Faapaleniina o le Upumoni & Faapalepale
Mai se lauga o le faeasaite a le Ofisa o Aoga a le Ekalesia sa fofogaina i le aso 11 o Setema, 2011. Mo le anotusi atoa i le FaaPeterania, alu i le mormonnewsroom.org/article/-truth-and-tolerance-elder-dallin-h-oaks.
O le i ai ma le natura o le upu moni o se tasi o fesili taua o le olaga faitino. Sa ta’u atu e Iesu i le kovana Roma o Pilato na sau o Ia i le lalolagi e “molimau i le upu moni.” Sa tali lena tagata le talitonu, “Po o le a le upu moni?” (Ioane 18:38). Sa tautino muamua atu e le Faaola, “O a’u nei le ala, ma le upu moni, ma le ola” (Ioane 14:6). I faaaliga i ona po nei, sa Ia fetalai mai ai, “O le upu moni o le iloa lea o mea e pei ona i ai, ma e pei ona sa i ai, ma e pei ona o le a oo mai” (MF&F 93:24).
Tatou te talitonu i le upumoni aiai e aofia ai le i ai o le Atua ma le sa’o ma le sese ua faavaeina e Ana poloaiga. Ua tatou iloa o le i ai o le Atua ma le i ai o le upu moni a’ia’i e taua i le olaga i lenei lalolagi, e tusa lava pe talitonuina pe leai. Ua tatou iloa foi o loo i ai le tiapolo ma o nisi mea e matuai faavavau lava ona leaga.
O lipoti le manuia o le taatele o le gaoi ma le pepelo i tagata aoaoina ua faailoa mai ai se tulaga lautele o le leai o ni amioga lelei ma e le o lava le malamalama i ai o le toatele o tagata i le lelei ma le leaga. O le taatele o le faatautee, ave faagaoi, ma le le faamaoni ua mafua ai ona manatu le toatele pe ua leiloa atu le faavae o amioga lelei i atunuu i le itulagi i Sisifo lea na maua mai i o latou tofi faa-Kerisiano-Iutaia.1
E lelei le popole i lo tatou faavae o amioga lelei. Ua tatou ola i se lalolagi ua anoanoai tagata maualuluga ua aoaoina ma faia se talitonuga e faapea e leai se sa’o po o se sese a’ia’i—e faapea o le pule uma ma tulafono uma o amioga o filifiliga ia e fai e tagata e mafai ona sili atu i poloaiga a le Atua. E toatele lava foi ua latou fesili pe e i ai se Atua.
O le filosofia e uiga i le le tumau o amioga lelei ae e eseese mo tagata eseese, lea e faapea mai e saoloto tagata taitoatasi e filifili mo ia lava le mea e sa’o ma le mea e sese, ua avea ma se talitonuga le aloaia mo le toatele o tagata i le Iunaite Setete ma isi malo i Sisifō. I le tulaga e sili ona lamatia ai, o amioga faatiapolo ia sa masani ona nānā ma ufiufi e pei o se fula, o le taimi nei ua faaaliali ma faalealea e pei o se fu’a. O le uunaia e lenei filosofia, ua toatele ai le tupulaga faia’e ua auai i le faia o tuinanau e faamalieina ai i latou lava, ponokalafi, tala pepelo, gagana masoa, lavalava le talafeagai e faaaliali ai itutino, vali i le taina o pe’a ma le tatuiina o vaega o le tino, ma le auai i uiga feusuai faatufanua.
E toatele taitai o ekalesia ua aoaoina le i ai o le Atua o le faitulafono silisili, o lana poloaiga ua matuai sa’o ma tonu ai nisi o amioga faapitoa ae matuai sese ma lē tonu ai nisi o amioga.2 Sa muai silafia e perofeta o le Tusi Paia ma le Tusi a Mamona lenei vaitaimi, lea o le a faapea ona avea ai tagata ma “e ua tele le manao i mea faafiafia ae leai se manao i le Atua” (2 Timoteo 3:4) ma, e sa’o a, i le vaitaimi o le a teena ai e tagata le Atua (tagai i le Iuta 1:4; 2 Nifae 28:5; Moronae 7:17; MF&F 29:22).
