Tatou te Talanoa ia Keriso
Na Ia Tauaveina O’u Faanoanoaga
“E moni, ua na tauave o tatou tiga, na tauave foi o tatou faanoanoa” (Mosaea 14:4).
E le galo lava ia te au le taumafanafana ma le tautoulu o le 2009. O le aso 9 o Iuni na maliu ai lo’u tama, i le silia ma le 10 tausaga o mafatia i le gasegase o le mafaufau. O le aso 25 o Iuni sa faafuasei ona maliu ai le ma tama tama e 22 tausaga le matua, ma e itiiti ifo ma le masina mulimuli ane ae maliu foi lo’u tausoga. O le aso 13 o Aokuso na faia ai se taotoga o le fatu o lo’u tina ua 82 tausaga ma amata ai se faagasologa umi o lona toe malosi ai. O le aso 18 o Oketopa na maliu ai lo’u tuagane e 41 tausaga. O le aso 31 o Oketopa na oso ai le ma’i fatu a lo’u toalua ma sa lei tata mo le valu minute. O le aufuimu, fomai feoai fesoasoani, ma se faamanuiaga faaleperisitua na toe manuia ai o ia.
E masani lava ona fesiligia au e tagata pe faapefea ona matou taulimaina nei mea e tutupu. O la’u tali tumau o lo matou liliu atu lea i le Faaola, ma sa Ia tausia i matou. Na te le i tuulafoaiina i matou i o matou tofotofoga. Sa ou lagona le auauna mai ma le tauaveina o a’u e le lagi. E moni, na Ia “tauave [o’u] tiga” (Mosaea 14:4).
Na oo mai foi le faamafanafanaga mai aiga, uo, tagata o le uarota ma le siteki. Sa latou tausia ma le alolofa i matou i auala e le mafaitaulia. Sa tusi mai e le tama teine a le ma fanau e 13 tausaga o, Krystal, se tusi ina ua mavae le maliu o le ma tama tama o Michael. Sa ia toe faamanatu mai ia i maua le le tuulafoaiina o i maua ina ua ia tusia faapea, “O loo tauaveina oulua e le Atua.” Sa toe faamanatu mai ia te au e lana tusi se mau i le Mataupu Faavae ma Feagaiga 84:88: “Ou te muamua atu i o outou luma. Ou te i ai foi i lo outou itu taumatau ma lo outou itu tauagavale, a o lo’u Agaga o le a i o outou loto, e siomia foi outou e a’u agelu, e lagolagoina outou.”
Sa ou maua le malosi i le faitauina o se saunoaga mai ia Elder Richard G. Scott o le Korama a Aposetolo e Toasefululua e faaautuina faapea, “Faalagolago i le Alii.” Na ia saunoa: “E masani ona saputu le oo mai o lui eseese ia i tatou i le taimi e tasi, i le taimi tonu lava e foliga mai ai ua matua lelei ma filemu mea uma i o tatou olaga. Afai o ia toatuga e le o ni iuga o sou faalogogata, o ni faamaoniga ia ua lagona e le Alii ua e saunia e te alualu atili i luma. O lona uiga na te tuu mai ia te oe mea e uunaia ai le alualu i luma, malamalama ma le alofa e faaleleia atili ai oe mo lou manuia e faavavau. E manaomia se taumafaiga malosi tele lava, ina ia avatu oe mai le mea o lo o e i ai nei, i le mea ua Ia finagalo ia e oo atu i ai, ma o le tele o taimi, o le a e lagona i lena taumafaiga, le mafatia ma le tiga” (Liahona, Ian. 1996, 19).
Fai mai o ia o fesili faapenei “Aisea ua tupu mai ai lenei mea ia te au?” po o le “Aisea ua ou mafatia ai i lenei taimi?” e taitaiina atu ai i tatou i magaala pogisa. Nai lo lena, na fautua mai Elder Scott e fai ni fesili faapea “O le a se mea e tatau ona ou aoaoina mai i lenei aafiaga?” “O ai e tatau ona ou fesoasoani i ai?” ma le “E faapefea ona ou manatua ou faamanuiaga e tele i taimi o faigata?”
Na ou teena le faaosoosoga e fesili atu, “Aisea?” Nai lo lena, na ou fesili mo le taitaiga a le Tama Faalelagi i o’u tofotofoga. Ua Ia faamanuiaina au i le faamoemoe mo le lumanai, fesoasoani ia te au e faamalolo i lo’u lotomafatia, faateleina lo’u iloa o mea lelei o loo siomia ai au, tuuina mai ia te au ia avanoa e auauna atu ai, faalolotoina lo’u lotoalofa mo isi, ma faateleina lo’u alofa mo lo’u aiga ma uo.
Mai nei mea uma, na ou maua ai se molimau o la tatou lu’i o le tuuina atu lea o o tatou loto i lo tatou Tama Faalelagi aua ua na o le pau lea o le tulaga e mafai ai ona toe faaleleia ma faamomosi i tatou i auala na Ia mamanuina patino mo i tatou taitoatasi.
Taulimaina o Tiga
-
E le o tuulafoaia i tatou i o tatou tiga aua o Iesu Keriso—“o le tagata faanoanoa, ua masani foi ma le tiga” (Isaia 53:3)—ua na tauaveina o tatou faanoanoa e avea o se vaega o le Togiola.
-
E mafai ona tatou taumafai e teena le faaosoosoga e fesili atu ai, “Aisea?” Nai lo lena, e mafai ona tatou fesili atu mo le taitaiga a le Alii.
-
E mafai ona tatou taliaina le lu’i ina ia tuuina atu o tatou loto i lo tatou Tama Faalelagi.
Na faia e Iesu Keriso, i Ketesemane, se faataitaiga tonu lava o le faalagolago ina ua Ia aioi atu i Lona Tama “afai e mafai, ia ave ese lenei ipu ia te au.” Petai na Ia toe fetalai mai, “A e aua le faia lo’u loto, a o lou finagalo” (tagai Mataio 26:39–44).
Keriso i Ketesemane, saunia e Heinrich Hofmann, faaaloaloga a le C. Harrison Conroy Co.