Folau Saogalemu i le Aiga
E ui e ono sousou ogasami o le olaga i nisi o taimi, ae ua iloa e le tupulaga talavou o le Au Paia o Aso e Gata Ai i Visakhapatnam, Initia o le maluapapa o le aiga o se malutaga lea o le filemu.
O aso uma lava e folau ai le au faifaiva o Visakhapatnam, Initia i le sami. O le tele o aso e le galuā, e agalelei le sami, ma e toe foi mai vaa ua tutumu i i’a. Peitai, o nisi foi taimi e sou ai le sami. E pouliuligia le lagi, e maualuluga galu taufaamata’u, e olioli foi le au faifaiva pe a tau lava ina saogalemu mai i o latou uafu.
O aso uma foi e o ese atu ai le autalavou o le Au Paia o Aso e Gata Ai a Visakhapatnam i le lalolagi. O le tele o aso e agalelei ai le olaga ia i latou. Latou te maua le atamai, faia ni uo, ma toe foi i le aiga ua faatumulia i le fiafia o le olaga. Peitai, o nisi foi taimi e sou ai le lalolagi. E tu’itu’i mai le lotovaivai e pei o ni galu, e maualuluga ma taufaafefe faaosoosoga, e faapouliuligia foi e le masalosalo le lagi faaleagaga. O aso faapena, latou te olioli ai pe a latou toe foi saogalemu i o latou malutaga o le filemu, ma maluapapa ua latou faaigoaina o le aiga.
Ata i luga o le Puipui
O le toalua o na talavou o le Au Paia o Aso e Gata Ai o, Naga Bushan Ratnam ma Pavani Kotala Ratnam, e nonofo faatasi ma o la matua i se tamai fale mautotogi e mamao ese mai le taulaga ae latalata i le falefaigaluega a lo la tama. E mafai ona e iloa i ata i totonu o le fale mea la te faamuamuaina. E faatumulia i ata o le aiga ia le fatatusi lea e lata i le faitotoa i luma, ma i totonu o le mea lea e momoe ai, o loo i ai ata o le Faaola, o le malumalu, ma le Au Peresitene Sili o loo teuteu ai puipui.
“A ou ala, o ata na e muamua lava ou vaai i ai,” o le tala lea a Pavani. “A ou alu ou te moe i le po, o mea mulimuli foi na ou te vaai i ai.”
E talitonu Pavani e mafai e i tatou uma lava ona fausia se malutaga o le filemu i totonu o o tatou aiga. “O le mea lena ou te tausia ai ia mama mea uma,” o lana tala lea. “O se tasi na o auala e faigofie ai ona i ai le Agaga iinei.” Ma i le aoga, “E i ai lava i totonu o la’u atotusi le Mo le Malosi o le Autalavou, ma soo se taimi lava e aumai ai i fafo sa’u tusi, ou te vaai lava i ai.”
Ua iloa e Naga o le talatalanoa ma lona tuafafine e aumaia ai ia te ia le toafilemu. “E moni matou te talanoa ma o maua matua ma saili la laua fautuaga i le tele o mea,” o lana tala lea. “O lo ma tama o le peresitene o le itu, o lea matou te talanoa ai ma ia i taimi uma i se tulaga aloaia pe le aloaia foi. Ma te fiafia foi e talatalanoa ma lo ma tina. Ae i ai se mea faapitoa e uiga i le fefaasoaai o i maua ma lou tuafafine.” Pe a ita ia Naga, o Pavani e faatoafilemuina o ia. O Naga e tau le tautala, o lea e fesoasoani ai Pavani ia faamasani solo o ia.
“Ae o le tele lava o taimi, e faamalosiau e le tasi le isi i le tausiga o tulaga faatonuina,” o le tala lea a Naga. Mo se faataitaiga, e fesili Pavani ia Naga mo se fautuaga mo ofu talafeagai. “Afai e manatu o ia e le ogatasi ma tulaga faatonuina a le Ekalesia, ou te le ofuina,” o lana tala lea. E tele lava ina la talanoa i le tuuina atu o ni auaunaga i le Ekalesia faapea foi i le nuu. O se vaega o na talanoaga e mafua ona o se miti a Naga ia avea ma se fomai o le fatu i se aso. “Ou te manao ia faaaoga la’u matata o se isi auala e tuuina atu ai se auaunaga,” o lana tala lea.
Na faamatala e le tupulaga talavou a le au Ratnam, o le i ai o le perisitua i totonu o lo latou aiga ua faateleina ai foi le soifua manuia o lo latou aiga. Latou te toe talanoa ai i le auala na taitai atu ai i latou uma e lo latou tamā i le Ekalesia i le valu tausaga ua mavae, tusa lava pe na manaomia lo latou malaga—o i latou uma e toafa—i le 40 kilomita (25 maila) i itu taitasi i se pasika e tasi ia tau lava ina latou oo ai i sauniga lotu. Latou te talanoa e uiga i tatalo o le faatuatua mo Pavani ina ua ma’i o ia i le aso na papatiso ai le Tama, e uiga i le faamanuiaga faaperisitua na tuuina atu e Tama ina ua ma’i tigaina Naga i le taimi o ana suega i le aoga, ma le auala e masani ona fautuaina ai i la’ua e Tama ma Tina, ma i le taimi e tatalo atu ai i le Tama Faalelagi pe a faia ni faaiuga tetele.