I lenei tulaga faaletonu, o i tatou o e talitonu i le Atua ma le upu moni e faatatau i ai o le sa’o a’ia’i ma le sese e i ai le luitau o le ola ai i se lalolagi e leai se atua ma ua faateteleina ai le toilalo. I le tulaga lenei, o i tatou uma lava—ae maise lava i le tupulaga faia’e—ua i ai so tatou tiute o le tutu atu ma tautatala atu e faamautu o loo i ai se Atua ma o loo i ai upu moni a’ia’i ua faavaeina e Ana poloaiga.
E toatele faiaoga i aoga, kolisi, ma iunivesite o loo aoaoina ma faatinoina amioga lelei e fesuisuiai e tusa ai ma tulaga. O lenei tulaga ua suia ai uiga faaalia o le toatele o tagata talavou o e o loo suia o latou tulaga o ni faiaoga o a tatou fanau ma le au sui uiga faaalia o tagata lautele e ala i ala o fesootaiga ma faafiafiaga taatele. O lenei filosofia o amioga lelei e le tumau ae eseese mo tagata eseese ua teenaina ai le mea ua manatu le faitau miliona o tagata Kerisiano, Iutaia, ma Musalemi talitonu o le ute lea, ma o lenei teenaina ua afua ae ai faafitauli ogaoga mo i tatou uma. O le mea e tatau ona fai e tagata talitonu e uiga i lenei mea, ua faailoa atu ai le vaega lona lua o a’u autu e lua, o le faapalepale.
O le faapalepale ua faauigaina o se uiga faaalia lelei ma amiotonu agai i ni manatu faaalia ma aga e le masani ai pe ese foi agai i tagata o e latou te umia pe faia. Ona o auala faaonaponei o feoaiga ma fesootaiga ua aumaia latalata uma ai i tatou i tagata eseese ma manatu eseese, o lea ua faateleina atu ai lo tatou manaomia o le faapalepale.
O lenei faateleina atu o le aafia i tulaga eseesega e faatamaoaiga ai o tatou olaga ma faafaigata ai foi [o tatou olaga]. E faatamaoaigaina i tatou i fegalegaleaiga ma tagata eseese, lea e faamanatu mai ai ia i tatou le matagofie o le eseese o fanau a le Atua. Peitai o le eseese i aga masani ma tulaga faatonuina ua luitauina ai foi i tatou e faailoa mea e mafai ona taliaina e ogatasi ma la tatou aganuu ma tulaga faatonuina o le talalelei ma mea e le ogatasi ai. I le auala lenei, o le eseese e faateleina ai le avanoa mo feteenaiga ma e manaomia ai ona tatou magafagafa atili e uiga i le natura o le faapalepale. O le a le faapalepale, o le a le taimi e faaaoga ai, ae o le a foi le taimi e le faaaogaina ai?
O ni fesili faigata nei mo i latou o e faamautuina le i ai o le Atua ma le upu moni a’ia’i, nai lo i latou o e talitonu i le le tumau o amioga lelei ae e eseese mo tagata eseese. O se tagata e vaivai lona talitonuga i le Atua ma e leai sona talitonuga maumaututu tele i lelei ma leaga, e le masani ona oo o ia i le faigata o le taumafai ia faapalepale i manatu po o aga a isi tagata. Mo se faataitaiga, e le manaomia e se tagata e le talitonu i le Atua ona filifili po o a ituaiga ae po o a foi taimi e mafai ai ona [faaali atu le] faapalepale i le laulauvavale po o le upuvale ae o a foi ituaiga e tatau ona faafetoaia. O tagata e le talitonu i le Atua po o le upu moni a’ia’i i tulaga o amioga lelei e mafai ona latou vaaia i latou lava o ni tagata e aupito sili ona faapalepale. O i latou ia, e toetoe o mea uma lava e taliaina. O lenei ituaiga talitonuga e mafai ona papale ai e toetoe lava o soo se amioga ma soo se tagata. O le mea e leaga ai, o nisi o e e talitonu i le le tumau o amioga lelei ae e eseese mo tagata eseese, e foliga mai e faafaigata ona latou faapalepale ia i latou o e taofimamau e i ai se Atua o le e tatau ona faaaloalogia ma o loo i ai ni amioga lelei a’ia’i faapitoa e tatau ona tausisia.
