Aumaia o le Peraimeri i le Fale
O Muai Mataupu Faavae ma Sauniga o le Talalelei O Le a Mafai ai ona Ou Toe Mau faatasi ma le Atua
“Matou te talitonu o muai mataupu faavae ma sauniga o le Talalelei e faapea: muamua, Faatuatua i le Alii o Iesu Keriso; lona lua, o le Salamo; lona tolu, o le Papatisoina i le faatofuina mo le faamagaloina o agasala; lona fa, o le faaee atu o lima e maua ai le mea foaifua o le Agaga Paia” (Mataupu Faavae o le Faatuatua 1:4).
E mafai ona e faaaogaina le lesona ma le gaoioiga lenei e aoao atili ai e uiga i le autu o le Peraimeri i le masina lenei.
O le mataupu faavae lona fa o le faatuatua o loo talanoa mai e uiga i ni mataupu faavae ma ni sauniga taua se fa o le talalelei e tatau ona e mulimuli i ai ina ia mafai ona e toe mau faatasi ma le Tama Faalelagi.
Muamua, e tatau ona i ai lou faatuatua ia Iesu Keriso. O le i ai o le faatuatua ia Iesu Keriso o le talitonu lea o loo soifua o Ia, o Ia o le Faaola, ma e alofa o Ia ia te oe, e tusa lava pe e te lei vaai ia te Ia. Pe a i ai lou faatuatua ia Keriso, o le a e manao e fai le mea e finagalo o Ia e te faia, e pei o le tatalo, auai i le lotu, agalelei atu, ma tausi poloaiga.
O se tasi o mea taua ua finagalo Iesu e te faia o leia papatiso pe a valu ou tausaga (pe matua atu foi). O le a e papatiso e ala i le faatofu—pei ona fai e Iesu. O lona uiga o le a tofu atoa lou tino i lalo o le vai. O le a faia lou papatisoga e se tasi ua i ai le pule o le perisitua e fai ai papatisoga. Pe a e papatiso, o le a e faia foi se folafolaga i le Tama Faalelagi. O le a e folafola atu o le a e tausia ia poloaiga, ma afai e te faia, ua Ia folafola mai, o le a e maua le mafutaga ma le Agaga Paia.
A uma ona e papatiso, o le a e maua le meaalofa o le Agaga Paia. O le a faaee atu e se tasi e umia le perisitua ona lima i luga o lou ulu ma tuu atu ia te oe le meaalofa o le Agaga Paia. O le a taitaiina, aoao, ma faamafanafanaina oe e le Agaga Paia ma o le a molimau atu ia Iesu Keriso.
Mai le aso na e fanau mai ai seia atoa le valu o ou tausaga, sa e mama ma lē iloa se mea ona o le Togiola a Iesu Keriso. Pe a atoa lou valu tausaga ma ua papatisoina, o le a manaomia e te salamo i soo se mea sese e te faia. O le salamo o le lagona lea o le faanoanoa ma talosaga atu mo le faamagaloga mai le Tama Faalelagi ma mai soo se tasi na e faatiga i ai. Pe a uma ona e salamo, e manaomia lou taumafai malosi e aua nei toe faia na mea sese ma ia usiusitai atili i poloaiga. O le Togiola ua mafai ai e oe ona toe mama pe afai e te salamo.
E taua le i ai o le faatuatua ia Iesu Keriso, salamo, ma papatisoina e ala i le faatofuina, ma maua le meaalofa o le Agaga Paia aua o le a fesoasoani lea i lou toe foi atu e mau faatasi ma lou aiga e faavavau ma le Tama Faalelagi ma Iesu Keriso.
Gaoioiga
E mafai ona e faia lenei sipuligi o se faamanatu o uluai mataupu faavae ma sauniga o le talalelei. Faapipii le itulau 63 i se pepa mafiafia. Tipi ese faailoga e lima; ona tipi lea o le sipuligi i luga o laina soloatoa. Tipi pe oomi le mea o faailoa mai. Faapipii i luga ia faailoga mai le sipuligi e faaaoga ai se manoa po o se lipine.
O uluai mataupu faavae ma sauniga o le talalelei o le:
1. Faatuatua i le Alii o Iesu Keriso
2. Salamo
3. Papatisoina i le faatofuina mo le faamagaloina o agasala
4. Faaee atu o lima e maua ai le mea foaifua o le Agaga Paia
Ata na tusia e Thomas S. Child