O La’u Faaiuga Tele
“O le a papatisoina foi a latou fanau mo le faamagaloina o a latou agasala pe a valu tausaga le matua, ma maua le faaeega o lima” (MFF 68:27).
Nicole, e toe o mai nanei le au Johnson,” fai mai ai Tina. “Na e tatalo e pei ona latou talosagaina ai oe?”
“Leai, e lei faia,” o lau tala lea.
O Elder ma Sister Johnson o se ulugalii faifeautalai i le matou uarota. Sa o mai i la’ua i le afiafi faaleaiga e aoao mai ia te au lesona a faifeautalai.
E le toaaga lo matou aiga i le lotu, ma o lea e i ai nisi mea ou te le malamalama ai. Ma ona o le a valu ou tausaga, fai mai Tina e tatau ona ou filifili pe ou te papatiso.
O le vaiaso ua tea na aoaoina ai au e Elder ma Sister Johnson i le auala na tatalo ai Iosefa Samita ina ia iloa le upumoni. Ona la fai mai lea ou te tatalo e uiga i lo’u papatisoga.
“Faalogo i ou lagona,” o le tala lea a Sister Johnson. “O le auala lena o loo fesoasoani mai ai le Agaga Paia ina ia tatou iloa le mea moni.”
Sa ou faapea e mafai ona ou faatali seia atoa lou 14 tausaga e pei o Iosefa Samita.
O le matou lesona i lenei po, na faaputuputu ai e Elder Johnson ni upu i luga o isi ipu e faia ai se olo. Fai mai o ia a le lelei lou faavae, o le a pau i lalo le olo atoa.
“Aisea e te manatu ai e matua malosi lava le faavae o le Ekalesia?” sa ia fesili ai.
Sa ou manatua le lesona o le vaiaso ua tea. “Atonu ona sa ta’u atu e le Tama Faalelagi ma Iesu ia Iosefa Samita le auala e toefuatai mai ai,” o la’u tala lea.
“Sao lelei,” o le fai mai lea a Elder Johnson. “Ma o loo i ai o tatou perofeta soifua ma aposetolo e faatumauina i tatou i le ala sao.”
Na sao lena mea. E masani lava ona ou maua se lagona lelei pe a ou faalogo e uiga ia Peresitene Thomas S. Monson.
Ona tuu mai lea e Sister Johnson ia te au o le fesili sa ou popole ai.
“Ua e tatalo e uiga i lou papatisoga?”
“Leai, e lei faia,” o lau tala lea.
“E te fia papatiso?” na fesili mai ai Sister Johnson.
Sa ou manao e tali atu ia te ia, ae sa na o le faamimigi o ou tauau.
Sa manatu lou uso laitiiti ou te fefe i le faatofu o au i le vai aua o le mea lena e fefe ai o ia. Ae ou te fiafia i le vai, ma ou te lei mautinoa po o le a le mea na ou popole ai.
“O e fefe ile tiutetauave?” o le fesili mai lea a Sister Johnson.
O le taimi lava na fai mai ai Sister Johnson i lena mea, sa ou iloa e sao o ia. Sa fai mai Tina pe a uma ona ou papatiso, o le a ou tali atu mo au lava. O lona uiga o le a ou tali i au lava filifiliga. E tatau ona ou faaeteete ia tausia poloaiga a le Atua. Ou te le o mautinoa pe ua ou saunia mo lena tiutetauave. A e a pe a ou le toe alu i le lotu e pei o lo’u tama?
“Pe a atoa lou valu tausaga, o le a e tali atu mo au lava filifiliga e tusa lava pe e te le papatiso,” o le tala lea a Sister Johnson. “Ae pe a uma ona e papatiso ma faamauina, o le sili atu ona tele le fesoasoani mo oe i le faia o au filifiliga lelei. Ona o le a e maua le meaalofa o le Agaga Paia.”
Sa matou talanoa e uiga i nisi o poloaiga e manaomia ona ou tausia. Ua leva ona ou iloa o le ulaula ma le inu ava ma fualaau faasaina e leaga mo oe, ma e lei faigata i lau faalogo le tausia o le Upu o le Poto.
Ina ua ō le au Johnson, sa ou le toe lagonaina le fefe e papatiso. Sa ou manao e faia ni filifiliga sao ma tausia poloaiga a le Tama Faalelagi. Ma sa ou fiafia o le a fesoasoani mai ia te au le Agaga Paia.
Sa ou alu i lou potu ma tootuli i autafa o lo’u moega. Ao ou tatalo, sa mautu ou lagona o se manatu lelei le papatiso. Sa ou iloa o lena lagona o se tali i lau tatalo.
Ata na tusia e Craig Stapley