaulaga sili, peteriaka, Fitugafulu, ma le Aposetolo. Ua faatulagaina i latou o e umia nei tofi i ni korama, po o ni vaega. E tofu ia tofi taitasi ma se tiute faapitoa ua atofa atu i ai.

Ki o le Perisitua

O le upu ki ua faasino lea i le pule e pulefaamalumalu ai i iunite po o puleaga faapitoa o le Ekalesia. I totonu o siteki ma uarota, mo se faataitaiga, e na o le peresitene o le siteki, o le epikopo, ma peresitene o korama e umia ki o le perisitua. E tuuina atu ki e ala i le faaee atu o lima o sē umia le perisitua ua faatagaina na te faaeeina atu.

E mauaina e Peresitene o korama o le Perisitua Mekisateko ia ki o le au peresitene ma le faafoeina o mea faaleagaga (tagai i le MFF 107:10, 18–19).
E maua e Peresitene o korama o le Perisitua Arona ia ki o galuega a agelu ma le faatinoina o sauniga e pei o papatisoga ma le faamanatuga (tagai MFF 107:20).
E umia e le Peresitene o le Ekalesia ia ki uma o le perisitua mo le Ekalesia atoa (tagai MFF 81:1–2).

O tofi ma nisi o tiute o le Perisitua Mekisateko:

O Toeaina e “faamauina i latou o e ua papatisoina i le ekalesia, i le faaeega o lima mo le papatisoga i le afi ma le Apapa Paia” (MFF 20:41).
O faitaulaga sili e “taitai i mea faaleagaga” ma e i ai “le aia e galulue ai i” tofiga o le toeaina, ositaulaga, aoao, ma le tiakono (MFF 107:12).
O Peteriaka e tuuina atu faamanuiaga faapeteriaka (tagai i le MFF 107:53; 124:91–93).
O Fitugafulu e folafola atu le talalelei ma avea ma molimau faapitoa a Iesu Keriso i lalo o le taitaiga a le Korama a Aposetolo e Toasefululua (tagai MFF 107:25, 34).
O Aposetolo e auauna atu o ni “molimau faapitoa o le igoa o Keriso i le lalolagi atoa” (MFF 107:23).

O tofi ma nisi o tiute o le Perisitua Arona:

O Tiakono e tufaina le faamanatuga.
O Aoao e “leoleo pea i le ekalesia, ma faatasi ai ma le faamalolosia o i latou” (MFF 20:53).
O Ositaulaga e “aoao, … papatiso atu, ma faamanuia le faamanatuga, ma asiasi atu i aiga taitasi o le au paia” (MFF 20:46–47).
O Epikopo o ni peresitene o le korama a ositaulaga ma, i le avea ai ma faitaulaga sili, e pulefaamalumalu i tagata uma o le uarota (tagai i le MFF 107:87–88).

Ata na tusia e Hyun-Gyu Lee, Welden C. Andersen, Matthew Reier, Ruth Sipus, Craig Dimond, ma John Luke