O Upu Moni Aia’i e Tolu
O le a la le uiga o le faapalepale ia i tatou ma isi tagata talitonu, ma o a o tatou luitau faapitoa i lona faaaogaina? Ou te amata i upumoni aiai e tolu. Ou te faailoa atu na mea o se Aposetolo a le Alii o Iesu Keriso, ae ou te talitonu o le tele lava o nei manatu ua i ai i tagata talitonu.
Muamua, o tagata uma o uso ma tuafafine i le Atua, ua aoaoina i totonu o o latou ekalesia eseese ia alolofa ma fai mea lelei i le tasi ma le isi. Sa fofoga mai e Peresitene Gordon B. Hinckley (1910–2008) lenei manatu mo le Au Paia o Aso e Gata Ai: “O i tatou taitoatasi [mai aulotu o ekalesia eseese] e talitonu i le tulaga faaletama o le Atua, e ui atonu tatou te eseese i lo tatou faamatalaina o Ia. O i tatou taitoatasi o se vasega o se aiga toatele, o le aiga o tagata soifua, o atalii ma afafine o le Atua, o lea la o ni uso ma ni tuafafine. E ao ona tatou galulue malosi atu e atiae le avafatafata, o se uiga faaalia o le onosai, ma le faapalepale o le tasi i le isi e ui lava i mea uma e faatatau i aoaoga faavae ma filosofia ia atonu tatou te talitonu i ai.”3
Ia matau sa saunoa Peresitene Hinckley i le avafatafata faapea foi ma le faapalepale. O le ola faatasi ai ma le fefaaaloaloa’i mo eseesega o le tasi ma le isi o se luitau i le lalolagi i aso nei. Peitai—ma o i ou te faailoa atu ai se upumoni aiai lona lua—o lenei ola faatasi ai ma eseesega o le mea lea o loo aoao ai i tatou e le talalelei a Iesu Keriso e tatau ona tatou faia.
E tusa le malo o le Atua ma le mea faafefete, na aoao mai Iesu (tagai i le Mataio 13:33). O le mea faafefete—fefete—ma tuu i totonu o falaoa e tolu tumu ua oo ina faafefeteina uma ai, o lona uiga na faafefeteina e ala i ona aafiaga. Sa aoao mai foi lo tatou Faaola, o le a oo i Ona soo faigata i le lalolagi (tagai i le Ioane 16:33), o le a toaitiiti o latou aofai ma o le a itiiti a latou puleaga (tagai i le 1 Nifae 14:12), ma o le a inosia i latou aua e le o ni ō le lalolagi i latou (tagai i le Ioane 17:14). Ae peitai o lo tatou tiute lena. Ua valaauina i tatou ina ia tatou nonofo faatasi ma isi fanau a le Atua o e e le tutusa a tatou tapuaiga po o o tatou tulaga faatonuina ma o e e le’i maua ia matafaioi o feagaiga ua tatou tauaveina. E tatau ona tatou i ai i le lalolagi a le ni o o le lalolagi.
