Manatu mo Afiafi Faaleaiga

O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O nai faataitaiga nei.

“O Le Ala Moni i le Fiafia,” i. 28: A uma ona faasoa atu le tusiga i lou aiga, mafaufau i fesili nei: E faapefea ona aafia lo tatou fiafia i le lumanai i faaiuga tatou te faia i le taimi nei? E faapefea ona tatou mautinoa o loo tatou faia faaiuga amiotonu?

“O Le Mana o Aoaoga,” i. 42: Sa faagaeetia le tusitala o lenei tusiga i le saunoaga a Peresitene Gordon B. Hinckley e uiga i aoga: “E te manaomia aoaoga uma e mafai ona e maua. Ositaulaga … soo se mea e tatau ona ositaulagaina ina ia agavaa ai outou lava e fai le galuega o le lalolagi.” Ia talanoaina o se aiga le ositaulaga ma faamanuiaga e maua mai ai.

“Aoao se Tagata e Fagota,” i. 54: Faitau faatasi ma lou aiga ma fai se aotelega o le tusiga lenei. Na faapefea ona saunia Ezra e fetaiai ma ona tofotofoga? Na faapefea ona fesoasoani le Tama Faalelagi ia te ia? Ia talanoaina mea e mafai ona fai e lou aiga e saunia ai.

“Faalagolago i le Alii,” i. 60: Faitau faatasi o se aiga le tusiga. Ia mafaufau e fai atu i tagata o le aiga e fefaasoaa’i ni aafiaga i taimi na tali mai ai a latou tatalo. Talanoa i ni auala eseese e mafai ona tali mai ai le Tama Faalelagi i tatalo ma le taua o le faalagolago ia te Ia.

O Fesili a Lo’u Afafine

I le avea ai ma se epikopo o le matou uarota, ou te uunaia ai lava matua e tuu atu ni avanoa i a latou fanau e faiaoga ai i afiafi faaleaiga. Sa tonu ia i ma’ua ma lo’u toalua e fai e pei ona ou ta’ua.

Sa faiaoga muamua lo ma atalii, ma sa matou fiafia i lana lesona e uiga i le tatalo. O le Aso Gafua na sosoo ai o le avanoa lea o lo’u afafine. Sa na o ni nai masina ua te’a atu na papatisoina ai o ia. O lana autu o le foafoaga a le Atua. Sa ia tuuina mai ni fesili, lea sa matou auauai i le taliina. Ona ia tuuina mai lea o lana molimau ma faauma loa.

Sa fai atu lo’u atalii, “O lena e te le’i aoaoina mai i matou; sa na o lou fai mai lava o ni fesili.” Ae sa ou ta’u atu i lo’u aiga, sa ootia au ina ua tali atu lo’u toalua i se tasi o fesili, ma faapea atu, e faafetai o ia i le Atua mo le foafoaina o iunite o le aiga ma le tuuina mai ia te ia o se aiga lelei ma se toalua agaalofa. Sa ou ta’u atu ia i latou, ua tumu lo’u loto i le faafetai ina ua taliina e lo’u afafine laitiiti le fesili, “O ai na foafoaina le lalolagi?” e ala i lona fai mai, “O Iesu.” E tele nisi tali sa ou iloa e maoae ai lo latou atamai.

E ui lava la e le’i “faiaoga” lo’u afafine e pei ona faamoemoeina e lo’u atalii, ae o lana lesona—ma isi lesona sa aoao mai e la’u fanau—o afiafi faaleaiga aupito sili ia ona ou fiafia i ai.

Richard Ikpegbu, Nigeria