E Taua Au Faataitaiga
O le ola ai i le talalelei e le gata ina e malosi ai ae faapena foi isi.
Ou te matua faamemelo lava ma faaaloalo i alii talavou o e faamamaluina le Perisitua Arona. Sei ou faamatala atu se toatolu o i latou e o mai le Siteki o Nairobi Kenya i Aferika.
Ua Malosi ai Matini
I le 14 o ona tausaga, sa alu ese atu ai Matini o se tasi o le Paranesi a Westlands mai lona aiga i Nairobi, ma auai atu i se aoga nofotumau lea e na o ia lava le tagata o le Ekalesia. I le aoga la a Matini, o nisi aso o le vaiaso, e na o le ti lava ma le falaoa e ofoina atu mo le ‘aiga o le taeao. E le i lava ni tupe a le pulega o le aoga e tuuina atu ai se meaai faapitoa mo se toatasi, ona e 700 tamaiti aoga, o lea sa filifili ai Matini e inu le vai e ‘ai ai le falaoa.
Na te auai atu faatasi ma isi tamaiti aoga i le lotu i Aso Sa. O iina na ia faalogo ai i ni aoaoga faalelotu na ia iloaina e le manino i nisi taimi. E tele ina pupula vave ese nisi o tamaiti aoga mai ia te ia pe a latou talanoa e uiga i se talitonuga “ese”. O nisi taimi, e valaau ai o ia e nisi, o se tagata e tapuai i le tiapolo.
O nei luitau ua faamalosia ai ia Matini nai lo le faavaivaia. Na matua faamalosiauina lava o ia e ala i asiasiga faalemasina a ona matua ma savali o loo tuuina mai pea e le aunoa e lona peresitene o le paranesi, lea e masani lava ona auina atu le lomiga lata mai o le New Era. O lona faitauina na fesoasoani lea e faateleina ai lona lototoa e feagai ai ma nei luitau.
E Le Misia lava e Iosefa
E umia e Iosefa o le Uarota a Riruta le tofi o le aoao i le Perisitua Arona. E tumau lona faamaoni i le talalelei e ui e na o ia lava le tagata o le Ekalesia i se aoga tele lea e toatele ana tupulaga e tagofia fualaau faasaina ma isi mea leaga. E masani lava ona ia vave taunuu, ma e mama o ia ma e saunia lava e auauna atu pe a tofi e le peresitene o le korama ma le epikopo. E fesoasoani o ia i le tapenaina o le faamanatuga lea e toeitiiti lava o Aso Sa uma.
E Lafoina e Humphrey Ana Meaaoga Faatonuina
O Humphrey mai le Uarota a Upper Hill o se aoao foi. Na papatisoina o ia i le Ekalesia i le na o le lua tausaga ua mavae atu. E pei foi o Matini, o Humphrey o loo aoga nei i se aoga nofotumau. O se vaega o le mafuaaga ua faatupulaia ai lona faatuatua talu mai le taimi na ia liliu mai ai i le Ekalesia ona e maua ana meaaoga uma o le seminare i le meli, galue ai, ma toe lafo vave atu i le meli i lona faiaoga o le seminare.
Pe a tapuni le aoga nofo tumau, e masani lava ona savali Humphrey mo le 45 minute i le itu e tasi i Aso Sa ina ia maua sana taavale e alu ai i le lotu. E ui lava i lea, e tele lava ina vave ona ia taunuu i le lotu ma saunia e auauna atu e pei ona tofia ai.
Soo se taimi lava e na te maua ai sona tofiga e lauga, e filiga lava Humphrey i ana sauniuniga. E manino lava ia i latou uma o e faalogo i ai na tele se taumafaiga na ia tuuina i ai i le sauniaina o lana lauga.
Ola ai i Tulaga Faatonuina
O loo faaauau pea ona mou atu tulaga faatonuina o le ola mama, i le tele o vaega o le lalolagi i le taimi nei. O le tele o taimi e sailia ai e le tupulaga talavou ina ia fesootai atu i se mea lelei ma le faamamaluina ae latou te le iloa le mea e maua ai. O faleaoga mo aoaoga ua aumaia ai ni manatu sese faapea o tulaga faatonuina o le amiolelei ua faauigaina faaletagata ma e fesuisuia’i.
