O Le Mana o se Faataitaiga Amiotonu

Saunia e Jerry Stringam

Ia Aperila 1992, sa nonofo ai lo matou aiga i Provo, Iuta, ina ua matou siitia mai Kanata e faamaea lo’u faailoga tikeri o le faaenisia i le Iunivesite a Polika Iaga. Sa faauo atu lou atalii o Jase, e 17 tausaga, i se tamaitai talavou e igoa ia Krista.

I le po o le Aso Toonai i le faaiuga o le vaiaso o le konafesi aoao, sa sau ai Jase i le potu malolo ma faanoi e faaaoga le taavale e o ai ma Krista e inu se la ipuinu. Sa ou togi atua le ki ia te ia, ona alu lea i le umukuka e telefoni ia te ia. Sa mafai ona ou faalogo i le itu e tasi o le talanoaga, sa faapea:

“Talofa, Krista, o au, o Jase. Sa ou mafaufau pe e te manao ta te o e inu se ta ipuinu.” Leai se pisa. “O le uiga o lau tala sei uma le sauniga perisitua? Ia, ua lelei, ou te valaau atu la i le taimi lena. Toe feiloai.”

Sa tuu i lalo e Jase le telefoni ma toe foi mai i le potu malolo.

“E a la, lua te o?” o lau fesili lea.

“Fai mai e fia alu,” o lana tali lea, “ae fai mai e toe valaau atu ia te ia pe a ou foi mai le sauniga perisitua.” Sa ia savali lemu atu i lona potu, ma se foliga faanoanoa.

Sa pei na ou lavea i se faaputuga piliki. Sa ou ola ae i Alberta i saute, toeitiiti 80 maila (130 km) le mamao mai le nofoaga autu o le siteki. E lei i ai lava se tasi na mafaufauina ou te alu atu i sauniga o le konafesi, aemaise le sauniga perisitua, e oo lava i ou matua, o e na i ai o la tofiga faaletaitai i le matou paranesi. A o lea ua i ai se tasi o loo faitauina lea tulaga.

O le a sa’u tali i foliga faanoanoa o lo’u atalii a o ia alu atu i lona potu? Sa ou iloa o la’u faaiuga o le a avea ma se faataitaiga i tausaga a sau.

Sa ou tu i luga mai lo’u nofoa ma valaau atu ia Jase ma lo’u atalii lona lua, lea faatoa faauuina o se tiakono, “Sui o lua lavalava. E 10 minute tatou te o ai i le sauniga perisitua i le nofoaga autu o le siteki.” Sa ou faavave e sauni, ma ina ua ou aluese mai lo’u potumoe, ua saunia o’u atalii e toalua, ma sa matou agai atu loa i le taavale.

Ou te le i manatuaina lelei ia lauga, ae ou te manatua na matou lagonaina le Agaga. Sa lagona le fiafia i lo matou i ai faatasi ma ou atalii i le sauniga perisitua. Ina ua matou toe foi mai i le fale, sa lagona le fiafia o Jase ia te ia lava, ma sa ou lagona ai foi le fiafia. Sa ia valaau atu ia Krista, ona o ai lea e faatau a la ipuinu.

Na mavae le luasefulu tausaga talu mai lena aso, e le i misia lava e e umia le perisitua i lo matou aiga se sauniga perisitua se tasi o le konafesi aoao. Sa maua e lo matou aiga se avanoa e sui ai, ona o se faataitaiga amiotonu a se tamaitai talavou i ona talitonuga, ma o loo faaauau pea ona matou faalogo i upu a perofeta o aso e gata ai ma lagonaina le Agaga i sauniga o le perisitua i konafesi aoao.

Ata na tusia e Roger Motzkus