Ona ua poloaiina e mulimuli ia Iesu Keriso ia avea ma mea faafefete, o lea e ao ai ona tatou saili ia maua mai le faapalepale o i latou o e ita mai ia i tatou ona o le le avea o i tatou ma ni ō o le lalolagi. O se vaega o lenei mea, o le a tatau ai i nisi o taimi ona tatou luiina tulafono o le a faapea ona faaleaga ai lo tatou saolotoga e faatino ai la tatou tapuaiga, o le faia e faalagolago i a tatou aia tatau faavae o le saoloto e faatino tapuaiga. O le atugaluga tele lava “o le mafai e tagata o tapuaiga uma ona faaleleia a latou sootaga ma le Atua ma le tasi ma le isi e aunoa ma le faasalavei mai o le malo.”4 O le mea lena tatou te manaomia ai le loto malamalama ma le lagolagosua pe a afai e ao ona tatou finau atu e puipui le saolotoga o tapuaiga.
E tatau foi ona tatou faatinoina le lavapapale ma le faaaloalo i isi. E pei ona aoao mai le Aposetolo o Paulo, e tatau i le Au Kerisiano ona “tausisi i mea e tupu ai le filemu” (Roma 14:19) ma, i le tele e mafai ai ia “nofo lelei ma tagata uma lava” (Roma 12:18). O lea, e tatau ai ona tatou nofouta ia faamamalu i le lelei tatou te vaaia i tagata uma faapea ma le tele o manatu ma faatinoga e ese mai i o tatou manatu. E pei ona aoao mai le Tusi a Mamona:
“O mea uma ua lelei e mai le Atua; …
“… o le mea lea, o mea uma e valaau mai ma faatosina mai ia faia mea lelei, ma alofa i le Atua, ma auauna atu ia te ia, ua musuia e le Atua.
“O le mea lea, ia outou faaeteete … ia outou le faamasino … le mea ua lelei ma mai le Atua o se mea mai le tiapolo” (Moronae 7:12–14).
O lena taulimaina o eseesega o le a faatupuina ai le faapalepale faapea foi ma le faaaloalo mo i tatou.
O lo tatou faapalepale ma le faaaloalo mo isi ma o latou talitonuga e le faapea o le a tatou lafoai ai lo tatou tautino i upumoni ua tatou malamalama i ai ma feagaiga ua tatou faia. O le upu moni a’ia’i lona tolu lena. O lo tatou tiute o le avea ma fitafita i le taua i le va o le upu moni ma le mea sese. E leai se savea tuvaelua. E ao ona tatou tutu atu mo le upumoni, e tusa lava pe o tatou faatinoina le faapalepale ma le faaaloalo i talitonuga ma manatu e ese mai o tatou lava talitonuga ma manatu ma faapea mo tagata o taofia.
Faapalepale mo Amioga
E ui e ao ona tatou faatinoina le faapalepale ma le faaaloalo mo isi ma o latou talitonuga, e aofia ai o latou aia tatau e faamalamalama ma lagolago ai o latou tulaga, ae ua le tatau ona tatou faaaloalogia ma faapalepale i amioga sese. O lo tatou tiute i le upumoni e manaomia ai ona tatou saili e taofi amioga e sese. E faigofie lenei mea i amioga lamatia lea e toatele tagata talitonu ma tagata e le talitonu latou te iloa o ni amioga sese pe le taliaina.
Ae o amioga e itiiti le tulaga e lamatia ai, lea e oo foi i tagata talitonu latou te le ioeina pe sese, o le natura ma le ogaoga o mea e tatau ona tatou faapalepale ai e sili atu le faigata o le faauigaina. O le mea lena, sa tusi mai ai ia te a’u se tamaitai magafagafa o le Au Paia o Aso e Gata Ai e uiga i lona atugaluga e faapea “o le faauigaga o le ‘faapalepale’ e le lalolagi e foliga mai ua matele ina faaaogaina e faatatau i le taliaina o sitali amioleaga o le olaga.” Sa ia fesili mai pe o le a le faauigaga a le Alii o le faapalepale.5
Ua saunoa mai Peresitene Boyd K. Packer, Peresitene o le Korama a Aposetolo e Toasefululua: “O le upu faapalepale e le tu na o ia. E manaomia ai se mea faitino ma se tali e agavaa ai e avea ma se uiga lelei. … O le faapalepale e masani lava ona poloaiina mai ae e seasea ona toe faafoiina mai. Ia faaeteete i le upu faapalepale. O se uiga lelei e ese le femoumouai.”6
O lenei lapataiga musuia ua faamanatu mai ai ia i tatou o tagata e talitonu i le upumoni aiai, o le faapalepale mo amioga e pei lava o se tupe siliva e itu-lua. O le faapalepale po o le faaaloalo o loo i le tasi itu o le tupe, ae o le upumoni e i ai pea i le isi itu. E le mafai ona e mauaina pe faaaoga le tupe o le faapalepale e aunoa ma le mafaufau i itu uma e lua.
