Mai le Misiona
Faailoga o le Agaga
O le galue ai i se misiona i le Ripapelika Tominika, e lei leva ona ou siitia atu i se eria fou lea e lauiloa i le faigata ona maua o ni tagata e aoao. Ina ua ou taunuu atu, sa na o le toatasi lava le ma tagata sailiili. O lona igoa o Oriviades. Sa auai muamua o ia i le lotu, ae ona e logonoa ma e fesootai i le gagana e fai i faailoga, o lea na le mafai ai e faifeautalai na i ai muamua ona aoaoina o ia.
I se tasi aso na ma filifili ai ma lau soa ma te anapogi ma tatalo mo se vavega ina ia mafai ai ona ma aoaoina ia Oriviades. Sa matou faatulagaina ma ia se taimi ina ia avanoa ai se tasi o lona aiga e fesoasoani e faaliliu, talu ai e leai se isi o i maua ma lau soa e iloa le gagana e fai i faailoga.
Peitai, ina ua ma taunuu e feiloai ma Oriviades, e leai ma se tasi o lona aiga na i ai iina. Ina ua alu Oriviades mo sina taimi e aumai se nofoa, sa ma faaaogaina ma lau soa lea avanoa e tatalo ai ina ia taitaiina i maua e le Agaga. A o lei faaiuina le ma tatalo, sa ou lagona le malosi o le faatasi mai o le Agaga.
Na amata ona fai mai faailoga a Oriviades, ae na le mafai ona ma malamalama ai. Sa na ona ma ataata atu ia te ia ma tilotilo le tasi i le isi, ma taumafai e mafaufau po o le a se mea e tatau ona ma faia. Sa ma filifili loa e tusi se tamai tusi e faailoa atu ai se taimi mo se isi a matou feiloaiga, ma faamoemoe o le a i ai se tagata faaliliu i lena taimi. Ae peitai na faafuasei ona ma lagonaina malosi le tatau ona ma nonofo ma taumafai e aoao o ia. “Ia ta taumafai—o le a fesoasoani mai le Agaga ia i taua,” sa ou fai atu ai i lau soa.
Sa ma taumafai e faaaoga ia ata tusi ma taga faigofie o lima a o ma aoaoina atu le lesona. Na iu lava ina amata ona ma malamalama i faailoga a Oriviade ma na mafai foi ona ma toe faailo atu ia te ia. Na foliga mai na ia malamalama lelei lava ia i maua.
Na uunaia i maua e faasoa atu a ma molimau ia te ia. Sa ma faaali atu ia te ia se ata o le Uluai Faaaliga, ma na ou tusia i luga o se fasi pepa, “Ou te iloa e moni.”
Ona, fai mai lea o faailoga a Oriviades, e tali mai ai, “Ou te iloa e moni—na tau mai e le Atua ia te au. Na ou tatalo ma ua ou iloa ai e moni.”
Sa ma tuua ma lau soa le matou faatasiga ma loimata. Sa ou iloa na faatagaina i maua e le Atua ina ia molimau atu e uiga i le talalelei toefuataiina i lenei tagata sailiili ma na aveina atu e le Agaga Paia la maua savali i lona loto (tagai i le 2 Nifae 33:1). Sa ou iloa e le manaomia ona tatou tautala atu ma le atoatoa po o le malosi pe a tatou faasoa atu le talalelei—o nisi taimi, e le manaomia lava ona tatou tautatala.
E ese le maoae o le auala e mafai ai e ni mea faigofie e pei o le anapogi, tatalo, ma le faatuatua ona galueaiina ni vavega tetele i o tatou olaga ma i olaga o i latou o loo tatou auauna atu i ai.
Ata na tusia e Dilleen Marsh