Ae o lou ola ai i tulaga faatonuina o lou faatuatuaga, e mafai ai ona e fesoasoani atu i lau tupulaga ina ia molimauina le tulaga mausali, mautinoa, toafilemu, ma le fiafia lea e oo mai ona o le talalelei. E mafai ona fesoasoani au faataitaiga e saunia ai isi ina ia talia aoaoga o le talalelei toefuataiina. E mafai ona fesoasoani le polokalama o le Tiute i le Atua mo alii talavou ma le Alualu i Luma o le Tagata Lava Ia mo tamaitai talavou e te latalata atili ai i le Atua ma faatuatuaina ai oe e tagata matutua ma le tupulaga.
O Le Faataitaiga Autu
Pe o oe o se alii talavou po o se tamaitai talavou, e te faamamaluina le perisitua pe a e ola i se olaga lea e faailoa atu ai i lau tupulaga ma isi o loo siomiaina oe, o loo e mulimuli tonu i le Faaola. O loo aumaia se faataitaiga matagofie mo oe i le soifuaga o le Faaola a o avea o se alii talavou. I le na o le 12 o Ona tausaga, sa naunautai lava o Ia i le galuega a Lona Tama Faalelagi, e pei foi ona Ia faamamaluina Ona matua faalelalolagi. Fai mai tusitusiga paia na Ia aoaoina isi i totonu o le malumalu. Na Ia faaofoina tagata matutua, tagata atamamai i Lona lava malamalama i aoaoga faavae (tagai i le Luka 2:42–52). Na faailoa mai e le Faaola o le 12 o tausaga e le laitiiti tele e amata ai ona malamalama i mea loloto o le talalelei pe a tatou agavaa ia mafuta le Agaga ma i tatou.
O loo tuuina mai i tusitusiga paia le tele o nisi tagata e avea ma faataitaiga a le autalavou o e na lototoa i lo latou faatuatuaga: Iosefa, atalii o Iakopo; Tanielu; Nifae; ma isi. E le gata i lea, e mafai ona tatou vaavaai atu i perofeta ma aposetolo o aso e gata ai mo ni faataitaiga i o tatou taimi.
O le toefuataiga o le Perisitua Arona o se faamautinoaga lea o le faatuatuaina o alii ma tamaitai talavou a le Ekalesia e le Tama Faalelagi. E Na te faamoemoe mai ia te outou alii talavou ina ia faaaogaina le perisitua e faamanuia ai Lana fanau iti ma e matutua. E te faia lena mea e ala i le aoaoina atu o le talalelei, papatisoina, taulimaina o le faamanatuga, fesoasoani atu i e mamai ma e vaivai, asiasi atu i aiga ma faamalolosia auaiga, ma auauna atu e pei ona tofia ai e lou epikopo po o le peresitene o le paranesi. O loo lagonaina e tagata le alofa o le Tama Faalelagi mo i latou, e ala i auaunaga o loo e faatinoina i le Perisitua Arona. I lea lava foi auala, ua mafai ai e tamaitai talavou ona mulimuli i faataitaiga a le Faaola e ala i le ola agavaa e o i le malumalu, auauna atu i isi o loo siomia ai, tausia i latou e i ai manaoga, ma atiina ae o outou malosiaga ma taleni.
Ua ou vaai i alii talavou i le tele o iunite o le Ekalesia, o loo faatinoina ma le faaaloalo ma le faamamaluina o latou tiute faaleperisitua. Ua ou vaai foi i tamaitai talavou o loo auauna atu ma o latou loto ma agaga atoa. O nei ituaiga auaunaga ma le tulaga o loo faatinoina ai e malosi atili ai lou faatuatua i le Atua le Tama ma Lona Alo o Iesu Keriso. E mafai ai foi ona fausia le faatuatua o i latou o loo e auauna atu i ai.
Iosefa
Matini
Humphrey
Agavale: ata na tusia e Matthew Reier; o isi ata na aumai i le faaaloaloga a Elder Sitati