Na faaaoga e lo tatou Faaola lenei mataupu faavae. Ina ua Ia faafesagai ma le fafine na molia i le mulilua, na fetalai Iesu i upu faamafanafana o le faapalepale: “Ou te le faasala foi ia te oe.” Ma, a o Ia auina ese atu o ia, na Ia fetalai i upu faapoloaiga o upumoni: “Alu ia oe, aua e te toe agasala” (Ioane 8:11). E tatau ona aoaoina ma faamalolosia i tatou e ala i lenei faataitaiga o le saunoa atu i le faapalepale ma le upumoni: o le agalelei i fesootaiga, ae ia mausali i le upumoni.
Sa tusi mai se tasi tagata magafagafa o le Au Paia o Aso e Gata Ai e faapea: “E masani ona ou faalogo o ta’u fua le suafa o le Alii, ma e i ai foi a’u uo o e na latou tauina mai ia te a’u o loo latou nonofo faatasi ma a latou uo tama. Ua ou iloaina o le tausia o le Aso Sapati ua toetoe lava ina a le usitaia. E mafai faapefea ona ou tausia la’u feagaiga o le tu atu o se molimau ae aua ai ne’i [o’u] faatiga ai i nei tagata?”7
Ou te amata atu i a tatou amioga patino. I le faatatauina o le manaomia tele lea o nisi taimi e faatautava ai o le upumoni ma le faapalepale i nei amioga e tolu—fai upu masoa mataga, nonofo faapouliuli, ma le solia o le Sapati—ma isi amioga e tele, e le tatau ai ona tatou taliaina ni manatu e ese mai ia i tatou lava. E tatau ona pulea i tatou e manaoga o le upumoni. E tatau ona tatou malolosi i le tausiga o poloaiga ma a tatou feagaiga, ma e tatau ona tatou salamo ma faaleleia atili pe a tatou sese.
Ua aoao mai Peresitene Thomas S. Monson: “O le foliga o le agasala i aso nei e masani ona faia ai se matapulepule o le mafai ona onosaia mea faigata. Aua nei faaseseina; o tua atu o lena faafoliga o loo i ai le lototiga, le fiafia, ma le tiga. … Afai e uunaia oe e na tagata e ta’ua o au uo e fai soo se mea e te iloa e sese, ia fai oe ma tagata e tu atu mo le mea tonu, e tusa lava pe e te tu ai na o oe.”8
E faapena foi la, i a tatou fanau ma isi o e ua i ai sa tatou tiutetauave e aoaoina, o lo tatou tiute i le upumoni e matuai taua tele. E moni, o taumafaiga e aoao atu e pau le ala e fua mai ai, e ala lea i le faitalia o isi, o lea o a tatou aoaoga e ao lava ona faia i taimi uma ma le alofa, onosai, ma le faatauanau.
Ou te liliu atu nei i tiute o le upumoni ma le faapalepale i a tatou fegalegaleaiga patino ma uo o e faaaogaina gagana masoa a o tatou i ai, nonofo faapouliuli ma se paaga, pe o le le tausia lelei o le Sapati.
