O Le Faia i le Ala a le Alii

O se vaitaimi na tele ai le gau o maketi a le lalolagi. Na faaletonu faletupe ma isi faalapotopotoga o mea tautupe. Na faateleina le leai o ni galuega. Na leai ni fale o tagata. Na faaofi mai e le Malo ni polokalama taugata e taumafai e foia ai le tulaga ua oo i ai. Na toatele tagata na faamalosia e liliu atu i faalapotopotoga lautele mo ni meaai ma isi mea e manaomia.

E mafai foi ona faatatau lenei faamatalaga o le vaitausaga o le 1930 i nei vaitaimi. I na vaitaimi—faapena foi i le taimi nei—o loo avanoa lava le fuafuaga faauelefea a le Ekalesia e “fesoasoani i tagata ina ia latou fesoasoani ia i latou lava,”¹ i taimi o mala ma faigata, i le pau o le tamaoaiga ma mea tautupe i le lalolagi, ma i se tulaga laitiiti atu, ma sili atu ona luitau ai aiga ma tagata taitoatasi lea e mafai ona feagai i soo se taimi.

E ui o le fuafuaga o le uelefea e pei ona tatou iloaina i le aso na faatoa faalauiloaina i le 1936, ae na faatinoina e Au Paia i tisipenisione uma le mataupu faavae o le ola fuafua lelei mo le lumanai aua o Iesu Keriso o le faapogai lea o le fuafuaga o le uelefea. Na saunoa mai Peresitene Thomas S. Monson: “Na saunia e le Alii le ala ina ua ia fetalai mai, ‘O le a tausia foi le fale teuoloa i faapaiaga a le ekalesia; e tausia foi tamaitai ua oti a latou tane ma fanau ua oti o latou matua, faapea foi e matitiva.’ (MFF 83:6.) Ona sosoo mai ai lea ma le faamanatu, ‘Ae ao ina faia i la’u lava ala.’ (MFF 104:16).”²

Ina ia faia i le ala a le Alii, e tatau ona tatou atiina ae lo tatou lava tulaga o le faalagolago o le tagata ia te ia lava, ona saili lea e fesoasoani atu i isi ina ia latou ola faalagolago ia i latou lava. Na saunoa mai Peresitene Monson, “O loo fesoasoani alii ma tamaitai tuuto i le faafoeina o lenei polokalama tele ma le musuia. “O le mea moni lava, semanu e le mafai lava ona manuia le fuafuaga i le na o se taumafaiga, aua o lenei polokalama e faagaoioia e ala i le faatuatua i le ala a le Alii.”³

O le faamanatuina o le 75 tausaga o le fuafuaga o le uelefea—i lenei tausaga—na maua ai e le Au Paia o Aso e Gata Ai se avanoa e tomanatu ai i mataupu faavae autu e pei o le avea o se tagata tutoatasi, tausia o e matitiva ma e le tagolima, ma le auauna atu i isi. Pe a tatou ola ai i nei mataupu faavae, ua tatou i ai i se tulaga sili o le faamamaina o le tulaga pagatia, fausia o uiga, ma le uunaiga o le lotogatasi.

Faamatalaga

1. Aoaoga a Peresitene o le Ekalesia: Heber J. Grant (2002), 121.

2. Thomas S. Monson, “O Le Ala a le Ali,” Liahona, Mat. 1978, 10.

3. Thomas S. Monson, Liahona, Mat. 1978, 10.

“O le faamoemoega mamao moni o le fuafuaga o le uelefea, o le atiina ae lea o uiga auau mama i tagata o le Ekalesia, o e e foai atu ma e e talia mai, ma laveai mai ai uiga lelei uma ua ia i latou, e faafotu ae ai ma fua mai uiga tamaoaiga natia o le agaga, o le misiona ma le faamoemoe ma le pogai lea o le i ai i le Ekalesia lenei.”

Peresitene J. Reuben Clark Jr. (1871–1961), Fesoasoani Muamua i le Au Peresitene Sili, i le Glen L. Rudd, Pure Religion: The Story of Church Welfare Since 1930 (1995), 301.

Na mulimuli le Au Paia i tisipenisione uma i faataitaiga a le Faaola i le tausia o e matitiva ma e le tagolima.

Faamatalaga mai le Vaitaele o Petesa, saunia e Carl Heinrich Bloch, faaaloaloga a le Falemataaga o Faatufugaga o le Iunivesite o Polika Iaga