“Ua ou vaai i ni suiga lelei a o tuputupu ae lo matou aiga i totonu o le talalelei,” o le tala lea a Pavani. “O faataitaiga a o’u matua ma lo’u tuagane sa taialaina ai au o le uii o le aiga. Ou te iloa na fesoasoani mai Iesu Keriso ia te au i vaega uma o lo’u olaga. O loo siomia au e tagata e fesoasoani ma alolofa ia te au, ma e alofa le Faaola ia te au. E sili atu le taua o lena alofa ia te au nai lo se isi lava mea.”
Na faamaonia lea ituaiga alofa ina ua malaga lo matou aiga i le Malumalu o Hong Kong Saina e faamauina ai. Fai mai Naga, o le malumalu o le maluapapa sili lea ona saogalemu i luga o le fogaeleele: “O se nofoaga e paia. E na o le mafaufau lava i ai e aumaia ai le paia i totonu o lo matou aiga.” Ma o le mea lena ua avea ai le fale o mautotogi ai le au Ratnams o se nofoaga fiafia e nofo ai.
Saogalemu o Tusitusiga Paia
Fai mai Hepsiba, Sandeep, ma Sujith Batha, o e nonofo ma o latou matua i le taulaga o Visak (e ta’u e tagata o le nuu o le taulaga), o tusitusiga paia o se taula lea i lo latou uafu o le filemu. “O le faitauina o tusitusiga paia, matou te valaaulia ai le Agaga e taialaina i matou i le ala sao, ma faia ni faaiuga lelei i o matou olaga,” o le tala lea a Hepsiba. “Matou te valaaulia foi le Agaga i totonu o lo matou aiga pe faia a matou afiafi faaleaiga ma tatalo faaleaiga.”
E moni, fai mai Sandeep, e faamanatu atu e lona tina ia i latou “ina ia tatalo i aso uma pe a o ese atu ma toe foi mai. A fai mai o ia, ‘Faamolemole ia maua le agaga faafetai,’ ou te manao lava e faafetai mo mea uma.”
Fai mai Sujith e le gata i lo latou fale, ae o le isi nofoaga o le filemu o sauniga lotu ia a la latou paranesi, lea e mafai ona aoao faatasi ai e tagata o le ekalesia le talalelei ma e talia soo se tasi e tapuai ai, ma i gaoioiga lea e mafai ai e le autalavou o e tutusa o latou tulaga faatonuina ona fefaamalosiauai ma faamautinoa e le tasi le isi. “Na fetalai mai le Alii o i tatou o le malamalama o le lalolagi,” fai mai ai Sujith (tagai i le Mataio 5:14). “A tatou potopoto faatasi, tatou te faamumuina malosi lena malamalama ma lagona le mafanafana e fefaasoaa’i ai.”
Fiafia Ua I Ai i le Aiga
O le ituaiga faasoa lea na aumai ai le talalelei i le aiga o Butty. Na tau le mafai ona taofi le ataata o Sister Sandhya ma Sudha Butty ma o la’ua matua—sa matua naunau lava i latou e ta’u mai le auala na faailoa atu ai le Ekalesia ia i latou.
“Na matou liliu mai i le Ekalesia o se aiga,” o le tala lea a Sandhya. “Sa matou sailia le lotu moni mo se taimi umi. Na matou iloa e manaomia ona papatisoina i matou. Ona vaai lea o lo matou tama i ni faifeautalai se toalua. Fai mai le igoa o a la’ua pine, ‘O Le Ekalesia a Iesu Keriso,’ ma sa ia iloa e tatau ona ia talanoa atu ia i laua.”
Na amata lesona ma le famaoni. “Na matou aoao faapea, ina ia faia le finagalo o le Tama, na puapuagatia Iesu Keriso mo i tatou, faataunuuina le Togiola, ma faia ina ia mafai ona tatou toe foi i le Tama Faalelagi e ala i le mulimuli atu ia te Ia,” o le tala lea a Sudha. O le mautu ai o lena molimau, o lo latou auai atu i le Ekalesia na pei o le folau atu i le aiga e ala atu i ogasami malu, ma sa olioli le aiga o Butty i la latou faaiuga talu mai lena taimi.
O aso uma lava e folau ese atu ai vaa fagota mai Visakhapatnam. O aso uma foi e o ese atu ai le autalavou o Paranesi a Visakhapatnam Muamua, ma le Lua ma le Paranesi a Gajuwaka i le lalolagi. E mafai uma lava e i latou ona toe foi mai ma le saogalemu i se uafu ua masani ai. Peitai mo tagata o le Au Paia o Aso e Gata Ai, o se uafu e le mo na o le saogalemu i le taimi nei ae e malupuipuia mo le faavavau.
Ata na pueina e Richard M. Romney
O le Ekalesia ma le aiga ua maua ai e le aiga o Ratnam ni uafu saogalemu (itulau na muamua atu) ma mo (faasolo agai i luma i le agavale) o Sujith, Sandeep, ma Hepsiba Batha; Pavani ma Naga Ratnam; o le aiga o Butty; ma isi talavou mai Visakhapatnam, lea e i ai paranesi e tolu.