O lo tatou tiute o le onosaia o mea faigata o lona uiga, ia leai se tasi o nei amioga—po o isi tatou te manatu ua ui ese mai le upumoni—ona faaosofia i tatou e tali atu i ai i ni faamatalaga inoino po o ni amioga faalealofa. Ae peitai, o lo tatou tiute i le upumoni e i ai ona lava vaega o tulaga manaomia ma ona vaega o faamanuiaga. A tatou “tautalatala faamaoni taitasi ma le la te tuaoi” ma a tatou “[tautatala] faamaoni i le alofa” (Efeso 4:15, 25), ua tatou galulue o ni auauna a le Alii o Iesu Keriso, i le faia o Lana galuega. O le a tatou tutu faatasi ma agelu, ma o le a Ia auina mai Lona Agaga Paia e taiala i tatou.
I lenei mataupu maaleale e tatau ona tatou mafaufau muamua pe—po o le a le tele e faapea—ona tatou ta’u atu ai i a tatou uo mea ua tatou iloa ua moni e uiga i o latou amioga. I le tele o tulaga o lenei filifiliga e mafai ona faalagolago po o le a le tuusa’o o lo tatou aafia patino ai.
O le faaaogaina pea lava pea o upusa a o tatou i ai, o se mafuaaga talafeagai lea mo i tatou e ta’u atu ai le mea moni e faatupu masei lena mea ia i tatou. O upusa e faaaoga e i latou e le talitonu ae tatou te le o i ai, atonu e le o se mea lena tatou te faafeto’aia ai i latou e faatupu masei.
O le nonofo faapouliuli ua tatou iloa o se agasala matuia, lea e le tatau ona faia e le Au Paia o Aso e Gata Ai. Pe a faia e i latou e siomia i tatou, o se amioga patino po o se mea ua faatonuina i tatou e aua le ano i ai, lagolagoina, pe fesoasoani ai. I le fua faatatau i le va o le upumoni ma le faapalepale, o le faapalepale e mafai ona taatele i tulaga o ni amioga ia tatou te le aafia tonu ai. Ae afai tatou te aafia tonu i le nonofo faapouliuli, e tatau ona taitaia i tatou e lo tatou tiute i le upumoni. Mo se faataitaiga, o se isi itu le le amanaia o agasala matuia pe afai e patino; ae o se isi foi itu le talosagaina [o i tatou] e lagolago pe matuai faamaonia lena agasala matuia, e pei o le faanonofoina o i latou i totonu o o tatou lava fale.
I le faamamaluina o le Sapati, atonu e tatau ona tatou faamalamalama atu lo tatou talitonuga e faapea o lo tatou faamamaluina o le Sapati, e aofia ai lo tatou aai ma feinu i le faamanatuga, e toe faafouina ai lo tatou faaleagaga ma fai ai i tatou o ni tagata lelei atu i aso o totoe o le vaiaso. Ma, i isi tagata talitonu, atonu tatou te ono faailoa atu le talisapaia o le mea moni e faapea e i ai ni itu tatou te talitonu tutusa ai i mea e sili ona taua: o i tatou uma e talitonu i le Atua ma le i ai o le upumoni a’ia’i, e ui ina tatou eseese i a tatou faauigaga o na mea taua. Ae o tua atu o lena mea, e tatau ona tatou manatua le aoaoga a le Faaola e tatau ona tatou aloese mai le faia o ni finauga (tagai i le 3 Nifae 11:29–30) ma o a tatou faataitaiga ma a tatou talaiga e tatau ona avea ma “leo o le lapataiga, o tagata taitoatasi i lona tuaoi, i le malu ma i le agamalu” (MF&F 38:41).
I nei mea uma e le tatau ona tatou taumafai e faamasino i o tatou tuaoi ma i latou tatou te fegalegaleai i aafiaga faaiu o o latou amioga. O le faamasino o le mea lena a le Alii, ae le o i tatou.
