E Fia Vaai Peresitene Monson ia te Oe
George Sharkey, Sikotilani
E tusa ma le 15 tausaga ua mavae na ou maua ai i le ma’i tete. E fa tausaga mulimuli ane ae faaitiitia lo’u malosi, ma sa ou faaaogaina se nofoa faataavalevale. Sa ou matua le fiafia lava i lo’u tulaga ona o lo’u olaga atoa, sa ou matua malosi lava.
O se mea o le vaitaimi lena, sa ou alu i se konafesi na faia i Dundee, Sikotilani, lea na i ai Peresitene Thomas S. Monson, a o avea o se fesoasoani i le Au Peresitene Sili. Ina ua maea le sauniga, na sau se tagata o le au paia ia te au.
“Uso Sharkey?”
“Ia?”
“Sau i luma e vaai ia Peresitene Monson.”
E lei i ai sou faamoemoe e fai lena mea, ae na toe foi mai lea alii i ni nai minute.
“Uso Sharkey,” o lana tala lea, “o loo faatali Peresitene Monson e vaai ia te oe.”
“Ae na te le silafia au,” o lau tala lea.
“E tusa lava, a e o loo faatali mai mo oe. Na faafofoga o ia i lou gasegase.”
Na ou malie ma alu atu loa e vaai Peresitene Monson. Na ia faafeiloaia au ma le alofa ma fesili mai pe ou te manao i se faamanuiaga faaleperisitua. Sa ou ioe atu i ai.
Sa maua se potu, ma na fesili mai Peresitene Monson po o ai ou te manao e faauuina au. Sa ou talosaga atu pe mafai ona saili mai lo’u epikopo. Ina ua aluese atu se tasi e saili mai o ia, sa toe faamanatu atu e se tasi o le au malaga a Peresitene Monson ia te ia, afai o le a latou le vave o, o le a latou le maua le taimi i le malaevaalele o Edinburgh.
Sa soisoi Peresitene Monson ma tali atu faapea, a o ia faatatau ia te ia lava ma a’u, “A e aulia o matou tausaga, o le a e iloa mea e faamuamua. Tatou te maua lava le taimi.”
Ina ua taunuu mai lou epikopo, sa la faamanuiaina ma Peresitene Monson ia au. O le faamanuiaga na tuuina mai e Peresitene Monson e le o se faamanuiaga o le toe malosi mai; ae sa faatatau i le gafataulimaina o lo’u tulaga ma faaletonu o le a oo mai. O se faamanuiaga foi mo lo’u aiga ina ia mafai ona latou fesoasoani mai ia te au e tatalia lo’u ma’i.
Ua atoa nei le sefulu tausaga talu ai, o loo ou maua lava i le ma’i tetete, ae i le 74 o ou tausaga o loo ou manuia lava. Ua ou maua moni ni auala e taulima ai lo’u ma’i. E lelei o’u lagona, ma e ou te lei toe faaaogaina se nofoa faatavalevale talu mai le aso na ou maua ai le faamanuiaga. E faaigoa a’u e lo’u fomai o lana “tagata ma’i sili.”
Ou te faafetai pea ia Peresitene Monson mo lona agalelei i le talanoa mai ma le faamanuiaina o se tagata na te lei silafia. Ae ou te faafetai pea mo mea na ia aoaoina ai au e uiga i le faaaogaina o le perisitua.
E eseese ki ma tofi tatou te umia i le Ekalesia, ae o le perisitua lava e tasi tatou te umia. O le galuega agalelei a Peresitene Monson na aoaoina ai a’u e faapea, o le perisitua e le o le tagata e umia ae o le auala tatou te faaaoga ai e faamanuiaina ai olaga o fanau a le Tama Faalelagi.