Mataupu Faavae ma Feagaiga 121:41–43

Na aoao atu e Iosefa Samita le ala a le Alii i le faatinoina o le pule o le perisitua.

41 E le tatau ona faatumauina se mana po o se uunaiina e le pule o le perisitua, tau lava i le tauanau atu, i le faapalepale, le agalelei, ma le agamalu, ma le alofa faamaoni;

42 I le agalelei, ma le malamalama mama, e matua faalauteleina ai le agaga e aunoa ma le pepelo, e aunoa ma le faa’ole’ole—

43 I le aoai faamalosi atu i aso e tatau ai, pe a uunaiina e le Agaga Paia; a e faaali atu mulimuli le alofa faateleina i le ua e aoaiina, ina nei fai oe e ia mona fili.

Tauanau

Tauanau—uunaia o isi ina ia talitonu pe faia se mea e ala i se taumafaiga e faamalamalama pe aioi atu ia i latou.

Faapalepale

Faapalepale—onosai.

“E pei ona onosai le Alii ia i tatou, ia tatou onosai foi ia i latou o loo tatou tautuaina. Ia malamalama o i latou, e pei foi o i tatou, e le atoatoa. O i latou, e pei foi o i tatou, e i ai taimi e sasi ai. O i latou, e pei foi o i tatou, e mananao i isi ia mafaufau i isi tagata i se tulaga lelei.

“Aua lava nei e fiu i se tagata. Ma e aofia ai ma lou le fiu ia te oe lava.”

Peresitene Dieter F. Uchtdorf, Fesoasoani Lona Lua i le Au Peresitene Sili, “Faaauau i le Onosai,” Liahona, Me 2010, 58.

Agalelei ma le Agamalu

O nisi nei o mea na aoao mai e tusitusiga paia e uiga i le agalelei ma le agamalu:

O loo aofia i fua o le Agaga (tagai i le Kalatia 5:22–23).
O le agalelei o le faatusa lea o auauna a le Alii (tagai i le 1 Tesalonia 2:7; 2 Timoteo 2:24).
O e agamalu e fai mo latou tofi le nuu (tagai i le Salamo 37:11; Mataio 5:5).
O le agamalu o se faailoga lea o le faatuatua ia Keriso (tagai i le Moronae 7:39).
O le agamalu e oo mai ai le asiasiga a le Agaga Paia (tagai i le Moronae 8:26).

Alofa Faamaoni

Alofa Faamaoni—e moni; e le pepelo pe faafoliga.

Pe na faaali atu e se tasi ia te oe le alofa moni talu ai nei? Pe faapefea ona e faaali atu lena ituaiga alofa i isi? Tusi e uiga i ai i lau api o talaaga.

E aunoa ma le Pepelo ma e aunoa ma le Faa’ole’ole

Pepelo—o le faafoliga ia avea ma se tasi a e le o ia.

Faa’ole’ole—le faamaoni; faitogafiti.

Aoai Faamalosi Atu i Aso e Tatau Ai

Aoai—otegia po o le faasao filemu; faaalia le le fiafia.

Aso e Tatau Ai—faavave; vave; a e le i tuai.

Faamalosi—manino.

Pe A Uunaiina e le Agaga Paia

“O se aoaiga musuia ma le alofa, e mafai ona avea o se valaaulia ia lotogatasi. O le le tuuina atu [o se aoaiga] pe a uunaia ai e le Agaga Paia, o le a oo atu ai i le feeseeseai.”

Peresitene Henry B. Eyring, Fesoasoani Muamua i le Au Peresitene Sili, “Ia Tasi,” Liahona, Sete. 2008, 6.

O Iosefa Samita i le Falepuipui i Liperate, saunia e Greg Olsen