Faatupulaia le Faalagolago o le Tagata ia te Ia Lava i Ekuatoa
O le saolotoga o le tagata lava ia ma le tiutetauave o le tagatanuu e faalagolago lea i le mataupu faavae o le fesoasoani i le tagata ia fesoasoani ia te ia lava,” o le saunoaga lea a Peresitene Ezra Taft Benson (1899–1994), o le Peresitene lona sefulutolu o le Ekalesia, i lana saunoaga amata i le 1975 i le Benson Institute Agriculture and Food Institute and Corporation, o se polokalama o Auaunaga Alofa a le Au Paia o Aso e Gata Ai.
I lalo o lena filosofia o le ola faalagolago o le tagata ia te ia lava, ua galulue ai le Inisitituti a Benson ma le faitau afe o tagata e faaleleia atili le gaosiga o meaai, taumafa paleni, ma le soifua maloloina, faateleina o le tulaga lelei o le olaga mo nisi o tagata matitiva o le lalolagi.
I le 2009 sa malaga atu ai sui o le Inisitituti a Benson i Ekuatoa, o se atunuu e tamaoaiga i faatoaga. Ae peitai, e tusa ai ma faamaumauga a le Faalapotopotoga o le Soifua Maloloina o le Lalolagi, i totonu o lenei atunuu ua toeitiiti 15 miliona tagata, o le 23 pasene o tamaiti e i lalo o le lima tausaga le matutua o loo faaauau pea ona maua i le tino paeee. O taumafaiga a le Inisitituti a Benson o loo fesoasoani e tuuitiitia lena fuainumera, a o galulue ai i latou o loo aafia ai e momotu le lio o le mativa.
Fai mai se tasi o tamaitai, o se tina o se fanau e toaono, a o lei oo mai le Inisitituti a Benson, sa masani ona faigata ona tausi lona aiga: “O se mea faanoanoa le avea ma se tina ma le matuai mativa foi, lea e le mafai ai ona e tuuina atu i lau fanau se meaai po o se fasi falaoa i aso taitasi,” o lana tala lea.
Ua aoaoina e aiga o loo galulue faatasi ma le Inisitituti a Benson ia auala lelei e totoina ai faatoaga, faasolosolo le totoina o laau aina, faiga o lafumanu laiti, meaai paleni lelei, tumama o le tagata lava ia, ma le gaseseina lelei o meaai.
O le fiaai lea sa avea ma se faafitauli i aso taitasi mo le toatele, ua avea ma se mea e seāseā ona tupu ona o le faatinoina o auala fou mo le faiga o faatoaga. Sa vaaia e aiga le matuai faateleina o meaai e maua, ma mafai ai ona latou teuina a latou lava meaai ma faapea ai foi ona faatauina atu ia fua o faatoaga mo se tupe maua. Ma le isi, ua oo ai aiga i se tulaga lelei atu o le soifua maloloina ina ua faaleleia atili a latou taumafataga ma le tumama. O le taumafaina o fua o a latou galuega mai faatoaga, ua latou maua ai niutiriene sa le maua muamua i a latou mea e ‘ai.
“Sa masani ona i ai a matou tamaiti sa le lelei i le aoga,” o le tala lea a se faiaoga i le lotoifale. “Ina ua maea le polokalama, sa matuai vave ona atamamai tamaiti. O le taimi muamua, sa i ai a matou tamaiti sa masani ona mama’i; mulimuli ane, sa le’i toe mama’i tamaiti. Sa masani ona latou momoe i totonu o vasega; mulimuli ane, latou te le’i toe momoe i vasega. Sa matuai foliga ‘ivavā ma vaivai i latou, ae ina ua maea le polokalama sa sili atu ona foliga maloloina ma au malolosi.”
O taumafaiga taulamua uma a le Ekalesia, e faavae i mataupu faavae faamaonia o le ola faalagolago o le tagata ia te ia lava. O lena mataupu faavae faatasi ai ma le faiga masani a le Inisitituti a Benson o le galulue i le anoanoa’i o le potomasani ma le malamalama, ua faaauau ai ona faamanuia olaga o le faitau afe o tagata i le lalolagi atoa.
Ua vaaia e aiga o loo galulue faatasi ma le Inisitituti a Benson le ola maloloina sili atu, a o faaleleia atili a latou taumafataga ma tumama.