Mataupu Faavae o Tulaga Faaupufai
A ulufale atu tagata lotu i tulaga faaupufai e taumafai e faatosina le faiga po o le faatinoina o tulafono e uunaia e o latou talitonuga, e tatau ona latou faaaogaina ni mataupu faavae e ese mai.
Muamua, e ao ona latou sailia le musumusuga a le Alii ina ia iloa lelei ai ma atamai i le filifiliga o mataupu faavae moni ua latou taumafai e faalauiloa atu e ala i le tulafono po o le faatinoga o faiga filifiliga. O le mea masani lava, e tatau ona latou aloese mai le sailia o tulafono po o faatinoga faaletaitai e fesoasoani ai i talitonuga ia e iloga i tagata lotu, e pei o le faamalosia o le faatinoga o tapuaiga, e tusa lava pe o le fautuaina atu. E mafai e tagata lotu ona faaeteete teisi i le sailia o faatinoga faalemalo o le a faapea ona faatino ai mataupu faavae e maotua atu nai lo na o le fesoasoani i le faatinoina o o latou talitonuga, e pei o tulafono e faatatau i le soifua maloloina o tagata lautele, saogalemu, ma amioga lelei.
E mafai ma e ao i tagata lotu ona sailia tulafono o le a faapea ona faasaoina ai saolotoga faaletapuaiga. Faatasi ai ma le malosi o le fesuisuiai o talitonuga i amioga lelei, ua oo ai i le Iunaite Setete ma isi atunuu se faaitiitia leagafaia o le tuufaatasiga o faaaloalo lautele e uiga i tapuaiga. O tapuaiga sa avea ma se vaega taliaina o le olaga faa-Amerika, ae o lea ua avea nei ma se mea ua fesiligia i mafaufau o le toatele. O nisi tagata taua ua oo lava ina latou fesiligia le mamao e tatau ona oo i ai le puipuiga e le faavae o le saolotoga e faatino ai tapuaiga, e aofia ai le aia tatau e faataunuu ma talai atu ai mataupu faavae faalelotu.
O se mataupu taua lenei e ao ai ia i tatou o e e talitonu i se Tagata Silisili o le ua ia faatuina le sa’o atoatoa ma le sese i amioga faaletagata, e ao ona tatou autasi i a tatou aia tatau ua leva ona tausisia e faatino ai a tatou tapuaiga, e palota e tusa ai ma o tatou mafaufau e uiga i mataupu lautele, ma ia auai i faiga palota ma faaaliga manatu i le tulaga faaupufai ma i tulaga faaletulafono. E ao ona tatou tutu faatasi ma isi tagata lotu e faasaoina ma faamalosia le saolotoga e lagolagoina ma faatino o tatou talitonuga faalelotu, po o a lava. Mo lenei faamoemoega e ao ai ona tatou savavali faatasi i le auala e tasi ina ia mafai ona faatumauina lo tatou saolotoga e tulitulimatagau o tatou lava ala taitoatasi pe a oo i le taimi e alagatatau ai lena mea e tusa ai ma o tatou talitonuga taitoatasi.
Lona lua, a faalauiloa atu e tagata lotu o latou tulaga i tulaga faaupufai, e tatau ona latou onosai i taimi uma e uiga i manatu ma tulaga o i latou o e e le tutusa o tatou talitonuga. E tatau i tagata lotu ona tautatala ma le alofa ma faaali atu le onosai, agaga malamalama, ma le agalelei agai i o latou fili. Ua poloaiina tagata lotu Kerisiano ina ia alolofa atu i o latou tuaoi (tagai i le Luka 10:27) ma faamagalo atu (tagai i le Mataio 18:21–35). E tatau foi ona latou manatua aoaoga a le Faaola e “faamanuia atu i e ua fetuu mai ia te [outou], ia outou agalelei atu i e ua inoino mai ia te [outou], ia outou tatalo foi mo e ua tuuaifua mai ma faasaua mai ia te [outou]” (Mataio 5:44).
Lona tolu, e le tatau i tagata lotu ona lotovaivai i le tuuaiga masani e faapea o loo latou taumafai e fai tulafono e faavae i tulaga o amioga lelei. O le tele o vaega o le tulafono o loo faavae lea i amioga lelei faa-Iutaia-Kerisiano ma ua leva ona faia ai faapea. O le lalolagi i Sisifo ua faavaeina i amioga lelei ma e le mafai ona tupu e aunoa ma lena. E pei ona folafola mai e le peresitene lona lua o le I.S. o John Adams: “O la tatou faavae sa faia mo na o se atunuu lelei ma faalelotu. E matuai le talafeagai lava se isi mea i le malo.”9
Lona fa, e le tatau ona solomuli tagata talitonu mai le sailia o tulafono e faatumauina ai tulaga lautele po o aiaiga faavae lea e fesoasoani ia i latou i le faatinoina o tulaga manaomia o lo latou faatuatua i nofoaga e aoga ai na tulaga po o aiaiga faavae i le soifua maloloina o le lautele, saogalemu ma amioga mama. Mo se faataitaiga, e ui lava ina lagolagoina e talitonuga faalelotu le tele o tulafono tau solitulafono, ma nisi o tulafono faaleaiga, o na tulafono e umi so latou talafaasolopito tumau o lona talafeagai i sosaiete faatemokarasi. Peitai, o nofoaga e toatele atu ai tagata talitonu e tatau ona latou nofouta i taimi uma i manatu o vaega toalaiti.
Ma le mulimuli, o le agaga o lo tatou faapaleniina o le upumoni ma le faapalepale e faatatauina i saunoaga nei a Peresitene Hinckley: “Ia tatou aapa atu ia i latou i o tatou alalafaga e le auai i la tatou tapuaiga. Ia avea i tatou ma ni tuaoi lelei, agalelei ma agaalofa ma amiosolia. Ia tatou aafia i faamoemoega lelei o afioaga. Atonu e i ai tulaga e aafia ai tulaga ogaoga o amioga lelei, ae e le tatau ona tatou faatafatafa i mataupu o le amioga lelei. Ae o ni tulaga faapena e mafai ona tatou faatuiese ma le faaaloalo ae aua le faia ma le inoino. E mafai ona tatou faailoa atu le faamaoni o i latou o o latou tulaga e le mafai ona tatou taliaina. E mafai ona tatou talanoa atu e uiga i mataupu faavae ae le o uiga o tagata.”10
Tagatavaai i le Olo
O loo aoao mai le Tusi Paia e faapea o se tasi o matafaioi o se perofeta o le avea ma se “tagatavaai i le olo” e lapataia Isaraelu (tagai i le Esekielu 3:17; 33:7). I faaaliga na faaopoopo mai ai e le Alii le fautuaga lenei mo Siona o aso nei: “Faatutu … se leoleo i luga o le olo,” o lē o le a “[vaai] atu i le fili a o mamao atu o ia” ma tuu atu le lapataiga e laveai ai le tovine “mai lima o le faaleaga mea” (MF&F 101:45, 54).
Ua ou tautala atu o se tasi o na leoleo i luga o le olo. Ou te faamautinoa atu ia te outou o la’u savali ua moni. Ou te tautino atu ua ou iloa o loo soifua le Atua! Ou te molimau atu o Iesu Keriso o le Alo o le Atua, sa faasatauroina mo agasala a le lalolagi, ma e aapa mai o Ia ia i tatou uma taitoatasi ma le valaaulia e le mavae ia maua Lona filemu e ala i le aoao ia te Ia ma savavali i Ona ala (tagai i le MF&F 19:23).
Ata na tusia e Welden C. Andersen
O Le Sefululua Lenei Na Auina Atu e Iesu, saunia e Walter Rane © IRI
Aposetolo o Paulo, saunia e Jeff Ward
O Le Fafine na Molia i le Mulilua, saunia e Harry Anderson, © Pacific Press Publishing Association